2016年5月16日星期一

何故。何苦。何必

時間:咸豐年前的的一餐家常晚飯
人物:海豚兒父親,海豚兒,繼母,繼母女兒
地點:他們三人的家中

故事:獨居的海豚兒回父親家中吃晚飯,這夜,海豚兒父親跟海豚兒説由下個月開始,他不會再為海豚兒支付學費和生活費,“輸人唔輸陣”的海豚兒只輕輕説了句"知道了,吃飯時就别再談這些好嗎?" 當然,海豚兒父親為了將這事情合理化(?!),他還是喋喋不休的説下去,大意就是有能力,又怎會不供海豚兒讀書等等。也許海豚兒天資愚笨,讀書成績不佳,但眼見海豚兒父親當時仍有多於一個物業,繼母和繼女的生活也不曾因為海豚兒父親的“能力”下跌而被影響,相信再蠢也不會不明白這是“父親的決擇”!
~~~~~~~~~~~~~~~~~~~~~~~~~~~~~~~~~~~~~~~~~~

人生嘛,總是在跌跌撞撞中成長,海豚兒每次回望過去也很為自己感到驕傲自豪。除了學生貸款,海豚兒不曾欠過信用卡數更沒有向親戚或朋友討過一毛錢,更值得感恩是能在大學生涯結束前認識到對海豚兒寵愛有加的Mr. Dolphin,生活就是充滿著滿滿的幸福呢!

寫下這篇,實在是很想吐一口悶氣。經過這麽多年,海豚兒父親還是喜歡到處跟人説海豚兒連電話都不打給他。每隔一段日子,海豚兒就會有親友從五湖四海打電話來問候,順帶温馨提示或訓示海豚兒當打電話給父親向他問好。

這事情又在剛過去的週末發生鳥。海豚兒父親跟人家説了多少“真相”,海豚兒不打算在這裡討論,反正海豚兒從來不走討人同情或惹人憐愛的路線,極其量是惹人犯罪,就是説賣相和嘴臉也只令人想打鑊金那種犯罪, wakaka! 總之,新年一通電話,父親節一張咭和不定時加一點心意,每次回温哥華跟他吃一頓飯加一點心意,就是海豚兒更不情願也試着堅持做的,暫時來説,真的不能再多,連多一通電話海豚兒也無法付出。

海豚兒只想在自己這片小天地發兩句嘮囌。

父親,你在咸豐年前已經在新家庭及女兒當中選擇了前者,人不能擁有全世界,更不能在你無聊時想有人同情關心便胡説一通,企圖把事實抹掉,然後上演一幕父慈女孝。近年你的兩個女兒亦因為你這導火線而關係變緊張,夠了麼?可以停下來了麼?

海豚兒不會天真得以為各位也認同海豚兒,但剛過去這週末為了應付親友,海豚兒已經心力交瘁,尤幸有Mr. Dophin和友好撐住,若果想跟海豚兒説甚麼將來别後悔或千錯萬錯都是父親的説法,真的不必!海豚兒把這些年聽過的加起來應該可以出版成一本書,硬頸如海豚兒,沒轍,更何況,"子非魚(海豚),焉知魚(海豚)之樂也"!

特别鳴謝Mr. Dolphin一炮雙響,為海豚兒設下兩餐解慰酒,包括週六晚的好好味晚餐和週日的好好味甜品早餐,生活還是過得很快樂啊!:)



22 則留言:

  1. 非常明白支持海豚兒!
    對於家庭我都有過非常不快的經歷, 無獨有偶事件都係大學時代發生, 現時每次諗起仍然忍唔住傷心...
    不過每次都勉勵自己, 事件會令自己更獨立堅強, 總之我地都過得安好, 又懂得珍愛真正關心自己的人, 就足夠了!

    回覆刪除
    回覆
    1. 謝謝Yan!嗰種傷心真係連諗起都唔想因為依然會難過嘛!我知道大家都係努力、正面去面對問題嘅人,某程度上我都慶幸問題喺大學年代發生,豈碼自己有多DD能力去應付同解決困難!:)

      同妳一樣,焦點都係放喺愛我、我愛嘅人身上,時刻提醒自己唔好喺困局入面浪費寳貴光陰,何況青春有限嘛,得閒嘅話,我不如去練跑,等妳下次追唔到我。;P

      刪除
  2. Sorry you have to go through this :(

    I admire you for even trying to have a relationship. If I were you, there wouldn't be any relationships. You should be super proud of yourself for turning out just fine without his financial help!

