2017年9月7日星期四

Hea“游” Vegas ~ Day 1

是日乘上午機飛去Las Vegas - 拉斯維加斯。



飛機臨飛到Vegas機場前先拍下這個沙漠景和今次住的酒店Encore(右)。



這個四日三夜Vegas之旅,重點是為了陪下Mr. Dolphin爸爸、Mr. Dolphin媽媽,一家人見下面,開心下,行程絕對是hea爆,不過,賭城的酒店大之餘,大部分連接賭場酒店的停車場距離又遠,每日來來回回不同酒店和停車場,返到酒店都係搞到好夜同好攰。

去到Vegas,由多倫多秋天裝扮(15°C)變回沙漠炎夏裝扮(40°C)~~~正呀喂,久違了的夏天feel呀,最正係Vegas唔潮濕,唔會焗住又唔會流好多汗嘛!攞埋租車, 已經是當地時間正午十二時,襯時間尚早,Mr. Dolphin就陪海豚兒去轉Aria酒店重溫甜品滋味,本來海豚兒也很想在這兒吃杯印象中超美味的gelato,但年紀漸大,真的沒有太多quota吃冰凍食物啦。^^”




吃完甜品,我倆就重返機場接機啦!接機後,先到酒店check in,原本打算check in完就陪Mr. Dolphin爸爸、Mr. Dolphin媽媽吃點東西,可憐他們連午飯也未吃,不過check in要大排長龍,到成功取得房間再多拍幾張房間照片已經四時多,於是,我們便改變計劃,索性提早去吃晚餐。這麼餓的日子,最好當然是食自助餐啦。






今次我們又再翻兜Caesar Palace的Bacchanal Buffet,原本預計要多付點費用排快線,無奶油要兩老捱餓再多等兩、三個小時的輪候時間嘛,卻很幸運地,我們到達之際竟然沒有人龍,馬上便可以入坐,結果每位慳了$35美元,而buffet價格則是每人$58美元+稅及小費。

至於食物方面,海豚兒就覺得沒有印象中好,尤其是生蠔,不新鮮,很難吃。不過Mr. Dolphin爸爸、Mr. Dolphin媽媽可能太餓關系,又覺得這餐不錯吃喎。




吃飽晚飯,我們便去了Bellagio四處逛打發時間準備看Cirque Du Soleil的“O” show啦。據Mr. Dolphin媽媽説,這個表演跟水舞間的形式有點像,只是沒有水舞間般緊張刺激。總括來説,海豚兒和Mr. Dolphin雖然沒有看過水舞間,但來到Vegas又有興趣看show的話,“O”也算是值得一看的!



完場後,我們一邊行去停車場取車再一邊拍照,然後便回酒店休息,準備迎接之後一天的行程咯!

20 則留言:

  1. 餓起來真的令任何食物也好吃起來!

    回覆刪除
    回覆
    1. 應該都係啦,兩老一開始攞完野食就埋頭苦幹拼命食,無乜點講野,睇見佢地咁餓,我都覺得難為咗佢地呀!^^"

      刪除
  2. 40C 超熱啦, 我一定頂唔順

    回覆刪除
    回覆
    1. 比著以前我都會頂唔順,但今次去到,我係超appreciate去旅行時唔駛驚凍親呀!

      刪除
  3. 係喎,果幾日啱啱LA有熱浪。 無點會hea 遊呀,你plan 行程很會花心思。buffet 我會揀Bellagio, even ground floor 的中餐都好食。

    回覆刪除
    回覆
    1. 多謝妳呢,今次(其實差不多每次)去Vegas嘅行程都好鬼hea,最多都係plan下食乜。哈哈,我覺得若果有前世,妳應該同Mr. Dolphin屋企更似一家人呀,佢爸爸又係話Bellagio中餐好食,仲特別懷念嗰度嘅雲吞麵。:)

      刪除
  4. 回覆
    1. 呢個buffet食物種類真係超多,不過唔係樣樣都好食,真係要揀嚟食。

      刪除
  5. 結果每位慳了$35美元,而buffet價格則是每人$58美元+稅及小費。 <--- it was going to be close to $100 per person + tax + tip? That would have been too rich for me.

