2016年3月28日星期一

一週"食"事。再試Tsujiri

時間真係過得好快,唔覺唔覺又過咗一個禮拜啦!

上星期和同事外出時,呢位同事係意大利人,佢鍾意晨早隊杯expresso,為表誠意,海豚兒就叫咗杯少甜嘅熱古力陪下佢。結果嘛,熱古力嘅賣相同味道同樣都“橙”不忍暏!^^"



到午飯時,同事帶海豚兒幫襯一間類似快餐店形式嘅意大利餐廳,有意粉有三文治食,由於同事已經好熟呢度,佢一行入店內已經即刻叫嘢食,海豚兒為咗唔想同事等到天荒地老,唯有二仔底死跟,叫咗一份闊過海豚兒塊面嘅牛仔肉三文治食。其實份三文治味道真係唔錯架,但海豚兒真係食得太趕,基本上同事食完一整份,海豚兒至完成半份三文治咋,横掂食唔哂,海豚兒索性將剩落嚟嗰半份打包做晚餐。環顧四週,呢間貌似飯堂嘅意式快餐店應該都幾正宗,除咗海豚兒,店內客人全都是白人,甚至可能全都係意大利人!;P




記得之前海豚兒提過日式甜品店Tsujiri嗎?海豚兒貪得意又再試另一款新地,今次雪糕嘅綠茶味出好多,而且同上嘅一小件蛋糕亦都好好味,整體都比上次好食好多呢!



來到復活節長週末,海豚兒同Mr. Dolphin喺Good Friday又去咗市中心揾食啦!首先係Mr. Dolphin陪海豚兒食甜品早餐,這兒的甜點真的不錯,今次加點了三件迷你三文治,umm...牛角包三文治就幾好味,其餘兩款就一般啦,好在後加嘅迷你蘋果批都幾好味啫,但馬卡龍又係麻麻地。




滿足完海豚兒嘅甜品需要之後,當然又係指定動作陪Mr. Dolphin去佢最like嘅拉麵店食佢最like嘅蕃茄湯帶子拉麵啦!



到晚飯時候,我倆因為想食chopped scallops sushi(碎帶子加飛魚子撈沙律醬軍艦壽司)而去幫襯某壽司店,因為多倫多唔係太多壽司舖有呢款壽司食,而喺呢間係有食開呢款嘅,結果放喺我哋面前嘅係不倫不類嘅spicy scallops sushi(碎帶子配辣醬撈沙律醬軍艦壽司)。同店方反影,回話係呢批壽司師父係新請返嚟,佢哋跟本唔知咩係chopped scallops sushi (汗!)。當下諗唔起應該要彈嗰五粒錯版軍艦鐘,硬食完先呻笨,笨呀!



唉!食完就算啦,但當然無下次啦!到星期六,海豚兒同Mr. Dolphin去唐人商場嘅food court食早餐。


 


再做D正經事之後就去買雞蛋仔食下,呢間喺“老番”朗豪坊樓上嘅雞蛋仔又真係整得幾好食,下次再試下其他味先!

22 則留言:

  1. 綠茶雪糕應該唔錯呢...
    晨早食甜點...我可能都唔得 (笑)
    講開又講, 海豚兒喜歡食... 但鍾唔鍾意自己動手煮呢? 好似好少見你在家開飯...外國的廚房,簡直係我嘅夢想...

    回覆刪除
    回覆
    1. 呢杯真係幾好味,尤其係加埋件暖暖地嘅蛋糕嚟食!

      其實我反而覺得晨早食甜係“清清地”,無食肉咁heavy,哈哈!

      除咗每星期烚熟D瓜菜做晩餐,我喺屋企都甚少煮食,只怪厨藝太差勁啦(汗)!但呢度D厨房又確係比亞洲嘅有“規模”嘅!;P

      刪除
  2. 蕃茄湯帶子拉麵一睇就知好味 ^0^
    我次次食蕃茄湯底的麵,成日都忍唔住飲晒D湯去,嘻嘻 =)

    回覆刪除
    回覆
    1. 呢個真係Mr. Dolphin嘅all time favorite,所以我都專登叫埋同一款,咁我食剩,都有人“樂意”幫我執手尾!;P

      我哋都有飲湯呀,不過飲完始終有D頸喝,所以我都唔敢飲太多呢!

