2013年11月30日星期六

椒鹽小鳥

如果你在餐廳的牆上看見貼上"椒鹽小鳥"這四字招紙的菜色介紹,你會有怎麼樣的反應呢?

這是海豚兒心中多年來的疑惑。

話說當年於羅省念書時,海豚兒曽在一間兼賣燒味的中餐館作侍應工作。樓面有兩位全職的中年女士,加三位兩女一男的兼職學生輪班。學生當中的一男一女是老板娘和老板的朋友,而海豚兒是經友人介紹下找到這人生中第一份工作。有一天,老板說大厨打算推出一些香口小吃,著我們三個"學生哥"寫招紙貼牆,當中的菜色海豚兒一點印象也沒有,只記得其中一味-----椒鹽鵪鶉。我們三人想了又想,完全不懂"鵪鶉"二字的寫法,要知道當年還未有wifi這回事,更遑論google translate之功能,結果,他們提議寫"椒鹽小鳥"作罷。在此,海豚兒必須強調自己並非"創意無限"類型,沒有參與的份兒,亦因為一直忙著招呼客人,極其量是旁聽,心想,"咁都得???"  結果,"椒鹽小鳥"就這樣隆重登場!

海豚兒在午巿後下班,第二天早上開舖時,發現"椒鹽小鳥"已經被"椒鹽鵪鶉"替代了。聞說,老板看見"椒鹽小鳥"的招紙激到"啤"一聲,連髒話也說了,著其他人把這張招紙換掉。當然,老板無論多"且"火,也不會炒他的朋友仔,而旁觀的海豚兒亦避過一劫。

在這店舖工作只有數個月的時間,當中親眼目睹過一些令初出茅廬的海豚兒大開眼界之事情,下次有機會再和大家分享吧!

2013年11月23日星期六

Comfort Food 首選

每逢忙到頭昏腦脹的日子,海豚兒喜歡吃 comfort food 為自己打打氣!

<<Salmon Sashimi & Spicy Salmon Roll>> ~ 是海豚兒每一至兩星期都會叫嘅外賣,係屬於返工嘅 comfort food 首選!



每次老板娘接聽電話時,海豚兒只會簡單地說 "唔該要個 #7 外賣吖!"

老板娘總會輕快地回應 "好吖! 陣間見!"

旁邊的同事每次聽到海豚兒叫外賣都會打趣說海豚兒跟老板娘打暗號,因為,#7 的正確名字是:  午餐精選七號 - salmon sashimi & spicy salmon roll + miso soup + green salad, 而海豚兒嘅 #7 係走湯、走沙律。 老板娘好好人,成日提海豚兒幾時想要返個湯同沙律,出聲就得啦! ^^

海豚兒因為食唔哂無謂浪費,所以咪走呢樣、走嗰樣囉!

有一次,咁啱有朋友喺海豚兒公司附近有些事要辨,所以找海豚兒吃午飯,為咗方便佢搭車離開,我們選擇喺 food court 見面,為咗爭取時間傾計,海豚兒預先買定 sushi 去 food court 同朋友一齊食,因為朋友係素食者,而又最唔鍾意諗食咩,所以海豚兒就決定買 sushi, 因為朋友好喜歡食 avocado sushi rolls。

幫襯呢間店三年多,有趣事就喺n個月前嘅一日發生。老板娘喺海豚兒攞外賣時,送咗張免費現金卷比海豚兒下次用。嘩嘩嘩!!!  嗰日咁啱係海豚兒生日,連揾海豚兒食飯個朋友都唔知架,原來生日嗰日會特別幸運喎!  諗起都覺得自己好幸福呢!

