2017年7月27日星期四

有沒有。。。耐性

七月的第一個星期天,海豚兒和Mr. Dolphin找了一間小店分吃了一份純素下午茶。綠茶latte是用椰奶來沖,少了份牛奶的酥香,至於烤菇菇多士,除了有Mr. Dolphin最怕的“草”XD、還有牛油果加pesto sauce。吐司烤過後把pesto sauce的香味都逼出來,超正。老實説,這份吐司真的十分好吃啊,翻兜的話海豚兒要獨霸一份至得,哈哈!



來到七月份又是Summerlicious的時節啦,七月第一個星期五,海豚兒跟兩位女同事相約吃Summerlicious午飯,餐廳地點是當中一位同事揀的,反正海豚兒也未去過,當然沒有異意啦。這餐廳在Shangri-la酒店內,名字叫Momofuku Daisho,食物選擇帶點fusion,最緊要是味道和服務也不錯就是咯。





這天放工後海豚兒跑去買了一杯近期大熱的匈牙利式的煙囪雪糕,可能當日天氣太熱吧,笨拙的海豚兒又掛住吃麵包做的雪糕筒,只勉強吃到三分一杯雪糕,其餘的雪糕在溶下又滴下的情況下浪費了許多啊。^^”



離開市中心時,海豚兒乘地鐵剛遇上沿線某地鐵站火警造成列車延誤,連帶附近幾個站也因為電源關閉要暫時停駛,而其他仍在運作的站,地鐵就以龜速行駛,難為Mr. Dolphin在約定的地鐵站等了又等也接不到海豚兒,結果還要在繁忙時間塞車去另一個地鐵站接返海豚兒才一起去吃晚飯。跟香港相比,這兒的地鐵服務真的很落後呀!@_@!

是日晚餐海豚兒在Pickle Barrel餐廳優惠中挑了很扺食的2 course meal呀,沙律跟煎雞胸扒才加紙$11加稅和小費咋,反正這晚海豚兒也不餓,吃甚麽也沒太大所謂,反而有人因為返工太辛苦,放工後還要花了大半小時塞車去接放工*,晚餐就決定要對自己好些,散點了份龍蝦配蝦意粉來吃。:)



吃飽飽然後在商場行下當散步,便回家休息咯。

*查實Mr. Dolphin的容忍量也算高呢,準時去到相約好的地鐵站接海豚兒放工,卻因為地鐵延誤造成大量等接放工的私家車齊齊塞喺地鐵站外圍又連位都泊唔到,還要不停塞住車兜住圈兜了差不多廿分鐘,等到海豚兒乘坐那班地鐵終於去到有訊號的地方才能用電話跟Mr. Dolphin聯絡上,然後Mr. Dolphin又再要塞車去另一個地鐵站到接返海豚兒,咁都唔忟憎都算係咁啦!

14 則留言:

  1. 原來加國地鐵咁落後架?雖然香港人好鍾意鬧港鐵,但其實佢班次真係算密、行車又快,係長期逼滿人囉~

    回覆刪除
    回覆
    1. 呢度地鐵真係比香港落後架,八達通都係近年至普及,而且到依家月台都係無幕門,所以...簡中仲會因為有“意外”而停止服務嘅情況出現。^^”

      刪除
  2. Mr. Dolphin 係咪平時都唔係一件忟薑? XD
    我以前好怕食甜筒, 次次都食到一手都係(技術唔夠 ^^)
    P.S. 覆桌, 好似解做反枱, 你係咪呢個意思?

    回覆刪除
    回覆
    1. Mr. Dolphin對住我時多數會calm啲,但平時嘅佢...例如揸車、做工嗰陣,查實可以改名做Mr. Grumpy架。XD

      而且有時甜筒卷得唔好,個底會有好大個窿,想唔一手係都難。

      哦,原來我誤會咗,多謝妳話我知,即刻改番先!

      刪除
  3. 我係件大 ''𠵼'' 薑一名,塞車會鬧人,發皮4架!

    回覆刪除
    回覆
    1. 我唔叻handle壓力,如果趕時間又塞車,我都會好忟亦會發脾4,但如果唔趕時間,我就無乜野,問題係,塞車呢家野,好多時都係由唔趕塞到趕。XD

      刪除
  4. Kudos to Mr. Dolphin!

    I love sprouts inside sandwiches. They give a little extra crunch.

    回覆刪除
    回覆
    1. 代佢多謝妳!:)

      我都鍾意仲覺得陣味好refreshing,反而Mr. Dolphin就好怕陣草青味。

      刪除
  5. 有耐性嘅老公好讚的呢!曾經我老公喺香港等我放工,佢喺月台到坐,我又好多時遲走,佢都等落去,我都好感動。反而我等人耐性真係麻麻。

    回覆刪除
    回覆
    1. 係呀係呀,我都試過呀,曾經有份工好忙,我已經係返朝早7:30但做到6:00都仲要好絕望咁打電話俾Mr. Dolphin話唔知幾時至走得,佢竟然仲可以好好脾氣咁叫我唔駛急,而佢就一直喺個street plaza到遊盪兩個幾鐘等我放工,換轉係我,應該等到黑面啦,哈哈!

      刪除
    2. 實在係廿四孝老公,海豚兒好幸福!:)

      刪除
    3. 謝謝妳呢! 我覺得Brandon都好sweet呢,見佢喺妳blog嘅留言就感受到。:)

      刪除