2017年9月22日星期五

Hea“游” Vegas ~ Day 4

由於是日Mr. Dolphin爸爸、Mr. Dolphin媽媽原定班機由下午一時被航空公司改成上午十一時離開,這天我們四很早就出發去機場啦。同以往一樣,每到說再見時,Mr. Dolphin媽媽都會眼濕濕,好唔捨得佢嘅寶貝仔女,喺呢個母親心目中,真係無野比家人重要,還好,海豚兒自問今次旅行扮演人媳的表現也不俗就是了,希望下次都可以做得到啦!

當海豚兒和Mr. Dolphin回到酒店已經差不多十點,既然都最後一天,我倆當然也不願意排長龍等食buffet,因為若果到十一點早餐完結時還未輪到我倆,就會連免費早餐也失去啦,所以還是再跳過條隊排快線去食自助早餐啦!食到第三日,真係食到悶悶地,這天只簡單的吃了一碟咸食、一碟沒有上鏡但好好味的蕃茄雲耳炒蛋和一碟甜食而已。



由於這晚我倆坐的是凌晨機,食飽飽後我倆就返房hea下,睇下電視,就連律政強人電視汁都撈埋(對,Vegas酒店一般都睇到當地中文電視),等到接近正午12時才離開酒店。

跟住就開車去Caesar Palace泊低架車,喺The Forum室內商場行下街



再之後就再行去Bellagio、途經Aria再去Planet Hollywood嘅Miracle Miles室內商場買包popcorns食下,食剩大半包就帶番去多倫多繼續食。



行行下見到呢度有間夏威夷四圍都有嘅便利店仲俾海豚兒發現有熊仔蜜糖賣,當然要即買啦!哈哈,怎麼來到Vegas,海豚兒一直在買夏威夷地道手信架。;P



之後我倆就在Vegas大街邊行邊影相,行到去Paris酒店又忍唔住入去懷念下我地第一次拍拖去旅行住嘅呢間酒店。





見到Paris酒店內,眼前呢間甜品店真係好感觸架,十幾年前黎玩,海豚兒每日經過都會眼望望餅櫃裡頭嘅甜品但又唔捨得食喎,因為按當時滙率計,每件餅要差不多$10加元,嗰陣時,$10加元已夠我地慳慳地喺多倫多food court食餐中式晚飯,相隔咁多年後價錢竟然同當年一樣約$6美元一件蛋糕,今時今日呢個價錢簡直係大件夾底食啦!對於我倆來説,更難得嘅係,時至今日,同行的依舊是對方。:)



行到咁上下時間,我倆就行返去Caesar Palace去一早訂好位嘅餐廳 - Joe's Seafood Prime Steak & Stone Crab食晚餐啦!




兩款頭盤分別係蟹湯同蟹餅,兩者也超級好味,蟹湯比平時飲開嘅龍蝦湯味道更鮮,估唔到海豚兒竟然比不折不扣嘅蟹迷Mr. Dolphin更欣賞喎!



可惜Mr. Dolphin所選嘅主菜海鮮意粉就麻麻地,海鮮配料其實整得好食架,只係個粉淋咗啲,而且配上pesto sauce,味道太霸道,同海鮮唔係咁啱channel囉!



不過海豚兒點嘅帶骨肉眼扒味道就超正,一睇賣相已經知自己無揀錯啦,嘻嘻!



最後就開心些牙了賣相唔多討好但味道好好又超巨型嘅蘋果批,能以此晚餐來結束Vegas之旅真係大滿足呢!:D



最後無無聊,喺還租車前,我倆又揸車去Vegas唐人街八卦下,原來依家嘅唐人街大咗好多啦,仲俾海豚兒見到以前喺羅省好鍾意幫襯嘅麵包店分店添,真係回憶返哂黎呀!



還完車,就去機場坐凌晨機返多倫多,返到去多倫多連時差已經是早上七時多呢,梳洗執拾好再瞓個靚覺,就這樣結束了這個Vegas旅行啦!


24 則留言:

  1. Paris酒店甜品的分享好sweet呢!
    最後一餐都好吸引,好完滿,咁下個trip係咪就係返HK?
    今日食了萬麗海景酒店個下午茶超級抵仲要好食,馬上想到妳,但唔知妳時間是否夾到

    回覆刪除
    回覆
    1. 謝謝Yan!:) 老實講,當時真係有啲感觸。

      最後嗰餐係我最欣賞呢,搞到我返到黎都心思思想去鋸扒。係呀,跟住就要等到返香港啦,要襯依家減下肥。

      我都超想可以去下午茶,不過今次時間太趕,應該無機會呢,唉!

      刪除
  2. 原來Vegas 有唐人街? 你係一個長情的人,周邊人和事只會在你身邊轉,但你仍然係你!

    回覆刪除
    回覆
    1. 係呀,Vegas有唐人街,以前去玩,我地成日笑喺唐人街食碗雲吞麵仲貴過食buffet,依家當然無呢枝歌仔唱啦!

      謝謝Samwei,妳寫嘅令我好感動呀!只要啱channel嘅人,我都會好好珍惜,年紀越大越明白親情、友情寶貴呢!