      刪除
  3. 你個邊好多選擇, 我呢度就.....
    中餐呢, 難食到無朋友, 日本野, 就係超市個D sushi, 睇見都唔想食 T-T

    回覆刪除
    回覆
    1. 歡迎妳!:)

      我明妳意思呢,基本上要食就要自己動手,好在妳有一身好厨藝,中西菜都無難度!俾着我住妳嗰度,我就大檸樂啦,亦令我諗起,以前我喺燒味餐廳做PT時,久唔時都俾同事笑我唔識煮,將來最好嫁個厨!;P

      刪除
  4. 回覆
    1. 嘻嘻!加埋妳嘅支持,我直頭想加句口號“唔食無罪,彈鐘有理”添呀!我食完呢餐無咩事,但Mr. Dolphin個肚就到第二日都仲忍忍作痛呀,陰公!:(

      刪除
  5. Yeah, 今次Tsujiri有返應有水準!
    碎帶子配辣醬撈沙律醬軍艦壽司真係好怪呀, 又會咁都得o既....

    回覆刪除
    回覆
    1. 係呀,所以我都專登寫返出嚟,同埋件蛋糕暖暖地,真係幾滋味!

      其實平時嘅spicy scallops sushi都係用咁上下材料,但呢個嘛,連將D醬同碎帶子撈埋都懶,只係將篤醬倒落個軍艦上面,又真係求其咗D囉,何況我哋一開始都唔係叫呢款!^^"

      刪除
  6. 其實係咪我地要求太高,或者是選擇少?好多時食一次就無下次?

    回覆刪除
    回覆
    1. 忽發奇想,可能真係我哋要求高,無奶油期望食肆長期維持穩定水準!嘻嘻,講笑啫!

      我覺得好多時真係睇個厨有無心機煮,望到上面sushi張相,都真係好難説服自己“有下次”呢!^^"

      刪除
  7. 其實妳去唐人商塲遠唔遠﹖

    回覆刪除
    回覆
    1. 如果去食物較有水準嘅唐人地區就揸40分鐘車程到啦,如果要求唔太高嘅話,10分鐘之內嘅車程都有粥粉麵飯食嘅!

      刪除
  8. 杯熱朱古力...你唔講, 我以為係牛奶....哈哈!!!

    碎帶子配辣醬撈沙律醬軍艦壽司, 咁似淨海膽軍艦既....

    回覆刪除
    回覆
    1. D古力漿喺杯底,一攪完,個色水更怪,直頭好似洗完水彩筆兜水咁呀!;P

      又真係有D似喎!應該係因為個厨太求其,撈都唔撈下D食材,就咁將D醬倒喺sushi嘅面層,所以有呢個錯覺。

      刪除
  9. 個杯係朱古力?妳唔講我以為係鮮奶或好立克
    食左雞蛋仔咋,有妳至愛夾餅咩?

    回覆刪除
    回覆
    1. 嗰杯係未攪嘅古力,攪完之後就好似杯喺污水處理廠提鍊出嚟嘅精華咁!^^"

      依家好少食夾餅,一來呢度少有D,二來食雞蛋仔先有人“樂意”同我開心些牙嘛!

      刪除
  10. 看海豚兒的文章,已經像名人食評般豐富。睇左當食左。

    回覆刪除
    回覆
    1. 哈哈,太誇張啦,我邊有咁叻吖!我只係將當下印象以唔多流暢嘅文字記錄落嚟,將來睇返都可以提醒自己嘅生活點滴嘛!:)

      刪除
  11. 我經過一星期努力,食少咗,減咗3磅喇,你都努力啦。

    回覆刪除
    回覆
    1. 掌聲鼓勵~~~

      我週末時食完以上嘅食物其實減咗D架(汗!),但奈何今個星期有晚放工喺車站企成大半粒鐘至等到老公接放工,企到我又餓又攰,就忍唔住大開食戒,結果當然係瀬哂嘢啦!不過我都唔會放棄,會繼續盡最後努力嘅!

      刪除