2016年1月6日星期三

拾。婚。之旅 ~ 香港 Day 5 & 6: 慶生週末

<<香港 Day 5>>

來到Mr. Dolphin牛一這大日子,海豚兒當然是全天候陪主子慶生啦!

晨早第一餐,先吃了酒店送的生日小蛋糕。原本這天海豚兒還訂了Green的半自助brunch,但既然壽星先生無興趣,海豚兒也唯有忍痛取消booking咯!




想了又想,海豚兒還是很想襯這天做些較特别的事情,於是便決定和Mr. Dolphin來一轉幸福摩天輪。摩天輪轉第一圈時,大家也忙着拍照,沒有甚麼感覺。打從第二圈大家開始坐定定起,Mr. Dolphin就勞嘈魔上身,一直依依鵝鵝為何轉了三、四個圈,摩天輪還未停下來,原來有人害怕起來,不單手心出汗連腳板都出汗弄至襪也濕了!XD 唉!這個理科人不是畏高,而是聽到摩天輪機器組件不時發出一些不尋常的聲音而不安啦!哈哈哈!







好吧!玩完摩天輪,海豚兒就和Mr. Dolphin藉口去吃Lady M的綠茶千層餅舒緩一下情緒(定經)吧!是心理作用嗎?怎麼海豚兒總覺得美國的味道比較好而Mr. Dolphin就覺得差不多?!




吃完這個,我倆便搭叮叮去灣仔幫襯Patisserie Tony Wong, 這次則我倆也覺得水準沒去年在沙田店好呢!




再之後我倆就去了銅鑼灣逛街,行完街見時間尚早便去了Pacific Place的Cova嘆杯咖啡,順便抖抖。^^"




到晚餐時候便到旁邊的港島香格理拉酒店內的龍蝦吧來吃生日大餐咯!特别感謝blog友Yan的提意,海豚兒和Mr. Dolphin也真心喜歡這餐廳,無論食物和服務也有超水準表現,就連平常懶到阿媽都唔認得的海豚兒在錯過限定時間內填寫survey也專程寫封電郵感謝他們的服務,足以證明我倆有多欣賞這頓晚餐。:)

 


只可惜海豚兒的胃較敏感,吃了四隻生蠔不久後,感覺味道太“鮮”,有點想吐的感覺,之後已經無法完成很好吃的三成熟牛扒。T_T








餐廳在甜品碟上寫上"Happy xxth birthday"的字樣,Mr. Dolphin在吹過蠟蠋後便馬上把數字擦走,海豚兒馬上將照片發給Mr. Dolphin的家人看,笑儍了他們,更令到Mr. Dolphin媽媽想有樣學樣,在Mr. Dolphin的生日蛋糕上加年歲,可惜最終都被Mr. Dolphin家姐阻止了,嘻嘻。




 <<香港 Day 6>>

這天一早海豚兒回到成長的地方返早堂崇拜,崇拜完結後在車站附近兜了一圈,忍不住拍下了一些有兒時回憶的建築物。

 


之看便和Mr. Dolphin會合一起去又一城Simplylife嘆個靚brunch,開餐途中竟然巧遇從羅省回來探親的朋友,哈哈!真係約都無咁啱呀!




 
吃飽午餐後,順便到greyhound買了件太多cream又有少少過甜的甜品吃,補充好足夠體力便按原定計劃跟Mr. Dolphin媽媽、Mr. Dolphin家姐去拜山。




拜完山,Mr. Dolphin家姐就車我們去大美篤行一轉,嘆杯茶抖下,影下日落,便出發前往圓方,一家人和Mr. Dolphin去Mango Tree吃慶生飯。





這個晚餐除了乾巴巴的油酥餅,其他食物全是水準之作,連Mr. Dolphin媽媽、Mr. Dolphin家姐也十分欣賞這頓飯。







最後還有母女預訂的生日蛋糕作結。大大感謝Mr. Dolphin家姐請我們吃這一餐生日晚飯呢!:)



回酒店前,Mr. Dolphin竟然有約(!),和他的大學同學去飲杯嘢,那麼海豚兒當然亦唔執輸,相約契老豆去甜品下場,嘆番個椰皇啦!:D


18 則留言:

  1. 這兩天,真係食勻港九新界喎。 祝MR D 生日快樂。

    回覆刪除
    回覆
    1. 係喎,妳唔講我都無留意,我嗰兩日真係去加吃匀港九新界,只差未去離島咋。;)

      我代Mr. Dolphin多謝Samwei!