最近除咗有 comfort food 之外,仲有埋古古力做"魚"後甜品。同事將家人喺澳洲帶回來的古古力手信與我們分享,是 Cadbury Rum & Raisin Dark Chocolate 呢!  Dark chocolate 係海豚兒嘅至愛,加埋 rum & raisin 令到個古古力味更豐富同有層次。這位同事的姊姊在悉尼定居,所以同事和家人也經常前往探望,因為他們,海豚兒有幸品嚐到許多特式 Cadbury 古古力,唔知點解加拿大無呢D款色嘅呢? 又唔知 Cadbury 原產地英國, 歐洲又或者亞洲會唔會有更多選擇呢?  真係好好味架! 有嘅話大家亦不妨一試! ^^





2013年11月17日星期日

最怕出差

因工作關係,Mr. Dolphin 每年總會有一兩次突如其來的出差機會。在許多人心目中(包括他的同事), 出外工幹算是一份筍 job, 但對於不喜歡交際應酬的 Mr. Dolphin 來說,這絶對是苦差, 尤其是以他的工作性質,但凡出差都代表有"爛攤子"要收拾, 唉!

以下行程是海豚兒較為有深刻記憶,而排名絶對不分先後。

<<最短之行程>>

13小時來回多倫多及滿地可 (如果開車,車程要六小時一程。如果坐飛機,機程大概一小時) - 偉大的海豚兒管接管送,5:30am 就送 Mr. Dolphin 去機場坐飛機, 7:00 pm 再去機場接他回家。最可憐是,時間太短,沒有機會比海豚兒要求手信嘛,可知道 croissants 同 crepes 都係滿地可嘅名物嚟o家!

(細細聲地梗正: 其實朝早海豚兒眼瞓到唔肯揸車,要 Mr. Dolphin 自己開車去機場,等海豚兒係車到發呆,去到機場時,才肯~又或者可以話係死死氣揸番架車返屋企)

<<最被羨慕之行程>>

一定係歐洲莫屬! 一星期之內,不停在德/法/瑞士等國家邊境徘徊,簡直係寓公作於娛樂。當然,對海豚兒嚟講,重點之最是兩大盒超美味嘅瑞士古古力手信啦! 非常回味。。。唔知幾時再有得食呢? ^^








<<最"奇"之行程>>

1. 這絶對是中國之行。為了買手信給海豚兒,被老番(白人)同事老點,帶去專賣老番(番版)的商場, 還見識到這白人同事比街巿 C9 更勁嘅驚人講價技巧,重點係用英文v.s.講普通話嘅店主, 以超平價購買手信回加給他的妻兒。Mr. Dolphin 當時真係睇到目定口呆!  海豚兒則暗自高興沒有收到老番貨做手信!

2.  或者中國實在太千其百趣,另一件奇事也是發生在另一次中國之行. 話說,海豚兒唔知幾時聽人講過話大陸D鴨舌好好味,就請Mr. Dolphin 買返嚟試試。於是,Mr. Dolphin 就喺機場買了兩大包回來。喺機場買係因為感覺上好似衛生D,而且每條鴨舌都係獨立包裝,都似乎幾得!  點知,打開包裝望住條疑似鴨舌嘅物體係沾滿已凝固嘅醬油,咬開係有一條非常幼嘅骨,而又一定唔係鴨舌嘅骨,醬油下的鴨舌肉,味道疑似唔知係邊種動物嘅肉,而又唔係鴨舌應有嘅質感,到呢刻,海豚兒梗係吐掉+掉哂所有鴨舌啦! 不過,咁多年嚟,海豚兒都有懷疑自己係咪食咗老鼠肉。。。=_=!