    回覆刪除
    回覆
    1. 無言感激!:)

      真係唔好講笑,以前仲洗緊父親錢,俾佢喪鬧都仲要當無事嘅訓練真係日子有功,相對地,依家就算同佢面對面,只要唔想答佢嘅題問例如我嘅cell phone plan係幾錢、層樓又幾錢*,都可以ignore佢,講真已經覺得好鬼爽!XD

      *佢係嗰D鍾意憑你日常費用去back calculate返你份人工嘅人,然後仲會將佢諗嘅當真,再週圍當事實咁同人講嘅人嚟架,所以,真係細微到連請佢食飯,佢問番條魚幾錢,我都唔會話佢知架!上次喺温哥華同佢食完飯後,我同老公都見到佢偷望我哋揸咩車,真係唔好玩啦,喺多倫多飛返嚟,唔通將架車寄艙咩,梗係揸老公屋企人架車啦,佢自己同我62飲茶都坐過n次啦!

      刪除
  3. 這裡是海豚兒的天地,當然寫什麼、分享什麼、嘮囌什麼也是可以的,也謝謝海豚兒的真誠記錄和分享喔:)
    哎,聽左都覺得好怕,我都好驚呢D,唔係真嘅野,傳傳下好以變成真咁....@@""""

    回覆刪除
    回覆
    1. 謝謝妳的鼓勵!:)

      其實經過多年訓練,我已經習慣哂佢喺所有佢識嘅人面前講我諸多不是,依家唯一最怕就係佢成日同我62亂講嘢,奈何我同老公亦唔可以阻止佢同62做好朋友,佢哋好啱key,仲每個月都會出嚟見面架!^^"

      刪除
  4. 容許我喺呢度講粗口嗎?唉,唔理咁多,講咗先算。

    癡L線,最Q憎啲唔關事嘅人喺人哋家事上插嘴。我知道你個例子插嘴嘅可能都係好親嘅人,甚至係你成長時照顧過你嘅人,但係父親你嘅,承受呢段關係嘅一切都係你自己,即使你家姐,佢嘅遭遇,佢嘅感覺都可能好唔同。無人有資格同你講你應該點同你父親相處。我二家姐同我老豆都試過叫我問候我阿媽,我即時恨恨地拒絕。我知道你無我咁臭串,唔會同佢哋反面,你都應付咗咁多年,祝你好運。

    真係好唔明,做父母又唔駛先考牌,點解呢個世界咁多人認為捐粒精子,懷胎9個月就例牌要感激要孝順?我個人最討厭嘅節日就係母親節。上次去溫哥華探我家姐,佢經其他途徑知道,我大家姐因為阿媽嘅毒舌攪到抑鬱要睇醫生,我即刻媽媽聲乜粗口都講齊!我大家姐超孝順善良,佢就愈蝦愈欺負佢。我返到美國同我老公講時,好老實話:雖然我唔會咒佢,但如果有朝一日佢唔喺度我都唔會傷心。千祈唔好同我講乜嘢第二時後悔,有啲人一世人都係壞人係自私係受害人妄想症到老到死都唔會改,周圍其他嘅人要繼續縱容嘅話唔好預我。

    回覆刪除
    回覆
    1. 哈哈!句粗口又唔係話我,梗係無問題啦!:)

      妳提及嘅照顧過我嘅人(好在無姨丈份,佢真係最鍚我!)同我家姐嗰兩點都超到肉。而我當然無妳咁堅會反面啦,以前就求其應下,而家就企硬講明只會按慣例打,無多無少。

      妳大家姐真係超慘,我記得妳blog以前都提過佢嘅事,佢年紀都唔細仲會被阿媽影响到咁,證明佢真係好着緊家人,妳媽有個咁顧家咁生性嘅女都唔知足,仲要傷害自己個女,妳媽真係幾爆!我爸可能都係有被害妄想症,咁多年都係咁講到自己好慘博同情。我其實都慣咗佢四圍唱我,包括喺我62面前,但今次搞埋我老公仲牽連埋佢屋企,就真係好過份囉。好在我同老公嘅關係都唔會被佢影响到咋。

      刪除
  5. 自己屋企人無得恨無得憎,有時只怪天呀,why me,不過呻完就算,人永遠要向前看, with no regrets 就得喇。A quote to share with you today: ''I love life. I wish I could live another 500 years, truly. There is so much to do. I don't feel bitter or angry or disappointed. If anything, I am very grateful for where I come from. I have absolutely no regrets.'' say it LOUD!!!!!!!