    回覆刪除
    回覆
    1. 如果得我地兩個,我都唔捨得架,情願去第二度食過第二樣;P,當99知道我地預咗要俾額外錢排快線,佢都係咁諗,但我同佢講,一間餐廳滿嘅話,到我地行去第二間,情況都係差不多,咁好在佢都明,4人行,行都行得慢好多,好在呢餐最終我地都唔駛俾extra錢排隊咋。:)

      刪除
  6. 期待左好耐的油雞,今次酒店都好靚呀!
    但Las Vegas好似咩都要等好耐咁o既?

    回覆刪除
    回覆
    1. 間酒店都算幾舒服,我最開心係好彩Mr. Dolphin一家都滿意今次住宿安排!

      係吖,Vegas就係咁,去到邊都要排長龍,尤其係食buffet,如果我地早d去到酒店,避到3pm嘅check in人龍,咁就可能會好啲嘅。

      刪除
  7. 係哋食得早,應該唔駛排,我估差不多6點就一定要排。上次我覺得佢哋碗粥好好食,甜品選擇都唔錯,其他質素只係普通,同香港大酒店自助餐仲差一段距離,不過我哋呢啲海外華人已經會好滿足。

    酒店真係唔錯,在Strip嗎?

    回覆刪除
    回覆
    1. 我覺得Vegas嘅排隊時間都幾話唔埋,我睇reviews都見過有人3、4點都要等兩粒鐘,不過,妳講得啱,我地7點走時,就好長籠啦,但以食物計,又真係無以前咁滿足,食物選擇都縮皮,以前有皇帝蟹,依家都無lu!

      間酒店係Encore Wynn,係Strip近尾,對面係Fashion Show Mall,我最開心係老爺奶奶都鍾意間房,而且兩間房喺隔離但又唔係connecting rooms, perfect!

      刪除
  8. 嘩,沙漠啊~~ 我未親身見過沙漠的 ^^"""
    生蠔唔新鮮,仲要好難食,唉,真令人失望,我本身都好喜歡吃生蠔的....

    回覆刪除
    回覆
    1. 不瞞你說,我見到沙漠時都覺得好得意,所以專影低佢。

      係吖,生蠔一食落去就知有問題,好在食完無肚痛咋,不過都全靠Mr. Dolphin依家每次出門都叫我一齊食預防藥物,等個肚仔開心啲。:D

      刪除
  9. 有得去玩,正呀! 不過我對vegas又麻麻地!
    而家D buffet質數好似都好一般,以前反而真係好想去試食,又或者係個人已經要求高左,哈哈

    回覆刪除
    回覆
    1. 啲煙味又確係難頂啲,而且酒店越夜越旺場,煙味仲越勁。

      我覺得buffet質素真係無以前咁好,而同時我地要求都真係高咗嘅,何況每位成$60美金,喺北美黎講,呢個價錢都真係有啲期望架。

      刪除
  10. 好多年前睇過水舞間,最記得係電單車飛來飛去好刺激:)我未試過喺美國食貴buffet,喺香港就好鍾意,唔知點解喺美國個人會孤寒啲呢 :p

    回覆刪除
    回覆
    1. 妳講嘅同Mr. Dolphin媽媽講嘅一樣呀,佢又係話飛車好刺激,不過嘛,阿仔請阿媽睇show,阿媽一定話呢個show好睇嘅,哈哈!

      喺美國食貴buffet都唔太扺嘛,食物無香港選擇咁多同精,而且呢邊嘅人工又要打稅,食飯又要俾稅,想唔“慳家”啲都唔得呢。^^”

      刪除