<<最強之行程>>

其實海豚兒係非常支持 + proud of Mr. Dolphin 當年決定去非洲短期工作的決定。不過,不得不承認嗰幾個月,佢真係"捱"得好辛苦,工作時間長,無啖好食,而且又無人無物。依然好記得送機嘅片段,心裡頭有萬般不捨,而眼淚會好似水喉閂唔實咁滴出來,還好,一切已成過去。

<<最雞犬不寧之行程>>

話說  Mr. Dolphin 和數位同事一同 road trip 數天.  當中有兩位同事較為有主見,而他們的想法又往往距離好遠,所以經常爭持不下,每天在途上吵吵鬧鬧,真係難為其他愛安靜而又無所謂嘅同事們。

<<最美滿之行程>>

呢次係去多倫多附近的 Niagara Falls (你瓜我瓜大瀑布) 兩日一夜嘅行程,海豚兒有幸做跟得海豚, 喺 Mr. Dolphin 做工時,自己週圍行街街 + 食嘢。美滿係因為可以試一間想試好耐嘅 Brazilian Steakhouse, 佢係一間 dinner buffet restautant, 主打 grilled meats.  食完一餐咁 heavy 嘅晚飯, 又可以留係酒店住番晚,唔洗趕住揸返 1.5 鐘頭車返屋企,真係幾爽!








2013年11月14日星期四

龍蝦、皇帝蟹海鮮餐@魚樂軒

有位舊同事丈夫獲生果公司重金禮聘, 去年九月前往加州發展,今年夏天舊同事離開多倫多,跟隨丈夫移居加州,這個月從三藩巿回來一星期,約埋其他愛吃的舊同事見面聚舊。

其中一位舊同事提議番兜我們九月飯聚的餐廳,既然能吸引到舊同事們在個半月之內去幫襯兩次,海豚兒決定和大家簡單介紹一下。

這餐廳開業幾年,今年細鋪搬大鋪,每逢週末睌飯分 6:00pm & 8:00pm 兩場,場場滿座之餘亦只收現金,老板絕對"發"到豬籠入水,睇下 menu。。。


以下是這兒的兩大賣點:

<<大龍蝦@8.50 磅>>

疊起似隻龜嘅大龍蝦 :)


<<亞拉斯加皇帝蟹@6 磅>>

層層疊 Jenga 蟹蟹


無論係龍蝦、皇帝蟹,味道都非常鮮甜,肉質嫩滑彈牙,如大家路經多倫多,絶對值得一試! 當然,以多倫多這價錢在温哥華吃皇帝蟹(多: $45加幣/磅 v.s. 温: $16加幣/磅), 當然是貴得過份,但在多倫多,這可是難得的了!  至於其他食物就唔得閒影lu~

真心羨慕舊同事能夠搬往三藩巿享受加州陽光,尤其多倫多天氣漸冷,連同陽光玩遊戲機會都無啊!  希望舊同事認識多D新朋友,可以喺加州活出快樂的新一頁!

小小小貼士: 如有興趣,最好提前一至兩個星期定位
更新地址: 680 Silver Star Blvd (Pacific Mall 對面) - 謝謝Laura Dane提醒^^
電話: 416 321 0250

2013年11月10日星期日

我的室友

讀書年代曽有過許多室友,包括原本已相識或不打不相識的,其中最深印象是在温哥華認識的這一位室友。

當年海豚兒在報紙上找到一個地點、價錢合適的地方,自己獨佔一房一廁,廳及廚房則與另一室友共用。由於房子是新建成,入住時房東太太還未把另一房間租出。當這室友來看地方時,海豚兒不在家,這室友看見海豚兒床上的其中一只毛公仔,便單純地相信我們能合得來,決定把她的房間租下來。

第一次見面時,她便把這故事告訴海豚兒,她看見在床上的 Snoopy, 就暗喜,因她最喜歡的卡通人物就是 Woodstock~~~

她早起,七時起床便開始燘蒸煮炒當日的午、晚飯,準備好後,便上學或回房間温習。她只有七、八十磅,身體亦不算強壯,偶爾還會煲中葯進補。她非常注重健康,除了早睡早起外,也喜愛食用有機食物,記得她每次弄新鮮蘋果汁,也必定預留給海豚兒,很窩心的!