    回覆刪除
    回覆
    1. Thanks so much for the quote and your encouragement!其實我道行都幾高架啦,好多年前已經連why"not"me都問埋!咁多年我都尤得佢,最多都係有時會替自己難過,直至近年搞到我家姐同我又有D嘢,今次仲影响埋老公就真係好想呻下囉!呻完出嚟又真係C服好多!:)

      刪除
  6. 睇個標題,我以為妳想唱黎明首歌tim,因為佢呢期好hit
    唉,妳當個uncle發up風啦,點都好,我都永遠撐妳的!!!
    原來妳個條10oz rib都唔細喎,睇落好長咁

    回覆刪除
    回覆
    1. 哈哈!標題真係歌名嚟架,不過首歌唔係阿明而係彭家麗嘅!咁妳有應該嘆住白咖啡睇呢篇呢! ;P

      多謝妳支持我呀!可以喺呢度呻下仲要有咁多人聽(睇)我廢噏,我已經自我感覺非常良好啦,嘻嘻!

      其實我覺得條ribs真係唔算大,唔通係我化悲憤為食量所以鏟得哂,不過食完之後,我都無quota食甜品就真嘅。

      刪除
  7. 得罪都要講句,我覺得你爸爸根本唔多適合做人爸爸,唔好為啲唔值得嘅人唔開心,撐你!!!!

    回覆刪除
    回覆
    1. 多謝妳呢!

      唔得罪,好明顯喺老父心目中,我就係最得罪佢嗰個啦,咩法寳都出盡都無辨法令我打多個電話俾佢。我記得佢以前成日話喺非洲做工時,佢一話要炒個員工,嗰個員工就即時跪低“lam”佢隻鞋嚟求佢,所以我覺得佢習慣咗喺工作上話哂時,日常生活都想用番同一套,結果就瀬哂嘢囉!放心,我食完兩餐解慰酒,心情已經輕鬆返哂啦!:)

      刪除
  8. 多得他才會有現在獨立,自信的海豚兒,這樣想將傷痛減至最低,展望妳往後精彩美滿的人生吧!!

    回覆刪除
    回覆
    1. 多謝Maggie!我會繼續努力嘅!咁多年嚟好感恩身邊一直有好多好朋友嘅支持,亦好幸運地喺blog到識到妳哋呢班好blog友,大家都一齊為未來努力吖!:)

      刪除
  9. 大家各有各生活唔得架咩?
    家家有本難唸的經呢~
    我覺得就算係父母都好, 你點對我我就點對番你架啦!

    回覆刪除
    回覆
    1. 我都係咁覺得!佢明明已經揀咗,而於我嚟講,就好似被公司裁員咁裁咗出嚟,無奶油要我當無事咁去返工嘛!

      其實可以試可以做嘅我以前都有試過、做過,但真係唔work,我依家只希望可以做到"相處淡然",唔想有太多起伏。

      刪除
  10. 看完你的BLOG及BLOG友回覆, 我發現不只我媽有問題及自私, 原來世上真有很多這樣的父母存在.我和母親緣份很疏離,加上她由細到大被寵壞, 刁蠻任性不在講,永遠活在自己世界裏. 我爸走後,因我是獨女.她說不你要病, 因你病了,無人能照顧我.當她和我吵架時, 我被她激到頭暈, 我告訴她, 不想和她嘈,她竟說你暈,不關我事,是你自己問題,真的令人很傷心.加人上我由細到大,她都妒忌我和爸爸的超好關係, 她已認定我是对她差,我做什麼亦不能改變這想法. 我是矛盾的, 真的不知怎樣才對, 又怕後悔, 亦怕失去了我自己的生活,總之家家有本難唸的經.

    回覆刪除
    回覆
    1. 妳的難處的確比我多,至少我跟老父已不用相處太多,當然,以前我都試過許多方法嘗試拉近和父親的關係,但每次都只會令自己更難受,我想妳也一直經歷着這些吧!可能妳媽受到成長環境影响,習慣了被人縱,覺得妳爸對她的愛被妳分薄了,所以她總覺得妳好像有責任償還給她。無論如何,我相信妳會找到怎樣的方式跟她相處才是最合適。若果叫妳不要太在意她的説話也不容易,但有些結如果暫時解不開,也要學懂左耳入右耳出,不要困在那些難聽説話裡打轉,加油呀!

      刪除
  11. 收到及明白.其實大家分開住,可能好些.但他又無能力照顧自己, 因已被寵壞了,很多東西都不懂.但為了自己沒有讓他搞到我痴線,我要努力要學懂左耳入右耳出,謝謝你鼓勵.

    回覆刪除
    回覆
    1. 無問題,幾時都支持妳!除咗照顧家人外,妳都要好好保重自己呀!:)

      刪除