      刪除
  2. 海豚兒:
    ~原來Mr. Dophin 生日時間, 咁近你哋結婚嘅日子!!
    ~你去到香港都好識食, 食啲嘢, 全都好美味!!

    回覆刪除
    回覆
    1. 其實兩個日子差個幾月架,不過我哋計劃行程時就唔到結婚週年,我咪將旅行順延去佢生日囉,而對佢嚟講,佢又無所謂架喎!

      多謝,應該係因為我為食,成日恨食,所以睇人哋介紹完就跟住去啫!^^"

      刪除
  3. Mr. Dophin 生日快樂,祝你身體健康,事事順利 =)
    酒店送的蛋糕又幾靚啊,好唔好味啊?
    Lady M 我一直都想試啦,不過地點好遠,遲遲都未試...嗚....

    回覆刪除
    回覆
    1. 我代Mr. Dolphin多謝妳呢!人越大越發現身體健康真係最重要呀!

      呢個係忌廉什果蛋糕,味道正常啦,可能因為我哋都麻麻地忌廉啦!

      唔緊要啦,等老公得閒,兩口子先拍拖去,唔駛同人逼,慢慢享受仲好!

      刪除
  4. 聖誕時,姑奶個女買咗個LadyM o黎食,依家越o黎越貴

    回覆刪除
    回覆
    1. LadyM喺香港都賣得好貴,11月時仲未有whole cake賣添,每人限買x件,真巴閉!

      刪除
  5. 行程超級緊密呢!!!
    你好update 呀!知道邊度食cake,邊度食飯!!我已經OUT晒,知道嘅都係以前在住時嘅餐廳...

    回覆刪除
    回覆
    1. 嘻嘻,呢兩日行程算輕鬆啦,除咗同奶奶地約埋食晚餐,都無約其他人。

      妳指嘅update可能係心態上嘅唔同卦,離開香港太耐,我以前學生年代嘅餐廳都執哂,依家返去感覺似遊客,所以會四圍揾平時食唔到嘅嘢嚟食。妳同川老爺從前喺香港共同生活過,去番以前住時嘅餐廳,除咗食,更重要應該係回味當年情懷呢,不知幾sweet就真!

      刪除
  6. WA....食勻全香港WO, 好多地方我都未食過呀, 等我又去試下先~
    LADY M, 我覺得麻麻...可能奶味太重啦~

    回覆刪除
    回覆
    1. 喺妳話"好多地方我都未食過"嘅同時,我想話我叫椰皇係因為妳個blog提過自家製椰皇而挑起我條為食筋架,不經不覺間,原來blog友間也在互相影响中。:)

      我都覺得係,最奇係我喺NYC食時又係咁覺得,喺LA食時反而覺得綠茶味重D,好食D。唉!我估我都係脷胎太厚,唔可以作準啦!

      刪除
  7. 點解妳喺香港成日撞到人架haha~

    回覆刪除
    回覆
    1. 好。記。性。!我嗰次可能嚇儍咗,唔係睇到妳嘅留言,我竟然唔記得另一次嘅撞到人事件。^^"

      講番起,其實我一直都好抱歉嗰日對住妳同Yan數落葉架,雖然唔記得之前嗰part,但我就一路都記得煩住妳哋,多謝妳呢!

      刪除
  8. 依2日真係食得好幸福滿足, 仲搭埋我想搭的摩天輪, 好正~~~
    不過見妳講到「摩天輪機器組件不時發出一些不尋常的聲音」, 都有少少驚喎, 好在無野咋

    回覆刪除
    回覆
    1. 哈哈,真係肚滿腸肥但同時亦超滿足。:)

      我估正常情況係無人留意到摩天輪嘅聲架,係Mr. Dolphin零捨敏感啫!

      去吖,去吖~~我哋星期六約十二點去到,得少貓三幾隻,每個party都可以唔駛額外俾錢而包廂,而我哋仲係唯一嘅廣東話乘客人添咋,我估港人鍾意夜晚去,而我反而怕黑(!),嘻嘻!

      刪除
  9. Mr. Dolphin當日先知食半buffet呀?點解佢唔想食呀?
    妳第6日好精彩喎,環遊九龍、新界咁滯

    回覆刪除
    回覆
    1. 佢一早知我訂咗架,不過到嗰日佢都仲係唔想去,唉!算啦,勉强無幸福呢!如果妳嗰日唔係有嘢做,我都諗過問妳有無興趣同妳老公去架。

      哈哈,第六日仲撞到阮兆祥添...吖係盧覓雪至啱!XD

      刪除