2018年2月21日星期三

香港。神京阪 ~ Day 11 在港過平安夜

是日平安夜,全靠Mr. Dolphin抵得諗將所有探親(拜山)事宜安排在之前一日進行,海豚兒和Mr. Dolphin才有這天額外得來的自由日。

本打算去樂天皇朝嘆碗久違了的美味喇沙作午餐,去到餐廳門外看餐牌時方發現喇沙已不在餐牌內T_T,於是就改去時代廣場搵食。心急的海豚兒查實一心想食西餐,眼見食fusion菜式的Greenhouse剛開門就去幫襯



可味道不太理想(有看見雞翼上飛揚中的雞毛嗎?),唉,早知就等多一陣樓上另一間真正西餐廳開門啦,還好,這餐沒有點甜品,免得再浪費quota。




之後Mr. Dolphin就陪海豚兒扮遊客坐叮叮去中環,途經鵝頸橋,當然要影番張相留念啦,最搞笑係,隔咁遠都聽到檔主用拖鞋打到“撻撻聲”來招攬生意。XD




可能是平安夜加上星期日關系吧,中環真係坐滿菲律賓姐姐呀!海豚兒能夠影到下面張無人頭相都算難得啦!^^”



一場來到,當然要去文華東方酒店的餅店嘆返幾件美味西餅啦,到現時唯止,這兒的西餅依然是我倆的最愛,滿意滿意。:)



食完西餅就返銅鑼灣去大坑嗰頭行下,因為我倆都未黎過嘛咪想八卦下囉,但可能因為下午關系,幾條街都好靜下。



跟住我倆就行返去銅鑼灣,不過呢頭真係好多人,成條天橋都坐滿印尼姐姐^^”,我倆無無聊咁四圍行,連書局都去埋,見到有本數學教材,就問下Mr. Dolphin仲記唔記得啲數點做。。。結果就係當一個無聊老婆遇上一個認真老公,無聊老婆問條無聊問題,個老公就好認真咁睇咗幾頁然後滿意地點頭加認真地答識做啦。XD



行到無野好行就提早去食晚飯,近近地就喺HesheEat開餐,還好第一次幫襯嘅Mr. Dolphin都表示滿意。:)





話哂今次選擇聖誕回港都係想陪n年未喺香港過聖誕嘅Mr. Dolphin體驗下嘛,吃飽飽後,我倆就鼓起最大的勇氣去尖東走一轉啦。






行完、逼完加影完一大輪相,我倆就去海港城逛下順便食件甜品抖下。。。不過Dalloyau件opera cake對海豚兒來說有點過甜,但唔緊要啦,都係志在過下口癮啫。題外話,靚女服務生非常友善,見到佢忙到踼哂腳地工作都保持笑容,真難得啊!其實海豚兒真心替她辛苦呀,大節流流,一個人真係忙到頭都大埋。



食完甜品,我倆就逼下逼下咁逼返去地鐵站坐地鐵返酒店啦。就這樣,海豚兒和Mr. Dolphin首次一起在港渡過了平安夜咯。

22 則留言:

  1. 我都好想聖誕去尖東同人逼呀!好有中學生時代嘅感覺!

    回覆刪除
    回覆
    1. 我未離開香港前只同過屋企人去尖東睇燈飾咋,嗰陣屋企管得好嚴,記得連家姐去中五謝師宴船河都係爸媽帶埋我去碼頭接返家姐返屋企,諗起都覺娘呀,哈哈!

      刪除
    2. 噢,真慘,我從小到大都無curfew的,好難想像!

      刪除
    3. 相反,從小到大都慣咗被管住,到無人管嘅初期,仲有少少唔慣,哈哈。^^”

      刪除
  2. 雖然部分食物未如理想+超級多人,不過兩口子一齊過節點都開心!:)

    回覆刪除
    回覆
    1. 呢日食物真係好壞參半,不過一去到MO我就即刻諗起妳啦,我仲記得妳話過呢度熱古力好飲,所以專登叫主子試下。:)

      刪除
  3. 好老實, 而家啲聖誕燈飾真係麻麻

    回覆刪除
    回覆
    1. 好聽啲講咪環保囉,啲燈飾好似同廿幾、三十年前都差不多咁!XD

      刪除
  4. 你在文華東方酒店喝了什麼熱飲? 我見到好像是粉紅色的.

    回覆刪除
    回覆
    1. 應該係燈光影響咋,左面有拉花嗰杯係decafe latte,右面嗰杯係熱古力,唔係咩特色野,不過嗰度嘅甜點同飲品都好啱我地口味。:)

      刪除
  5. 你兩個就sweet sweet 啦,你陪佢 xxx,佢又陪你yyy,羨慕呢!

    回覆刪除
    回覆
    1. 多謝妳呢!

      Mr. Dolphin個人好心歸,其實就算叫佢假期喺屋企足不出戶,佢都好享受,唔似我地,咁鍾意四圍走。

      刪除
  6. 您哋返到香港都係食西餐多

    回覆刪除
    回覆
    1. 其實我覺得呢幾日已經食咗好多中餐、亞洲野食啦,已經遠超出我嘅能力範圍,呢朝早,仲因為之前嗰晚嘅食物多油咗啲,我個肚唔係咁C服添呀^^” 。查實,我鍾意食西餐、茶餐多過中餐。

      刪除
  7. HesheEat鹹甜都不俗,認真識揀$

    回覆刪除
    回覆
    1. 係呀,我都係咁話,所以今次返黎我都專登帶主子去下Hesheeat食返餐。搞笑嘅係我地去到時未夠6pm,食客仲食緊下午茶而我地已經開波食晚飯啦!

      刪除
  8. 肥人祝海豚兒新年快樂呀, 身體健康, 狗年行大運, 恭喜恭喜!

    Dalloyau既CAKE 海豚兒覺得甜呀?
    咁肥人可以唔使試啦!
    題外話: 肥人係海港城返工呢..haaaa

    回覆刪除
    回覆
    1. 多謝妳,新年快樂!!

      我喺Dalloyau試咗最基本嘅opera cake覺得甜咗啲,但之前睇blog友甜魔媽媽個blog,佢試過cognac味嘅opera cake,又好似好食啲,不過我本身怕甜@_@!...(我都知有啲難以置信),所以太甜嘅甜品我一向麻麻。

      嘩,原來我曾經同妳公司這麼近,咁我下次返黎不如約妳喺嗰頭食lunch吖!

      刪除
    2. 肥人都怕甜, 跟你搵食就最岩啦~

      好呀, 下次返黎搵我呀~

      刪除
    3. 好吖,雖然今年返唔到黎,下次返香港約妳lunch! :)

      刪除
  9. We used to live in NT, but we went out to 尖東 every year for Christmas lights.

    回覆刪除
    回覆
    1. 我都係住新界架,以前都係每年去尖東行街、加睇燈飾,嗰個年代,尖沙咀仲有東急、伊勢丹同三越,最開心就係去行呢啲百貨公司嘅超市熟食部同玩具部。:)

      刪除