2016年2月17日星期三

西曆新年。由港式食到西式

由去年十一月尾斷斷續續寫“游”記至今,終於把“游”記寫完了(掌聲鼓勵~~~),是時候把blog的焦點搬回海豚兒在多倫多無無聊聊的日常生活了。之前一篇雜記寫到去年除夕,這篇當然是由2016年的第一天來個開始吧!

新一年的第一餐當然亦不能夠太刻薄自己啦!這天Mr. Dolphin就專程開四十分鐘車陪海豚兒來嘆杯港式奶茶和吃個菠蘿油咯!一場來到,兩個人多叫一點食物來開心些牙也是常識吧,這兒的蛋治和麥皮也不錯,Mr. Dolphin亦把米粉升級為在家吃不到的出前一丁來吃。對!海豚家一向沒有買出前一丁等即食麵習慣的,家中最多的就只有生麵和日式拉麵。^^"





逛到黄昏時份,我倆就去吃頓下午茶當晚餐,這次就輪到海豚兒食公仔麵,Mr. Dolphin就吃了焗茄汁魚意粉--->忘了是什麼魚,反正都是雪藏魚就是了;P,然後再各自點了杯甜咗DD的凍飲就解決了晚餐。




1月2號是星期六,這天Mr. Dolphin和海豚兒去了逛西人商場,發現遠近馳名出名不好吃的Jamie's Italian已在多倫多開業,雖然如此,海豚兒還是好奇想試試啊!

 


侍應姐姐是日推介了牛扒、豬扒、及魚給我倆,可惜這些食物也不太對我倆當天的胃口,凍冰冰的日子,我倆還是想食澱粉質類食物如意粉多一點。落單時,侍應姐姐面有難色地“温馨提示”我倆因為意粉的配料是海鮮,而海鮮吸收了大量鹽份(?!),所以我倆挑的意粉都會偏咸。。。只可惜那時候心意已決真的不想改點其他,心中也暗駡為何她作出是日推介時不説,要等我倆下了決定才説呢。^^"




結果嘛,意粉何止是偏咸,簡直是咸到苦,多吃分分鐘腎炎。吃着吃着方發現鄰桌食客跟經理的對話,大概是他們之前投訴意粉過咸,所以經理把意粉的收費取消等意思,怪不得侍應姐姐之前知道我倆要吃意粉的反應這麼古怪啦!



吃罷這餐,海豚兒只能説他們的薯條(chips)真的好好吃,而意粉則咸得海豚兒連甜品也沒有勇氣試。當然憑這店子的“名氣”,相信依然會有許多食客慕名而來的,唯有希望店方已把調味問題處理好吧!

20 則留言:

  1. 天氣凍的確最想食澱粉質, 但個解釋真係好牽強.... ^_^"
    相比之下香港的Jamie's italian真係算唔錯啦!

    回覆刪除
    回覆
    1. 唔牽強~呢排我都好食得飯下hehe~

      刪除
    2. 真係唔好講笑,呢排食多咗澱粉質,即刻心廣體胖咗!;P

      唔知係咪香港飲食業競爭大,要求自然高D,所以餐廳水準都有保證D呢!

      刪除
    3. 最牽强嘅解釋係嗰兩兜咸到苦嘅意粉,唔知個厨係咪好似做戲咁將糖當鹽落呢!;P

      刪除
  2. Jamie's 已經比我入左黑名單,又貴又唔好食

    回覆刪除
    回覆
    1. 老實講,就算我未去過多倫多分店,我去英國玩都唔會試Jamie's,依家更加肯定就算去到英國唔知食乜,都情願簡單食份fish and chips好過!

      刪除
  3. That's totally unacceptable about the salty dishes! You should have complained too!

    回覆刪除
    回覆
    1. 如果個侍應姐姐無喺落單時“温馨提示”我哋嘅話,我都應該會出聲,但一來佢有提,二來到我哋食嘅時候,連侍應姐姐都換埋人(落班?),我哋都無出聲就算啦!

      刪除
  4. 你新年第一日算食得少喎,平時可能食四五餐!

    意粉太咸?好困惑...... 意粉啲粉同海鮮料唔係每叫一碟煮一碟咩?之前一碟咸點解一定之後又咸?...海鮮吸收了大量鹽份(?!),所以我倆挑的意粉都會偏咸.... 咁唔make sense,你有無當場反駁佢"咁全世界都唔會食海鮮料嘅意粉啦?癡鬼線,我遇到呢啲咁無里頭嘅說話一定唔會放過。

    回覆刪除
    回覆
    1. 第一日臨出門口前同返到屋企後,喺屋企都已經食咗唔少香港帶返嚟嘅甜品零食。:D

      聽到侍應姐姐嘅解釋,我個心都係咁諗,覺得佢擺明耍我哋,但無出聲啦,一來碟粉唔係佢煮,二來喺“忍”到嘅情況下,我多數都選擇唔駁嘴,避免影响心情,因為自己脾氣唔好,聽佢再用廢話解釋,我一定會同佢提早開年。

      刪除
  5. 回覆
    1. 係啦,嗰個咸同難食法簡直係唔識煮嘅都煮得好過佢。>_<

      刪除
  6. 恭喜恭喜、恭喜妳終於完成長篇大論的遊記啦:p
    原來多倫多都有有水準的港式茶記喎,妳份三文治睇落都有牛記既水準喎
    香港間Jamie都係麻麻

    回覆刪除
    回覆
    1. 多謝妳呢!不過我寫完“游”記之後都懶咗更新,嘻嘻!

      呢間水準算唔差架,我哋嚟咗呢度咁多年都係成日幫襯佢,而呢度除咗蛋治似牛記連有時D員工態度都似架!XD

      唔緊要吖,香港咁多選擇,唔去呢間都仲有大把正餐廳可以去呢!

      刪除
  7. 下?? 但係意大利餐廳,點意粉係正常。。。太咸... 可能出左問題呢... 失望...

    回覆刪除
    回覆
    1. 我嘅諗法同妳一樣,一心以為喺意大利餐廳食意粉係穩陣之選,點知...唉!早知係咁,我就食“麥皮撈當歸”好過啦,哈哈,唔知妳知唔知我up乜呢!;P

      刪除
  8. 咁佢地都好好啊,會CANCEL番意粉個價。
    海豚兒,你地有冇叫佢地CANCEL 意粉個錢啊?
    不過睇張相,碟意粉好似好靚好好味,嘻....^^"""

    回覆刪除
    回覆
    1. 我哋無出聲呀,感覺上覺得侍應姐姐喺落單嗰刻“温馨提示”咗我哋,但我哋都無食哂嗰兩份意粉呀,真係頂唔順呀!

      意粉個賣相係ok架,意粉嘅軟硬度都可以接受,但味道就...真係有十個劣啦!

      刪除
  9. 香港開左咁耐我都未去試過呀, hahahaa

    好難得呀, 全日都無甜品呀 :p

    回覆刪除
    回覆
    1. 咁妳會唔會去試下香港下嗰間呀?;P

      妳好細心呢!其實我嗰兩日無論出門前或回家後,都有喺屋企食之前旅行帶返嚟嘅甜品架!哈哈,甜品喎,真係一日都不能少呢!

      刪除