同行 2。石頭揸出汁

開始食藥前先要驗血證實病況及以作跟服藥後的對比。海豚兒因血管較幼，抽血化驗經常遇到阻滯，好似要喺石頭揸汁咁。跟專科醫生指引，海豚兒開始了每月抽血生涯，首先，是要找間地點和時間都配合我倆上班的化驗中心。海豚兒的如意算盤是Mr. Dolphin早上上班前先放低海豚兒到化驗所，然後海豚兒抽完血就自行搭車去返工。不過主子十萬個不放心，還是冒著化驗所菌多易感染生病的風險，陪海豚兒抽血，再車海豚兒返工。


<<第一次驗血>>
是次的抽血小姐把針拮到海豚兒皮下，眼見針在皮膚下游來游去都找不到血管，後來仲挑到條神經線，痛到海豚兒眼水都出埋，仲俾抽血小姐叫海豚兒唔好望住，因為會越望越緊張令到血管收縮，但明明海豚兒都無緊張，緊張就唔敢望啦！後來同Mr. Dolphin提起，他問海豚兒為何不即場鬧爆對方，海豚兒答“當時枱面嗰七個筒(tubes)依然係空架喎，一筒血都未抽到，意見都唔敢發表啦，仲點會出聲呀。”

還好有Mr. Dolphin做車伕，因為種種原因加起來，抽完血的海豚兒超級暈。一直以來，海豚兒都不愛倚賴別人，但原來在這方面，海豚兒已經不可能逞強了。

<<第二次驗血>>
是日抽血職員功夫了得，輕輕鬆鬆就抽完兩筒血，大成功！
但可能藥力加強關系，這天抽血後比上次更覺暈，手腳更冰冷。

<<第三次驗血>>
照醫生建議，要食多一種藥。另外，因第一份驗血報告結果有問題，要額外多抽一次血。在31日內，已經共抽了11筒血^^”。本以為抽兩筒，濕濕碎，點知職員右手試完再試左手都滴水(血)不漏。。。海豚兒可憐的雙臂呀！結果要勞煩高級職員在前臂抽，一拮就得咗！

<<第x次驗血>>
正當海豚兒對於每月抽血感到不知點算好心中只感燥暴之時，某次跟家庭醫生見面便順便發下嚕囌，家庭醫生竟然提出可以幫海豚兒進行每月抽血事宜，實在太感動啦！需知道家庭醫生抽血手勢比化驗所人員強許多，亦從未試過要拮海豚兒幾野都抽唔到血，海豚兒今次真係行運啦！

近幾個月以來，海豚兒已預約去家庭醫生到抽血，加上疫情嚴重，預約去醫生診所始終比去化驗所較理想。