2016年9月25日星期日

屋漏兼逢連夜"乜"

是咁的,臨出發去SF前,海豚兒和Mr. Dolphin間房有條喉失禁(漏水),滴到牆身濕濕地兼有水漬,大廈員工初時以為條喉只係標下冷汗(流倒汗水)不以為然,直至我倆再三投訴情況惡化,大廈員工才揾水喉佬嚟睇下咩事。水喉佬嚟到就同塊牆身開個窿做咗個小手術,然後放低兩部風乾機吹返乾牆身同地毯,奈何風乾機鼻寒太大,嘈到我倆要搬出房瞓被Mr. Dolphin稱之為bouncy castle嘅吹氣床直至我倆去了SF。



點知,在我倆“游”山玩水之時,條喉嘅失禁情況進一步惡化,呢個時候水喉佬方發現之前斷錯症,原來問題比想像中嚴重許多,唉!


長話短説,當海豚兒和Mr. Dolphin去完SF返嚟諗住分工合作,Mr. Dolphin留喺屋企吸麈執拾之前水喉佬留低嘅蘇州C,海豚兒就去超市補倉之時,一心諗住搞掂就可以抖抖,突然海豚兒喺超市到收到Mr. Dolphin從家中厠所傳來的照片。海豚兒心諗,唔係咁大鑊呀,從相片中可見,d水有色架喎,唔通真係屋漏兼逢連夜“尿”咁义大煲?! 好在,後來看更證實係樓上換洗衣機搞到大水浸,漏埋d生銹水落嚟我哋個單位到啫。^^”



解說,照片內嘅籃係洗衫籃專放衣服並唔係用嚟裝水嘅。海豚兒驚唔講清楚會比人以為Mr. Dolphin攞個筲箕去裝水咁幽默嘛。;P

呢兩檀嘢都係上兩星期前至搞掂咋,好彩嘅係證實到兩單嘢都唔關我哋事,所以維修費用唔駛我哋負責,唔好彩嘅係大廈提供嘅裝修佬手工差到阿媽都唔認得,叫佢嚟咗幾次執錯漏,執極都係仲有問題,結果我哋都終於放棄。依家Mr. Dolphin每晚行返埋床經過重舖嗰一撻地毯位,都會因為新舊underlay(地毯墊底)厚薄不一又鋪得唔平而忍唔住唱返句“又越過高山,又越過谷”。

遲d啦,我哋會自己科水再揾個可靠裝修師傳執返d手尾,不過暫時都要做住忍者小靈精先架啦!

22 則留言:

  1. 想問下, 你地可唔可以問對方賠款架?

    回覆刪除
    回覆
    1. 我呢個情況就所有賠償都應該要通過大廈,好似樓上換洗衣機滴濕E埋我地,大廈揾人整完會同樓上收錢,如果要現兜兜咁收錢,就要先揾裝修師傳打價,雙方同意後先可以整,後者好處係可以揾可靠嘅裝修師傳但就無前者咁方便,由打價、維修到俾錢我地都唔駛在場。

      刪除
  2. 回覆
    1. 係呀,其實去SF時都有擔心過情況會唔會惡化,好在依家都叫做有驚無險咋。

      刪除
  3. 最怕、超怕整依D... > <
    希望快D搞掂埋手尾啦!

    回覆刪除
    回覆
    1. 係呀,最驚遇著個無底深潭,越搞越煩,好在依家除咗手工差d外,都叫做埋咗尾咋。^^”

      刪除
  4. 我個 living room 都有漏水,等左三個月個裝修師傅都未比到時間我。不過今日我已經投訴左,希望呢兩個有回應。

    回覆刪除
    回覆
    1. 已經3個月就真係唔可以再等啦,最怕拖得太耐搞到牆身發mold就麻煩啦,希望裝修師傳已經聯絡咗妳啦!

      刪除
  5. 漏水都真係最令人討厭嘅家居問題,因為永遠唔知究竟有幾大件事。我哋隔離同再隔離兩間屋,前排就因為中間牆身入面漏咗做防水層,其中一個屋主又唔喺度住,攪到有mold出到牆外好大件事,要拆牆去mold再建翻度牆好鬼誇張。

    回覆刪除
    回覆
    1. 無錯,因為漏水呢個問題可以變成好嚴重,好似我地咁,共7個單位受牽連,而非常榮幸地,我地個單位係重災區亦解釋到點解我地係首先發現嘅戶主,而我地又唔係呢7個單位中最高/低嗰個,好在發現得快,希望唔會有mold啦!

      刪除
  6. 執錯漏,聽到都覺得好煩呀....><""
    「做忍者小靈精」哈哈,好攪笑呀....海豚兒你好可愛 ^^

    回覆刪除
    回覆
    1. 係呀,仲要執極都係錯,所以我地都放棄啦!^^”

      我代Mr. Dolphin多謝妳,因為佢比我忍得辛苦d!XD XD XD

      刪除
  7. 恭喜妳呀,捱左咁耐,終於整好啦,哈!

    回覆刪除
    回覆
    1. 係呀,終於整完啦,依家屋企無再沙塵滾滾,皮膚同氣管敏感都可以停下。

      刪除
  8. Insurance covers it? “又越過高山,又越過谷” <-- you guys are too funny!

    BTW, I have the exact same laundry basket as yours. Mine still has the sticker on it too. I have it since I was in college.

    回覆刪除
    回覆
    1. 因為今次唔係我地嘅錯所以大廈嘅保險包,相反,就會係我地自己嘅保險負責。

      哈哈,Mr. Dolphin依家每日都好勞力咁行嗰撻地,佢話希望快d行返平佢喎!

      咁橋嘅,呢個籃好用呀,又好揸手,我地都用咗15年啦,如果樓上漏嘅唔係生銹水,我地可能就要忍痛掉咗佢添啦!

      刪除
  9. 希望不要再有問題啦!忍者唔易做呀!

    回覆刪除
    回覆
    1. 我都希望啦,實不相瞞,今次已經唔係第一次發生同類型問題啦(汗)!

      刪除
  10. 我早排呀有差唔多咁既情況,簡直係惡夢……😵

    回覆刪除
    回覆
    1. 多謝你嘅留言啊!

      真係要握握手,因為大家都太明白當中嘅擔心同苦況啦,希望你嘅維修工程亦已完成,一勞永逸啦!

      刪除
  11. 我都好怕漏水, 好煩呢!
    之前肥人住果個屋廁所都漏水...搞到連燈都燒埋, 開唔到添呀!
    最後發現係樓上問題..但天花都落晒灰落黎, 又要等業主黎整又要聽佢EE哦哦...好煩呢~

    回覆刪除
    回覆
    1. 原來漏水真係對大家都好有共鳴,只要曾經經歷過都明白有幾可怕。

      自己樓固然肉赤,租客要承受問題仲要聽埋業主嘅“煩”音,真係雙重打擊呀!

      刪除