      刪除
  3. 你地有無諗過直情去探6299?

    回覆刪除
    回覆
    1. 今年應該唔會返溫哥華啦,因為打算返香港探下Mr. Dolphin家姐同我姨丈姨媽。

      刪除
  4. 你塊扒真係燒得好靚,而且係我最愛嘅肉眼。原來海豚先生同佢父母都一樣喜歡海鮮多過扒.....

    回覆刪除
    回覆
    1. 塊扒真係色香味俱全,我都鍾意肉眼因為貪佢好有肉香,不過就麻麻地肉眼肥膏多咗啲,嘻嘻!

      全中呀,Mr. Dolphin全家都係海鮮控,加上近年佢少食咗牛,不過佢都好幫忙,知我食唔哂,都有幫手食咗三份一塊扒啦。

      刪除
    2. 如果塊扒靚,幾大塊我都食得哂!

      刪除
    3. 哈哈!妳嘅小宇宙果然強大! 我最壞嘅地方係會留肚食甜品。;P

      刪除
  5. 對於我倆來説,更難得嘅係,時至今日,同行的依舊是對方。:) <--- my husband went grocery shopping with our 6yo and bought back some Pringles chips. We were reminiscing about eating them when we were in college.

    回覆刪除
    回覆
    1. 其實諗返轉頭都幾有趣,學生年代無收入、初出黎做工又可能揾得唔多,當時又會慳啲,食買玩都可能比較price driven,但又唔代表唔enjoy喎,不過依家睇返轉頭,呢啲共同回憶先係有錢都買唔到!

      刪除
  6. 我以前細個去親友的婚禮,一直都唔明,點解D阿媽成日哭?....我心諗,其實都唔係好感動丫,哭咩呢?
    不過當我依家大了,做左人阿媽了,我才知道原來做阿媽的,原來都是眼淺的...
    記得有次巨龍學校運動會,見佢乖乖咁進場,我都會好想哭(顛左..)...
    所以我依家方知道,原來做阿媽的,小小ge事都會好感觸,而且原來做阿媽的,都是眼淺的 XDDDD

    「時至今日,同行的依舊是對方。」,嗯,好喜歡你呢句喔,SWEET SWEET ^^
    海豚兒,你同Mr. Dolphin點識架 ? ^V^

    回覆刪除
    回覆
    1. 我自己發現年紀大咗,就算無小朋友都有呢種好易感動加眼濕濕嘅情緒出現呀,但明明,小時候我又唔覺阿媽或aunties咁眼淺架,嘻嘻!

      謝謝Sammi! 其實當時有呢個感觸都同我地點識有關,因為我同Mr. Dolphin喺教會到識,帶佢返教會嘅朋友當時已經有位女朋友,後來佢地都結咗婚,而咁啱就係我地去Vegas前發現原來佢地分開咗...佢地一齊都好多年,所以知道消息後,我地都有點突然。

      刪除
  7. 對於我倆來説,更難得嘅係,時至今日,同行的依舊是對方這句很到肉so sweet^0^

    回覆刪除
    回覆
    1. 謝謝Maggie! 寫完呢句,我有猶豫過係咪應該刪咗成句,因為好似有點難為情咁。^^”

      刪除
    2. 愛要開口何來難為情啊~

      刪除
    3. 難得妳唔嫌我冤氣就好啦。:)

      刪除
  8. 有人話有左小朋友嘅夫妻會容易將注意力轉移左喺小朋友上,再看返十年前眼中只有大家會更加感觸,你地二人世界咁多年更加close到冇得再close啦 :)
    嗯,見到你話原來你地喺教會識架!曾經有個對我有好感嘅男仔帶我去佢教會,我都有啲受寵若驚,不過冇選擇到佢,就係因為俾個機會我而家個老公喇 :)

    回覆刪除
    回覆
    1. 哈哈,多謝妳呀!我估都係啦,尤其我見身邊嘅女性朋友,有咗小朋友之後,好多時做決定都係以小孩行先(in a good way),唔係佢地唔再重視另一半,而係真係分身乏術嘛。不過我都有好朋友嘅父母就算年紀大咗,都仲係好恩愛,見到佢地都覺得好sweet!

      私心地覺得,妳揀Brandon係啱嘅,唔係我哋都未必會喺blog到識嘛,哈哈,其實從妳嘅文字都唔會覺得妳後悔當初決定,證明妳係找到對的人啦。:)

      刪除
  9. 我吾知原來vegas有唐人街tim....
    隔左咁多年,同你去vegas都係同一個人,真係好sweet呀!

    回覆刪除
    回覆
    1. 以前Vegas嘅唐人街係一個street plaza到,今次經過目測見到有幾條街咁長,我都好surprise呀!

      啱啱過咗嘅週末慶祝完結婚週年,希望餘生都係同呢個人一齊慶祝啦,嘻嘻!

      刪除
  10. 我當年買左新界樓我99 聽到都唔太開心啦...更何況你6299一年先見1-2次..hahaaa

    回覆刪除
    回覆
    1. 噢,我都聽過近似情況,99知道個仔會搬遠啲,係會若有所失。我自己覺得呢...我會想住近自己阿媽多過99。;P

      刪除