2017年1月18日星期三

聖誕以後。新年未滿~續上年

很長的一篇,請各位頂硬上呀。。。

承上篇,這天(26號)海豚兒和Mr. Dolphin出城跟姐夫及B先生一家來個大飲茶。襯時間尚早,先替家姐買之前被姐夫一掃而空嘅幾塊豬肉乾,因而嚷著要試,順便答謝他們給我倆買來的手信。



這酒樓我倆還是第一次到訪呢,食物味道也不錯,只是感覺四週環境很“土豪”,眼看許多食客也點皇帝蟹、龍蝦、清蒸海上鮮等食物。海豚兒心想,晏仔都食呢d,晚餐食乜呢。^^”



飯後甜品則應姐夫要求去了查實海豚兒覺得麻麻地的店子吃雪糕,好處當然是這裡不用等位,你懂的。;P




晚飯就分道揚鑣,B先生帶他的大女跟海豚兒的姨甥女去看演唱會,另外兩個小孩就跟B太太留在家中吃薄餅及打機。然後海豚兒和Mr. Dolphin就陪姐夫家姐外出吃越式晚餐,而其實這店子在夏天時,海豚兒也有介紹過,不過今次水準就真的不及上次,所以姐夫家姐也沒有吃得太滿足。



晚飯後,我倆再齋陪他們去吃豆腐花,然後再買外賣一個例牌份量腰果露加湯丸回家吃,就送他們回B先生的家啦!要説他們真的能吃,竟然在晚飯後還能吃下這麼多,食力相多厲害呀!

跟住嗰日係補假(27號),我倆就跟住大隊去食午餐。見面前,海豚兒和Mr. Dolphin先去打個靚底。



來到漁樂軒,除咗套餐,我地只加了兩碟小菜和一碟伊麵。由於我地張枱靠近收銀處,B先生及B太太聽到因為我地張單太細酒樓無肉食,負責落單嗰位哥仔被佢上司責怪唔成功搞大d張單。^^"



其實這店子在海鮮烹調上的確很好,但海豚兒和Mr. Dolphin早在幾年前已不喜歡再來,正正因為這兒的推銷手法及態度關系啦!





飯後陪他們買滑板俾細路玩sir滑梯(查實係sir積雪後嘅小山丘)用,從遠處觀他們sir滑梯一輪後,我倆就“放工”去食二人前晚餐啦,因為他們一行八人亦要準備去看魔術表演。至於海豚兒就因為之後兩天還要上班,所以早就決定不參與是晚活動咯!在沒想太多的情況下,我倆這晚覆桌了台式餐廳,要説他們的蚵仔煎超級好吃,燒仙草、蕨餅也不俗,但炸雞排就很麻麻啦!




兩天後(29號),海豚兒一下班便跟家姐聯絡上,除了B太太在家中看守大本營,他們一行人去了滑雪場未回程,真的辛苦了B先生連續兩日陪4個小孩滑雪,而體貼的Mr. Dolphin就陪海豚兒去逛商場揼波鐘,行到餓餓地,我倆就去買了兩件好味甜品醫肚。



這晚我們十人去了烚下烚下,款式沒有太多驚喜,味道就屬於不過不失啦。



飯後B先生和B太太就帶小朋友回家梳洗,我倆就負責陪姐夫家姐再訪家姐主動要求覆卓他們之前去過的同一間台式餐廳食宵夜,可惜這晚挑的食物除了吐司不錯外,其他的芒果乜乜乜都只是普通過普通。



去到30號,海豚兒早在幾個月前就特意請假送機,不過事與願違,我倆的送機資格被DQ了,仲搞到海豚兒同Mr. Dolphin因為咁而嘈咗幾句。還好我倆最後也能自動調節,用最好的心情來渡過這天突如其來的“假期”。而對海豚兒而言,能夠令心情更好的調劑品當然是去嘆番個靚甜品早餐啦。



好戲在後頭,晚上還得到小學同學邀請我倆到他們家中享受窩心住家飯補慶聖誕節,這對帶著三個孩子的朋友願意花上這樣的心機和時間為我們弄聖誕大餐,單是這份心意已夠甜蜜溫馨啦。:)



順帶一提,今年海豚兒亦大有進步,這夜沒有像去年一樣因著一些沒辦法改變的人和事令自己失眠或難受。新的一年放馬過來吧!

21 則留言:

  1. Too many comments ...

    * 負責落單嗰位哥仔被佢上司責怪唔成功搞大d張單 <--- $200+ wasn't enough?!
    * 今年海豚兒亦大有進步,這夜沒有像去年一樣因著一些沒辦法改變的人和事令自己失眠或難受 <--- something happened last October, and I am still been on and off upset about it. Sigh...
    * Was Mr. Dolphin tired from all these gatherings?

