2018年5月1日星期二

這天再重聚

從前也說過嘛,年紀越大越覺認識能交心的朋友不容易,一來不再像兒時般敢愛敢恨,二來感情從來是雙方面,一隻手掌拍唔響,加上生活在北美,要有機會深入認識同聲同氣又啱嘴型嘅朋友,就更加要講緣份。

海豚兒從不是那種出口成文的文人,亦不見得文筆特別風趣幽默,上班以外的時候,除了諗下食咩好就係得閒諗下無聊遊戲同整蠱下Mr. Dolphin玩,其餘時候腦袋多是空白一片。告訴你一個小秘密,海豚兒有個怪習慣,在Yahoo blog及初用Blogspot時,一般是把人家的blog文全看過一遍才慢慢開始留言,感覺上自己留言時好像已和對方成為朋友一段日子,而其實對方當時都不知道自己是乜水,哈哈!XD 不過這樣做,至少令自己更投入亦更有親切感。


拉遠了!這篇想說的很簡單但不代表不重要。早前跟朋友重聚見面,談了許多近況,這是一位用心待人的朋友,海豚兒深信朋友一定會一天活得比一天幸福。



感激朋友這麼有心,還記得海豚兒喜歡吃這個,嘻嘻,拍照前,其實海豚兒已忍不住偷吃了一包啦!



相隔兩星期,海豚兒和這位朋友及另一位朋友再相約見面,能和朋友們暢談一個下午,確係爽,我們仨要好好保持聯絡!

26 則留言:

  1. 我知你倆都很熱情的朋友。特別同你在 blog接觸多,知你用心睇每個blog 友的blog,真心回應。人大左,交朋友的動力都弱左,哈哈,我成日覺得,朋友唔洗多,有幾個知心就夠喇。

    回覆刪除
    回覆
    1. 謝謝妳嘅鼓勵呢,Samwei! 我時常覺得blog友們寫blog唔係必然,所以我想用留言多謝佢地肯喺blog分享生活逸事同感想。

      人大左,交朋友的動力都弱左>>>呢句好中呀,就係咁!

      刪除
  2. 回覆
    1. Yeah! Give me 5!!原來大家都有呢舖好似睇小說咁,由頭睇到落尾嘅癮,咁妳一定好明有時花好長時間追哂個blog後,突然間有啲唔慣嘅感覺啦,嘻嘻!

      刪除
  3. 好開心經網上認識妳呀!
    點解妳話自己唔風趣幽默,好多時睇妳blog都會卡一聲笑出來呢
    仲有每一次收到妳用心的留言,都會覺得好sweet好溫暖~

    回覆刪除
    回覆
    1. 我都係呀,想當年Mr. Dolphin去咗非洲工作,妳個blog不知陪伴咗我幾耐呀!

      其實呢,令妳卡一聲笑出黎笨唔係因為我文字上嘅風趣幽默而係我行為上嘅騎呢(尖沙咀站喪跑一幕又重現眼前),哈哈,每次諗起呢件事,我都會忍唔住笑!

      多謝妳呀!同妳之間真係有太多難忘片段啦!^3^

      刪除
    2. 點會呢?一諗起個幕邊可能只係卡一聲笑呢,絕對係笑到標眼水啦!!!! XD

      刪除
    3. 我仲記得我當時好驚比妳追到,一路跑一路好似儍婆咁亂講一通>>嘗試靠把口擊退妳,然後見到其餘blog友好無奈咁無住我地,哈哈!

      刪除
  4. 可能我都寫咗十年,所以大部份我會睇/留言嘅blog,都係從一開始睇,不過依家Blogspot無咁方便,我無搵新blog睇lu,可能有新嘅好blog都唔知。香港人都好似少寫咗,依家潮流唔一樣掛,係我哋呢啲老土怪繼續。

    回覆刪除
    回覆
    1. 十年時間真係好長,能夠堅持一啲都唔容易,更難得嘅係妳blog內容好廣範,仲越寫越多新意,娘啲講,我真係獲益良多架!我時常覺得blog友之中,我同妳算係日常生活中最少有機會認識,因為實在無乜common ground,所以我好珍惜可以喺網上認識到妳!

