2016年2月25日星期四

離不開。留不低

其實呢篇寫了差不多幾個星期,但寫極都唔順。無計!海豚兒組織力着實太差,希望大家仍能看得懂吧!:)

~~~~~~~~~~~~~~~~~~~~~~~~~~

從來海豚兒也算不上是個精明的人,對於數字遊戲,更是反應遲鈍到嚇壞人。有時候,身邊朋友也會好奇為何海豚兒會這樣,明明很年青已開始自己生活、自給自足,怎麼對金錢的敏感度還是這麼低,找續錢銀時又成日找錯,遇上減價,望着那些買X送Y呀、折上折的價錢牌發呆發足五分鐘還未看懂端危,然而,厚顏無恥的海豚兒通常還會得戚地拋下一句“我大方囉~” 來打完場,哈哈!

在海豚兒眼中,人生中很多事情也是隨隨便便就過了,不管精明與否,日子還是如常地過。有較認真去想過的,就是人離世後帶不走的身外物。原因嘛,像海豚兒和Mr. Dolphin無兒無女,雙方家中的幼小亦衣食無憂,那麼若我倆同時突然離開,我倆留下的蘇州C該怎辨呢?

不管多或少,海豚兒心底裡一直認為“留下的”是給自己所着緊的人最後的一點心意,或許有人會認為,年紀也不算很大,不用這麼快想這些吧!海豚兒相信當年母親也不曾想到自己會這麼年輕便離開卦。;P


無聊的海豚兒有時又會諗:Mr. Dolphin和海豚兒岀門不是行孖必就是和Mr. Dolphin家人一起去旅行,若果全家化身為新奇士橙家庭又會點呢。。。

好像越説越遠了。簡單點説,海豚兒擁有的真的很少很少,少得不夠海豚兒停下來不工作,但也不代表萬一意外瓜柴,海豚兒會想益政府或非自願情況捐出去,尤其是一些紀念價值遠比實際價值重的物件,如母親留下來的婚介等等,所以和Mr. Dolphin亦早已有共識萬一有甚麼冬瓜豆腐,這些物資該如何處理。

其實寫這篇blog只是想和大家分享下自己的無聊想法!

按我倆的情況,要立遺囑給在正常環境下該比自己早C的長輩嗎?萬一他們行先一步,那海豚兒豈不是又要改遺囑。又,海豚兒父親比海豚兒富有多多聲,坦白説,無奶油海豚兒要簡接留些甚麼給他的“女婿”即他繼女老公吧!

相反地,海豚兒則百分百支持Mr. Dolphin計劃裡頭包括他的父母啊!不竟,他的父母真的很愛鍚他和他的家姐嘛!嘻嘻,所以在這方面,Mr. Dolphin要顧及的絶對比海豚兒多和頭痕。

不知道大家在這方面又有沒有甚麼意見或可分享的呢?

24 則留言:

  1. 但你有家姐佢又有小朋友嘛,金錢同有紀念性嘅都應該留俾佢哋吧。

    我對錢財同身外物無任何留戀/想法,等其他人捐咗又得,邊個攞咗去都無所謂。我只係同老公、家姐同老爺奶奶講低點樣處理我遺體,同埋講低我份人壽保險俾邊個。

    回覆刪除
    回覆
    1. 如果喺正常情況下,其實我都無咁多嘢諗嘅。

      萬一我有D咩冬瓜豆腐,要將xx交俾姨丈姨媽,呢個諗法其實我老公一路都知亦支持,但最近醒起如果我哋一齊出事,我就要靠老公家人幫忙處理,所以都要同佢哋交代聲。

      刪除
  2. 好彩我有個女,不過近呢幾年開始我都唔會買啲無謂嘢,就算自己鍾意,當我瓜柴,我個女都係幫我丟晒佢,既然咁浪費,仲要麻煩個女,索性唔好買,學妳話齋又帶唔走

    回覆刪除
    回覆
    1. 我都支持妳嘅諗法,我自己都係無儲嘢嘅習慣。我99近年都好似妳咁諗,買少D將來就掉少D。好在妳有個寶貝女,有D身外物未必一定值錢,但對妳可能有特别意思,留俾個女,佢都會珍惜,但比着其他人就未必明白。

      刪除
  3. 我同你一樣,無兒無女...川老爺年紀亦比我大好多... 但係.. 讀完呢篇...我先發現我地無唸過呢樣野...汗
    係喎...咁自己又點算呢?
    我無咩資產,但明白你講仲有D野...
    如果親人之中無人選的話,志願團體你點睇?譬如你而家比較關心的社會問題,到時幫助嗰D人?

    回覆刪除
    回覆
    1. 如果無諗過,咁可能係好事嚟喎,證明妳同川老爺嘅至親都健在嘛!:)

      如果家中長輩早走過我倆嘅話,我都無乜所謂架,只要係捐比有需要嘅人就好,我只係要交帶萬一自己走先過長輩,希望可以留少少心意俾佢哋。:)

      刪除
  4. 做咩咁感觸呀突然間,比你嚇親!
    我記得你有個家姐同佢都有小朋友,比佢地應該係最佳選擇呀。 咁mr dolphin 有無sibling 呀?

