2017年2月19日星期日

這麼近 那麼遠

查實呢個話題海豚兒想寫咗好耐架啦!

先説一下海豚兒和海豚兒家姐吧!或許因為我倆中間有一個兄弟在一歲時就夭折關系,海豚兒跟家姐的年紀差距約六年多,現在看來分別不大,但在海豚兒小時候就覺得這距離很大了,從童年照片中亦可看出身型、身高上的差距。要看嗎?




















例如當海豚兒入讀小一時,家姐已經是中學生,到海豚兒升中時,家姐已到美國升學,印象中家姐升中後已很少會和海豚兒一齊玩,那時候她已進入青春期,和小學雞玩也真的太不夠酷吧。老實說,就算我倆在年紀更小的時候,回想那些一起玩耍的日子,海豚兒往往也是處於下風啦。還記得我倆會一起玩潛烏龜啤牌遊戲,不管最後那張牌是誰抽中,海豚兒也會被説成是烏龜,然後被罰扮龜爬行兜圈。^^”

相反,Mr. Dolphin和Mr. Dolphin家姐年齡差距就比較接近,他們實際年紀只差一年多,據Mr. Dolphin形容,他們至小就會一起玩,家姐在學校學懂的遊戲也會和Mr. Dolphin開心些牙,到他們年紀再大一點會一起追看金庸、一起打機,亦會互相指點和分享要決。當然,話説回來,他倆年紀這麼近,打交時亦當然打得更“認真”,更拳拳到肉啦,哈哈!

海豚兒沒有想説甚麼是好或不好,只想説出自己的感受。海豚兒自覺是幸運的,Mr. Dolphin和Mr. Dolphin家姐年紀相近亦一同成長,父母對待他們亦算公平,就算他們從小打交打到大,又不時會互相作弄對方,他們關系也是不錯的,更重要的是,他們的思想及價值觀亦很接近,這點對海豚兒來説真的很感恩,基本上,海豚兒只要明白Mr. Dolphin的想法,也就差不多等於知道他家姐在同類事情上的想法,加上Mr. Dolphin和海豚兒能夠走在一起,某程度上也因為我倆啱嘴型亦夾得來嘛,而他跟家姐性格上的相似,亦令海豚兒跟他家姐比較容易接近,相處上也沒有太多避忌就最爽!

Blog友們若對海豚兒有一點點了解,或許也會明白海豚兒是一個不太愛思考或計算的人,若果要每天猜度人心來生活,恐怕海豚兒早就沒轍了。所以嘛,海豚兒真的很慶幸在這方面沒有太多煩惱啊!

唔知各位喺家中排行大、中、小還是獨生兒呢?“如果,命運能選擇...”你又會?

28 則留言:

  1. 肥人是家姐, 同妹妹相差4年~
    小時侯我不太喜歡妹妹, 所以常常都跟朋友去玩沒帶妹妹去~
    而家回想就會覺得當時好衰, 搞到妹妹成日都自己留係屋企沒得去玩~
    大了就反而無所不談..

    回覆刪除
    回覆
    1. 記得細個時,我媽都成日唸我家姐同朋友玩唔理我,最搞笑係依家我又會見到我家姐唸個女同朋友玩,唔理個細佬。不過,好似妳咁講,人大咗就會好d,姊妹都會變得親近d。

      刪除
  2. 相差6年已經唔多啦, 我同我家中排行最長個位相差 10+
    我亦有朋友, 佢兩姊妹係最細, 佢地成長時, 家姐阿哥都已經結左婚

    回覆刪除
    回覆
    1. 咁妳細咁多,小時候會唔會覺得喺屋企有多d福利還是情願年紀差距少d,可以同年長過妳嘅兄/姊啱key d呀?

      咁嗰兩姊妹都算有個伴,如果唔係,感覺好似有兄弟姊妹嘅獨生兒。

      刪除
  3. 我三位哥哥大我8-10年不等,小時候基本沒一起玩過,所以細時我希望有個家姐可以傾訴心事!

    回覆刪除
    回覆
    1. 我成日以為有幾個大自己好多嘅哥哥就即係萬千寵愛在一身嘅小公主咁,反而無諗過原來會想有個家姐傾心事,不過嘛,人就係咁,得唔到嘅先有幻想空間,想象中嘅就自然美好d。

      刪除
  4. 玉仔姨姨細我5.5年啊,都有D代溝架
    不過我都自覺好幸福開心了,如果真係可以重渡童年,我想做Chloe妹妹,haha

    回覆刪除
    回覆
    1. 妳地情況同我地真係最接近,又係兩姊妹,又係差咁上下年紀,唔知妳細個有冇同個妹玩d無聊遊戲呢!小時候,家姐要我用英文稱呼佢做主人,教我叫佢做monster(master),叫咗一段日子,佢至知教錯我,講返轉頭,佢應該係第一代嘅怪獸家長。XD

      做Chloe妹妹就最幸福呢,家中有媽媽同大小情人鍚到佢燶。

      刪除
  5. 回覆
    1. 可惜文科始終唔係佢強項,佢最怕作文,中英都係!

      刪除
  6. 我和妹妹相隔四年,小時候都有一起玩不過很多遊戲其實都不適合一起玩啦(如波子棋,隔四年隔好遠啊)不過大了就拉近了,也有一起去旅行一起玩。

    回覆刪除
    回覆
    1. 原來妳係家姐。:)

      其實真係呀,小時候覺得差幾年真係好似差好遠咁,但大咗嗰幾年嘅距離又唔再係問題,反而係各自有家庭又唔係住喺同一個城市/國家,少咗共同話題,姊妹感情好似生疏咗。

      刪除
  7. 我有四個家姐,兩個哥哥,一個妹妹,頭尾相差十五年,我只大妹妹年幾,我覺得我同個妹都唔算太close

    回覆刪除
    回覆
    1. 嘩,原來係大家庭呢!咁8兄弟姐妹係咪大部分都移民哂去NY呀?兄弟姐妹間,有冇邊個close多d呀?