      係呀,有好多以前好活躍嘅blog友都因為不同原因無再寫blog,還好有些較熟嘅blog友仲可以靠Facebook同WhatsApp聯絡到。:)

      刪除
    2. 你唔好話你,我基本上同任何blog友喺日常生活都無乜機會認識....年紀大,唔煮飯,無細路,無食記,住嘅地方奇奇怪怪,性格更加唔駛講....哈哈。

      刪除
    3. 撇開其他,我覺得會愛惜小動物嘅人,人品性格一定唔會差得去邊。最大機會同妳認識而又唔計防彈迷,可能係有另一個熱愛韓遊嘅獨行俠blogger同妳喺旅途上遇上啦,哈哈!

      刪除
    4. 我知有好多台灣轉寫去韓國自遊行嘅blog,香港比較少見,是新blog友嗎?

      刪除
    5. 唔好意思令你誤會咗,我只係見有啲一向有寫blog嘅港人都會做獨行俠去旅行所以聯想到。^^”

      刪除
  5. 朋友唔駛多, 搵到啲可以明白自己就夠喇 (其實都幾難架)

    回覆刪除
    回覆
    1. 年紀越大經歷得背叛、出賣越多,真係越難攞個心出黎交朋結友。我都認同朋友唔駛多...就好似我和春天有個約會女主角嗰句“人生得一知己死而無憾,何況我有三個咁多”,眼淺嘅我,每次睇到呢段都會忍唔住眼濕濕。^^”

      刪除
  6. 我們未見面已是老朋友了!

    回覆刪除
    回覆
    1. 同車媽媽嘅認識直情係緣份的天空啦,猶記得當年經常見喺Yan, Oli個blog見到羅家私房菜,真係引C人呀!多謝妳當年聽我數落葉,諗起我都仲覺得唔好意思呀!

      刪除
  7. 我都係呀,都會睇下前文後理先會留言,有時見到d 野係同blog友仔有關,又會想起佢地,雖然未見過,不過真係有如朋友一樣呢 ^^

    回覆刪除
    回覆
    1. 係呀係呀,開始留言前,若果知道前文後理會明白對方寫嘅野多啲,同埋一開始梗有啲野吸引自己至會開始追某個blog,追到咁上下就忍都忍唔住,好自然會想搭嘴架啦,友誼就係咁培養出黎。

      我之前都可能同妳提過,舊年平安夜我喺尖沙咀睇燈飾時,都有四圍望,希望可以見到妳同3K架!

      刪除
  8. 其餘時候腦袋多是空白一片 <--- that's a blessing! I have been extra busy at work, and I am beyond exhausted most of the time.

    The wasabi version of the peas are very good too!

    回覆刪除
    回覆
    1. 我記得妳提過妳好似係做STEM有關嘅工作,咁仲好高機會係project based工種,嗰種壓力真係大到發夢都諗住,好辛苦,妳要好好保重呀!

      Wasabi同black pepper味我都鍾意,靜靜雞話妳知,我食原味時都會攞屋企嘅black pepper喪落包豆到至食架。

      刪除
  9. 肥人呢..而家都好少交新朋友啦, 人大左學會了小心講野...
    不過同肥人熟左會覺得我好煩架應該...因為我好多野講架...hahahaaaaaaaa

    回覆刪除
    回覆
    1. 對呀,人大咗(又碰過幾次釘後)顧慮多咗,亦學會保護自己多啲,講野都真係會小心咗。

      我覺blog友大都係好吹得,咁至好,至少同朋友見面時無冷場!

      刪除
  10. 雖然唔識你, 但我都係同你一樣會從頭開始睇~哈哈

    回覆刪除
    回覆
    1. 歡迎同多謝妳留言呀:)!原來我地都一樣鍾意從頭睇起,一篇一篇睇落去,感覺好似陪住blog友成長咁,見到大家遇上開心事會替對方高興,知道blog友發生問題又會為對方而擔心、難過。

      刪除