她和海豚兒其實一點也不像。讀書年代,海豚兒是夜貓子,晚睡、晚起,不愛做飯,年青時比較西化,尤其怕老火湯和中葯,因為極度害怕葯材的味道。

可出奇地,我們相處得非常融洽,同一屋簷下一年多不單從未吵架,還經常傾心事,談扮靚心得,互相幫忙處理日常時務。例如,她不喜歡外出,但為了身體健康,她每天也會吃一尾新鮮蒸魚。愛逛街的海豚兒許多時也會替她買魚回去,有時告訴她魚雖然已劏,在車內卻依然"彈下彈下、好生猛," 她也會滿心歡喜地道謝,非常 sweet!

其中一個她不愛外出的原因是因為當時她是"新牌仔," 對揸車沒有太大信心。記得她剛考牌後,喜歡在星期六早上從家駕車回學校,讓自己熟習路面環境。令人最難忘的是她告訴海豚兒田七有止血之用,雖然家中沒有田七,但她每次練車也會把她的"田七牙膏"帶在身邊,以防車禍發生時,可以為自己止血急救,相隔這許多年之後,海豚兒每次和 Mr. Dolphin 談起此事,也定必會心微笑!  她著實是太太太可愛了吧!

可惜我們已失去聯絡多年,海豚兒只希望這室友和家人也生活安好吧!  :)


2013年11月7日星期四

花係代表凋謝?!

今年的結婚週年,收到 Mr. Dolphin 送上兩朿花花,第一朿是正日收到,第二朿是三個星期後。



多謝 Mr. Dolphin, 感激你對我的好,從拍拖到結婚這麼多年,一直也帶給我許多歡樂,待我千依百順,讓我過著簡單而幸福的生活,不單沒有厭棄我的壞皮氣同得過且過(即求其)的性格,還凡事以你的認真態度為我排難解紛和"補鑊," 能夠和你一起,實在是我這輩子最大的福氣。

從來只要我說想吃、想做、想要、想去、想試的,只要你認為安全、可行,你必定會陪我完成,無論我的要求有多古怪、騎呢。

每天放工, 你總會告訴我一句 "無論返工有幾辛苦,只要放工見到你就足夠." 而我,只會儍儍的笑著,沉醉在甜蜜幸福中。

能有這樣著緊自己的老公,這已經是最大的禮物啊!  我會努力做好妻子本份,不會讓你擔心,與你手牽手快樂地渡過每一天,這是我倆的誠諾! 



兩朿花花的原由:

Mr. Dolphin 對第一朿花花非常不喜歡,從花花的顏色、包裝手法,到襯托的色調,存在著萬般不滿,所以,他決定要再送一朿他認為滿意的。

為了挑選他認為最好的選擇,他事先在網上找有好評的花店,親身去花店探路,揀選他認為合襯的顏色、包裝、插法,然後才預定。

花花的命運:

第一朿花花因為海豚兒灌太多的水而急速溺死.....

第二朿花花因為海豚兒沒有給足夠的水而乾死......

結果,Mr. Dolphin 套用男親女愛 Miss. Mo 沒花收時的對白 "花 - 係代表凋謝!" 來恥笑海豚兒的無知,嘻嘻! 當然,Mr. Dolphin 對海豚兒的春虫虫行為亦習以為常,沒有半點不悅!

2013年11月3日星期日

無獎競猜遊戲

這是上個月在 Farmers ' Market 買的果果,係農夫先生嘅熱情推介。^^

你估下佢哋係咩呢?

放佢喺個橙隔離,佢細過橙好多喎! (有無留意到個橙比佢嚇到面都青埋呀? hehe)



燈燈燈凳。。。 。。。


連橫切(咬)面都睇埋,估到未?


真醒目! 佢就係 baby kiwi 啦~~~~

味道同奇異果差不多,酸酸甜甜,表面較為光滑,唔係周身毛,可以連皮食,塊皮有些微苦澀味,幾特別。

會唔會再試? 或者啦,因為 Mr. Dolphin 唔鍾意食酸微微嘅嘢,得自己一個人食哂成兜,有D無癮 =o=!