    回覆刪除
    回覆
    1. 無事無事,我只係想提早交代好,以防自己突然出事,咁身邊嘅人都知我嘅意願,代我對我着緊嘅人送上最後一份心意啫!:)

      Mr. Dolphin有一個家姐,都係無小朋友。至於我家姐佢哋,真係乜嘢都不缺,但我媽留低嘅,都應該係交俾佢架啦!

      刪除
  5. 真的錢財身外物, 其實點處理都無咩所謂, 較傾向支持ceci的講法

    但妳的分享都提醒左我, 都係立定平安紙安心D呢

    回覆刪除
    回覆
    1. 若果到我離開嗰刻,長輩都走哂嘅話,其實我都無乜大所謂嘅,都係以防自己似阿媽走得突然,所以要早點準備。

      其實係架,同埋有無平安紙都最好將戶口呀,屋呀等財產嘅ownership設定為joint with right of surviorship又或者係喺投資、保險等加上受益人,以防萬一呢!

      刪除
  6. 我首先會預早安排比D野兄弟姊妹,我死左就唔使花錢買山地,曬落海就得喇。又無需為我做甚麼儀式,更無謂我買花圈之類,因為生前對我好,我會知,死左先對我好,我唔知,所以千萬唔好做埋D無謂野。我今年都特別交帶多一次比家人知。但最重要就是把我的organs donate

    回覆刪除
    回覆
    1. 我都交帶咗個女,我都唔需要做咩儀式,無謂嘥呢啲錢

      刪除
    2. "生前對我好,我會知,死左先對我好,我唔知"-->Samwei呢個諗法真係好有意思,我好同意呀,但自私嘅我有一點私心,若果我走先嘅話,我希望喺我在生時愛惜我嘅人會將對我嘅好投放喺我老公到,我怕佢會太寂寞呀!^^"

      刪除
    3. 至於儀式,我都無咩所謂,新婚時我成日摧老公快D去買山地(我係認真架!),因為當時我驚萬一有呢日時會六神無主,唔知點算。來到呢刻,我總覺得我會走先過我老公,咁既然我都無眼睇咯,是但佢啦!

      刪除
  7. Time for me to set up a will.

    Ever since the kids were born, I have never flown alone with my husband. I actually don't like to drive with my husband in the same car either.

    Why don't you leave everything to your sister and her children?

    回覆刪除
    回覆
    1. 最緊要記得bank accounts, matrimonial home等都係joint with right of survivorship,其他investments/insurance都安排好beneficairy! :)

      我以前都有聽人講過唔會一家一齊飛,但我可能會情願一齊走,好過留低一個孤零零。

      老實講,我所擁有嘅對家姐嚟講真係微不足道之餘仲好大機會被睇唔起(認真的),但我媽留低嘅都應該會交俾佢。以前,我哋將阿媽嘅嘢分咗一人一份,將來又在合拼返一齊。人生啊!

      刪除
  8. 我同妳情況一樣啦,瓜柴後都唔知俾邊個,又唔想益老公個邊,阿媽、阿妹個邊仲有米過我,想捐俾有社會有需要人士仲好
    哈哈,點解叫做新奇士橙家庭呀?

    回覆刪除
    回覆
    1. 好一句"仲有米過我"...完全係咁,所以都會好似妳話齋,捐俾有需要嘅人更好,除非我突然有事,咁就梗係想留俾姨丈姨媽啦!

      哈哈,咪即係"hum"家橙囉! XD

      刪除
  9. 嗯....早排,我媽咪突然同我交待佢的物品及金錢,我媽咪其實已經年紀好大了,七十幾,不過之前第一次聽佢講時,個心覺得好不安....之後佢隔左一排,佢又同我交待佢D基金轉名,其實每次聽,我個心都好不安...彷彿好似唔知點咁,好驚...
    唉,突然覺得人生過得好快、好快....

    回覆刪除
    回覆
    1. 早年第一次聽6299交代呢D事,我個心都係唔太舒服,好在老公同佢家姐醒目,輕輕鬆鬆咁打完場。近年因為99母親及兄長都相繼離去,所以99又緊張起來,仲開始積極清理屋企。^^"

      依家如果99想講,我都會聽佢講下,最主要俾佢講出嚟後會安心D,但當然聽自己阿媽講,真係特别難受,但我估最緊要俾佢知自己有留心記住,等佢唔駛心掛掛。:)

      刪除
  10. 婚前買既保險通通都係寫爸爸, 婚後AGENT 問我要唔要改受益人, 我SAY NO
    如果我有咩事, 我最少2份保險都會比錢我屋企人~
    我都鍾意捐晒D 野出去, 用得就用啦, 反正都係燒!
    我都同我老公講左是旦包一包我就燒左算啦, 唔使洗錢..反正都無用!
    DUM 晒落海就OK架LA...雖然我D 同事笑我唔識SWIM, 哈哈!!!!

    回覆刪除
    回覆
    1. 果然係孝順女,結咗婚都仲咁緊張爸爸!:)

      哈哈,妳嘅諗法同Mr. Dolphin真係不謀而合,佢又係話駛乜o徙錢搞咁多嘢吖,求其揾張蓆卷埋佢就得啦!

      妳D同事又幾搞笑喎,我突然諗起小時候契媽話火葬唔知會唔會痛一樣咁有趣!XD

      刪除
  11. 回覆
    1. 車媽媽最近忙於照顧車車,就算有時間都想抖下啦!:)

      刪除