2018年11月12日星期一

2018日本“游” Day 15 ~ 京都。充實的一天團

這是忙碌的一天,因為海豚兒和Mr. Dolphin參加了京都巴士團一天遊。

行程安排如下:



第一站~清水寺



 




可惜裝修中,看不到下面照片的面貌。



第二站~三十三間堂,名字好有黑社會堂口feel呀。由於室內不能攝影拍下佛像造型,唯有影下張入場卷啦。據導遊小姐說,龍珠卡通悟空的髮型就是參考了入場卷上右面那個佛像的啦。



第三站~伏見稻荷大社。千本鳥居



很多人,很難得才能拍到沒有人的照片。^^”



因為之前的颱風關系,上山的路初期未有全面開放,所以可以拍到一些沒有遊客的照片。






下山後發現有條滿佈小吃攤檔的小路,影下、睇下、就當食咗咯!




然後就午飯時間,這個團餐味道也滿好吃,有驚喜呢!





午餐地點就在渡月橋附近,我倆食飽飽當然要爭取時間影返張相啦。颱風過後,橋上也加設了臨時欄杅亦有專人當值看守。




多看一會手信店,我倆就會合旅行團出發去下一個景點。



第四站~嵐山

還記得幾年前在blog友的網誌而認識這竹林景點,老實講,當時真的沒打算“有一天”會來這裡的想法,但既然Mr. Dolphin有興趣就來一趟啦,而其實這地方也真的不錯,只是看見有好些竹樹被颱風“打倒”了有點可惜呀!接下來的景點就在竹林旁邊,好方便啦!




第五站~天龍寺



在這兒隨意拍幾張照片就當交功課了啦。






第六站~金閣寺




雖然去年12月已曾到此一“游”,今次再訪依然覺得這兒很美,照片怎樣拍也好看。可惜來到之時已近黃昏,海豚兒很想吃的煎草餅已收檔中,無得重溫那份滋味lu。

就這樣完成了這天的行程,對我倆來說,行程安排的時間算足夠,服務也不錯,只是我倆懶底,東跑西走一天有點累。有趣的是日籍女導遊小姐曾經在香港生活過五年時間,當她聽到海豚兒和Mr. Dolphin以廣東話交談就很高興地跟我倆說廣東話,利害啊!臨走前,導遊小姐還把她Instagram account名字給了海豚兒...其實呢,海豚兒也想跟她保持聯絡,只是沒有Instagram帳戶,所以都不知點算好囉。^^”

玩了一整天我倆都累啦,沒有再四出找吃,只在京都站拉麵小路重溫好吃的札幌拉麵,然後就在車站內的中村藤吉嘆甜品咯。對於懶人一號和懶人二了號來說,住近京都站真的很適合我倆,超級方便,爽呀!


20 則留言:

  1. 我很喜歡京都,這個一天遊我都有去,行程都差不多,當時由雀后姐夫做司機。

    回覆刪除
    回覆
    1. 有雀后姐夫做司機,一個字,“爽”呀!我地呢方面比較弱,離開北美版圖就完全唔敢揸車。^^”

      我都係,如果再去日本,我都唔介意再去京都玩幾日。

      刪除
  2. 金閣寺 & 清水寺我都去過, 其他呢, 就無啦

    回覆刪除
    回覆
    1. 妳去過嘅呢兩個景點已係我心目中三大景點之二啦,去埋鳥居我就已經心滿意足,其他呢...我未去前都無諗過去,嘻嘻!

      刪除
  3. 日本真係好,風景優美秀麗,連團餐都唔差!
    到底食左幾多次中村藤吉呀?

    回覆刪除
    回覆
    1. 對,團餐可以用好食黎形容,絕對係我地意料之外呀,我之前仲擔心會唔啱食添。;P

      哈哈,俾妳識穿咗添。入店內正正經經坐低食都係兩次啫(一次宇治、另一次就京都站),但另外都幫襯咗兩次軟雪糕外賣,無法啦,難得住喺京都站附近,一定要善用地理優勢。XD

      刪除
    2. 好幸福呀,我都想隔日就有咁好味的雪糕食,堂食外賣都唔拘

      刪除
    3. 咁好味嘅雪糕,絕對係心甘情願將quota乖乖奉上呀!;P

      刪除
  4. 清水寺每年也會選個漢字,不知今年選了什麼字呢

    回覆刪除
    回覆
    1. 歡迎光臨同留言呀!:)

      原來會每年選個漢字架,我唔記得導遊有冇講添,好明顯我係個唔專心嘅團友呀,哈哈!

      刪除
  5. 令你認識竹林的卜友會是肥人嗎?HAHAAAAAAA
    我今次無去嵐山呢, 因紅葉未有喔~

    回覆刪除
    回覆
    1. 妳咁醒嘅!真係妳呀!我當年睇完妳嗰篇印象好深,仲記得你地行行下開始天黑(感覺有啲危險),可能因為咁,一直好記得呢件事。

      雖然未有紅葉睇,但即係天氣應該未太凍,喺室外都行得C服啲。:)

      刪除
    2. 我係夜晚去架, 我諗應該係我爸行行下唔見左, 你都驚嚇埋一份..HAHAHAHA

      刪除
    3. 係呀係呀,我記得啦,妳同妹妹都好擔心,但爸爸又好似覺得大家過份緊張,呢啲情況我地都試過,唔見咗家人嗰刻,真係嚇到“鼻哥窿都無肉”呀。

      刪除
  6. 金閣寺真係好靚,雖然地方小小又好遊客區,但個寺真係靚。可惜我舊年只係逗留得好短時間,而且只係見到下雨有雲嘅景,好想試一次秋天紅葉時又有太陽嘅景色係點樣。

    回覆刪除
    回覆
    1. 最難得金閣寺雖然係金色但一啲都唔會覺得俗氣,加上實物亡旁有山樹作背景,同遊人又有一水之隔,相入面又有埋水中倒影效果,真係點睇都咁靚。哈哈,咁啱我家主子都話有興趣影四季景色。

      刪除
  7. 他鄉遇廣東話人好有驚喜!

    回覆刪除
    回覆
    1. 係呀,而導遊小姐比我地更意外呀,因為佢喺團友名單中,我地係熟於加拿大去嘅遊客,所以佢係唔知我地識廣東話,而全團亦只有我倆係廣東話係「母語」。:)

      刪除
  8. 我好多時都人係影下、睇下、就當食咗同買咗! 所以最愛行超市及Food Court! 我很喜歡京都, 上年因颱風關係, 看不到時代祭及去唔到伏見稻荷大社. 只可留待下一次!

    回覆刪除
    回覆
    1. 係呀,旅行期間quota有限,午餐同晚餐之間經常處於仲係飽緊或未餓嘅狀態,有時想食都食唔落,遇上夏天太熱嘅日子胃口就更少。我都鍾意行超市,順便買啲零食返黎再邊食邊懷念旅程點滴。

      係喎,我都記得妳上次係專登揀慶典日子去京都,一場去到,真係有啲可惜呢,希望妳喺好快嘅將來可以安排到再去過吖,京都,值得一去再去!:)

      刪除