    回覆刪除
    回覆
    1. 按人頭計,餐廳咪覺得我地只叫一個4人餐叫得少,但我地有4個細路,加上我嘴唇上生咗粒大cold sore亦無乜食力,最後仲要打包添呀。

      唉!年紀越大就越多改變唔到而又無法解決嘅事發生,無論十月時發生咩事都好,只希望妳每次諗起件事時就算更難過,最後也會諗返d好處或笑位氹番下自己,一於溝淡佢。;P

      Mr. Dolphin知道我被DQ唔開心,所以勸我再搵佢地傾下同安排下可以點樣配合同送機,但當我打電話去時,家姐連電話都唔願同我講,仲將個電話pass去姐夫度,等姐夫推我,咁我咪更唔爽,怪番Mr. Dolphin轉頭囉!

      刪除
  2. 咁樣比客聽到,呢D就係有意咁做啦。我都唔會再幫襯。

    回覆刪除
    回覆
    1. 我又諗唔到原來係有心俾我地聽喎,不過真係too bad啦,我地都唔會再加單亦唔會因為咁而覺難為情,但有得㨂,我都唔想再去囉!

      刪除
  3. 依家溫哥華多倫多好多做華人生意嘅食肆都係咁架喇,淨係想做大陸土豪生意,飲早茶都要蒸條魚食龍蝦開支酒...... 好多舊移民都負擔唔起咁樣食法(講真亦無咁嘅必要),由得佢哋啦,等佢哋個個未到四五十就三高再洗錢睇醫生啦。

    回覆刪除
    回覆
    1. 其實睇見佢地,我有時覺得好有香港人九十年代移民嘅影子,只係更豪、更浮誇。查實佢地三高甚至有病,我都有份suffer架,因為我地係全民保險,我份糧都有份供架!;P

      刪除
  4. 講說話比客聽,即係趕客啦,啲客仲點會返轉頭

    回覆刪除
    回覆
    1. 就係為咗令人聽到,平價客唔會再嚟啲檯就可留俾土豪。

      刪除
    2. 喺我寫呢篇時,我同仔仔媽諗法係一樣架,係睇到Ceci同Samwei咁講,我至明原來句説話係講俾我地聽,但唔明都唔緊要吖,反正我都唔會主動要求去呢度開餐,嘻嘻!

      刪除
  5. 我都好怕呢D行銷手法, 老闆其實明唔明咁樣係唔會留得住D客
    點解俾人DQ? 或者姐姐唔想麻煩你地啫

    回覆刪除
    回覆
    1. 睇咗Samwei同Ceci嘅留言,就晃然大悟,原來我地係阻住咗張枱。^^”

      我都好想係妳咁講嘅原因,不過,有d野過咗去就算,諗嚟都無謂。

      刪除
  6. 小小不快好快忘記,只留下甜蜜回憶
    好快就係CNY啦,新一年一定會更加好!

    回覆刪除
    回覆
    1. 對,對於自我調節,我都算訓練有素,何況今次都無上次情況咁壞,豈碼有Mr. Dolphin陪我一齊頂,所以我都情願記住d開心事!

      對呀,仲有少於一星期就CNY,呢個時候出門旅行小朋友就最興奮,要玩得開心d呀!

      刪除
  7. 嘩,小學同學好勁呀,有個小朋友都整到野食,100個叻 ^^

    回覆刪除
    回覆
    1. 我都覺佢地超勁呀,仲要佢地本身無長輩或姐姐幫忙,平時照顧3個小朋友已夠忙,難得仲肯抽空為我地預備大餐,真係sweet爆!

      刪除
  8. 三個孩子的朋友願意花上這樣的心機和時間為我們弄聖誕大餐,單是這份心意已夠甜蜜溫馨啦。:) ==> 講得好啱呀!!

    回覆刪除
    回覆
    1. 係呀,所以我一定要寫出嚟,要記住朋友待我真的好!:)

      刪除
  9. 加油呀海豚兒...肥人都學會咩都唔好理, 淨係向前望..哈哈!!
    衝呀~~~~~
    年尾有咁豐富既節目呀, 其實都幾好呀~
    好過肥人無人約, 日日都對住老公... :P

    回覆刪除
    回覆
    1. 想講樣無聊野,向前望真係好緊要架,我試過黃昏時向前行因為怕曬就揾件褸擋住塊面然後叫Mr. Dolphin幫我睇路>>呢個係我地成日玩嘅遊戲,結果嗰次佢行行下發呆無留意到環境,我成隻手撞咗落燈柱,仲俾佢惡人先告狀話我唔睇路。XD

      有時候,兩口子靜靜過生活仲寫意自在呢!

      刪除
  10. 回覆
    1. 多謝車媽媽!大家都要努力為懂得愛惜自己的人而好好生活!:)

      刪除