      刪除
    2. 得我一個移民咋,佢哋仲係晒香港,所以無隔幾年就返香港一次囉,兄弟姐妹之中,同三家姐最close,佢大我10年,可能佢份人比較“蒸生瓜”,依家返親香港都係住係佢屋企

      刪除
    3. 原來只得妳一個移民咗過黎,咁隔幾年就返香港見下親人都係好嘅,始終一家人聚埋一齊嗰種熱鬧、開心真係有錢都買唔到。人夾人緣,大10年唔係問題,最緊要都係係啱key!

      刪除
  8. 如果可以揀,我好想有兩個哥哥,總覺得有哥哥的妹妹很得寵....

    回覆刪除
    回覆
    1. 我都好似妳咁覺得,尤其係哥哥年紀比妹妹大多d,但上面車媽媽嘅情況又原來同我地“幻想”中嘅有d出入,嘻嘻!不過,3K就一定無呢個問題,從相片中都感受到佢地有幾close呢!

      刪除
  9. 我有一個家姐,大我3年,曾經都幾close既,但大家搬開後真係無咩好講咁,不過都係一家人囉,無咩感覺,哈哈!所以而家有左自己家庭,就好想佢地兩個close D, 最好吾駛搬開吾同國家住就好!

    回覆刪除
    回覆
    1. 我同我家姐以前一齊喺美國生活嗰幾年都係好close架,無所不談。但自從我由LA搬到Vancouver,再搬Toronto仲有埋時差,自然少咗聯絡亦少咗共同話題,都生疏咗唔少。妳嘅諗法我都好認同,尤其近年香港發生咁多事,有d朋友想移民,我都話最緊要考慮係咪可以一家人整整齊齊,雖然老土,但親身經歷過就會明。

      刪除
  10. My sister is 8 years older than me. She bossed me around, and she loved it!

    回覆刪除
    回覆
    1. 握握手~~~我細個時都係成日俾家姐點紅點綠,就算大個咗,有好長嘅時間,我都係順著佢意思,所以到近年我唔再係咁時,佢都好似有d若有所失咁,嘻嘻!

      刪除
  11. 我一家5姐弟只差6年多,非常近!

    但從來無一起玩過,個個都係各自同自己朋友玩,父母亦無要大嘅要照顧細嘅,所以我哋屋企「無大無細」就從少開始嘅。

    不過無一齊玩又唔等於關係唔好,我自己覺得我哋好親近架,起碼從來無吵架,就算依家5個都算天各一方,都仍然係親近架,要互相幫忙一定做得到。

    回覆刪除
    回覆
    1. 一直覺得妳屋企喺呢方面係比較有趣,唔駛太多interaction又可以維繫到感情,而且真係很難想像年紀咁近但小時候都無一齊玩嘅意慾呀!

      不過感情好、親近絕對勝於一切,始終一家人,能夠團結同齊齊整整真係好重要。

      刪除
  12. 哩個話題好好啊!人大左講起屋企人有時都好bittersweet!我印象中記得你姐姐有小朋友?我覺得有左小朋友都會多少影響大家會更「熟絡」定「生疏」。我自己就發覺同有左小朋友嘅妹妹多左意見不合,如果要太平的話我唯有附和,但有時做唔到,好似你咁話順得人意多但都想做返自己。小時候同妹妹冇咁嘅衝突,變相現在少講少錯!難得你同老公家姐同聲同氣,係另一種幸福:)

    回覆刪除
    回覆
    1. Vicky真係講得好中呀!從來我都傾向相信呢代生兒育女嘅父母都係想給孩子最合適而唔再只為傳宗接代,所以我會選擇尊重朋友作為父母嘅教養方式,而且好多時我都真心欣賞佢地嘅管教方法。反而對住自己家姐唔知係特別挑剔佢定肉赤佢嘅小朋友,試過忍唔住出聲,情況通常都只會變僵而對件事無幫助,好似當我知道佢要左拐子嘅姨甥仔用右手揸筆,我就忍唔住口講咗幾句,但講真,已成定局我講乜都無用,但每次見到姨甥仔學一樣新野,本能反應都係用左手時,個心都唔多好過。依家我多數會選擇靈魂出竅,當咩都唔知就算。^^”

      刪除
    2. 好明白你當時嘅處境。我都同樣諗住講幾句,最後變左論壇甚至冷戰。可能面對屋企人都想講最真嘅說話,但對方同時給最真嘅回應,然後一方覺得「點解我真心俾意見冇人聽」,另一方覺得「都冇問你俾意見」。你話要靈魂出竅,我笑了!我都想多啲練習哩個技巧。
      講開左撇子,我媽咪都係!反而我婆婆冇調教佢,而係學校老師強迫佢改用右手寫字。最後媽咪用右手寫字,但食飯、煮飯、揸針都用左手。我大大下都發覺自己有少少左手潛意識,但唔係天生用左手攞野,係後天見媽咪用得多左手有啲小習慣跟左佢,好神奇!海豚兒都唔好失望,你姨甥仔可能大左都會兩手並用咁叻叻!

      刪除
    3. 多謝妳嘅鼓勵呀Vicky! 始終我唔常見到家姐一家,要做到靈魂出竅都唔太難,反而妳同妹妹自小感情就要好,要視而不見確係唔易。但我估等孩子大d,或者多個細佬/妹時,情況又會唔同啲,小朋友還年幼時需要父母多一點,父母亦相對會緊張多啲,到小朋友再大一點又有自己玩伴,到時大家焦點都會唔同咗。

      刪除