週末好西日常 【更新：拍拖週年記】

唔覺唔覺，原來對上三個星期，海豚兒同主子，都食咗幾餐好西，都係時候要記錄一下啦。

九月初，我倆去咗食燒牛肉法式三文治做午餐，外觀看來其貌不揚，但店家做嘅法式三文治，係海豚兒喺多倫多最啱口味之選！

晚飯心思思，又去咗小炒店，食椒絲腐乳通菜，今次試埋鐵板黑椒牛柳同鑊氣乾炒牛河，短期內幫襯咗兩次，近期都應該夠皮啦！

是晚飯後甜品，係望月嘅流心黑芝麻腰果同開心果月餅，兩款都好食，尤其係後者，不過物離鄉貴，一盒四個，已經要接近$68加元連稅。

之後嘅星期六，我倆又襯happy hours優惠去食晚飯，無論頭盤、牛扒同漢堡包都咁好味。

星期日就去食三文治做午餐，另加兩杯啡。。。可憐海豚兒明明想飲抹茶牛奶，可惜賣光光，就只好同主子一同飲啡啦！

接下來嘅週六要去整車(換油)，我倆先去嘆個元氣茶餐，跟住就陪主子去剪髮。

晚飯就去食已經幾個週末無食過嘅壽司，甜品就以芒果糯米糍作結。

到星期日嘅午餐，本來無諗住影相架，但個菠蘿油塊牛油，實在太誘人，忍唔住都要影下。

就這樣，簡單記錄了最近三星期嘅週末日常。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

更新：剛過去週末，是海豚兒和主子手牽手的第二十五個年頭，其實我倆沒有慶祝，某人更加是忘了，哈哈！不過難得的日子，也簡單記錄一下吧。。。而其實當天海豚兒有少許不適，一整天也不太在狀態。我倆的慶祝活動，就只有吃外賣點心，加快餐店炸雞而己。