2016年11月8日星期二

箱根之旅。談溫泉酒店: 真奈邸箱根 ~ Day 2 下、 Day 3 上

上回提到,海豚兒和Mr. Dolphin在箱根湯本嘅手信街食加逛完就起程去溫泉酒店 ~ 真奈邸箱根 (Manatei Hakone)。



全靠TripAdvisor有心人的留言提醒,我倆在箱根湯本(Hakone - Yumoto)火車站附近轉乘十五分鐘巴士去到蛇骨野(Jakotsuno),酒店就在巴士站斜對面馬路向下山方向,這樣去比酒店官網介紹的轉數次火車的去法簡單得多,亦省下更多時間呢!



海豚兒和Mr. Dolphin真心喜歡這間溫泉酒店,對她實在是有讚無彈。當中原因包括:

~這是我倆喜歡的西式(洋式)模式的酒店。老實説,我倆也不大情願瞓塌塌米。^^”



~這兒員工的英文超棒,不懂日語的我倆也無需指手畫腳。

~由於我倆挑了套房型號房間,除了在房內有私家溫泉浸(***這點很重要,從前跟團去北海道玩,酒店只有共享溫泉,我倆也不太習慣啊!***),在酒店餐廳也有獨立房間享用二人前,無論是相機先食還是閒話家常,感覺也自在許多。



~這酒店的服務亦超讚,沒有甚麼可挑剔。老實説,這可是我倆自費住過單晚房價最貴的酒店@二人一房每晚53,000yen連稅,不過價格除了包括套房住宿連私人風呂,還有精緻的早及晚餐,所以我倆也真心覺得值回票價啦。



*當然,若果你/妳是更喜歡日式(和式)溫泉酒店,這區的選擇還滿多的,而跟據我倆這次的經驗,溫泉酒店一般在入住前六個月接受預訂,海豚兒挑的這間酒店在公開網站和酒店官網也可在更早前預訂日本人稱之為一泊兩食的住宿連早、晚餐。

我倆大概在二時半到來到酒店,距離check in三時正早了三十分鐘,但酒店方面也很大方讓我倆提早入住,更派員工帶我倆到房間作簡單介紹呢。

房間內亦有大致列明酒店的規則和用餐時間,海豚兒也把照片拍下來和大家分享。



這酒店有大概七間套房,我倆預先要求入住設於室內的Cypress Bath套房而非大眾喜歡的半露天風呂(semi open-air bath),原因嘛,我倆怕冷親的同時,,容易產生過敏反應的海豚兒亦怕和大自然太接近,所以這個套房浴室內的窗子能隨時關上實在令我倆比較安心。




在房間瘋狂拍照過後,海豚兒便馬上沐浴再以九秒九速度跳進溫泉裡梳乎梳乎咯。泡完這趟溫泉,真的大滿足呀,出發前怕不速之客搶閘來臨的憂慮也解決了。不過嘛。。。可能溫泉水實在讓海豚兒血氣太運行吧,泡過這次後,海豚兒就要把浸溫泉模式轉成足湯(浸腳)啦。^^”




浸過溫泉後,有人舒服得忍不住去眠一眠,到差不多用餐時間才起來陪海豚兒四圍逛下。




除了套房內的私人溫泉,及分男賓、女賓的公眾溫泉,酒店內亦有三間獨立溫泉浴室給住客使用。這三間浴室是無需預約,只要門沒鎖著,住客便可內進把門關上享受一小時的私人風呂,海豚兒也把其中兩間風呂的照片拍下來,因為拍照其間,剛巧有住客在享受第三間浴室呢!:)





來到約定時間,我倆走到餐廳便有操流利英語和服務貼心的員工帶領我倆到廂房用餐,充滿人情味的侍應在得知我倆是來慶祝結婚週年時,更為我倆送上兩杯飲品呢。



這個晚餐賣相精緻味道亦非常好,除此之外,Mr. Dolphin還很慷慨地讓海豚兒事先加點了龍蝦刺身(自費)呢,因為他對這味敏感,只吃了一小片試下,其他的都落到海豚兒肚中啦。查實呢,海豚兒亦有興趣試下這兒的牛扒,不過不想獨子快樂所以便沒有加點。意想不到的是這晚烚下烚下的主食竟然是黑毛和牛呢,嘴巴這晚實在太幸福咯!







回到房間,Mr. Dolphin浸溫泉的同時海豚兒也就足湯一番,然後就早早上床睡覺。

第二朝起來,大家也作出最後一浸,然後就到室外拍拍照。全靠Mr. Dolphin幫忙才能影到下面的照片呢,因為一走出室外就有大量蜘蛛網向我倆揮手,所以一瞓醒左眼已因為敏感而腫起來的海豚兒馬上淆底怪上身,不敢在室外四圍走,只乖乖的站著等Mr. Dolphin回來一起去吃早餐。




這酒店一般會提供日式(和式)早餐給客人享用,如果住兩晚以上,隔天的早餐就會換成西式(洋式),貪心的海豚兒在安排東京之旅時就跟酒店聯絡上,要求Cypress Bath的套房、為晚餐預訂龍蝦刺身、及早餐要一份日式加一份西式的選擇,好讓我倆多試不同食物之餘亦不用擔心吃不慣啊!而且廚子還很好的把之前一晚留下來的龍蝦頭為我倆多做兩碗麵豉湯,加了龍蝦頭的湯湯非常鮮美,真的好好喝啦!早餐除了酸到阿媽都唔認得嘅梅子,就只有日式早餐用豉油當salad dressing的沙律比較難接受^^",其他食物也好好吃。




酒店最後check out時間是上午十一時正,但我倆也沒有在酒店留守到最後一刻,因為想襯是日天氣好、陽光普照,在離開箱根前重“游”手信街並提早一點回程呢!

這個兩日一夜溫泉之旅真的好滿足,除了對酒店住宿、膳食、及服務也十分滿意外,從訂火車票、找路、由火車轉巴士到找酒店,甚至乎最後更改火車票提前離開箱根也非常順利,這一切都是值得感恩的!

下一篇將會回到這天餘下的行程。

18 則留言:

  1. 你令我想起個笑話, 話說同友人去日本, 酒店職員介紹間房, 友人叫佢講英文, 聽唔明, 對方即時打個突, 其實佢已綞邁緊英文呀, 我笑到肚痛

    回覆刪除
    回覆
    1. 類似嘅笑話我自己都試過,地點仲要係香港嘅便利店,人物就係店內嘅年青職員,佢陰聲細氣再加埋懶音,我一d都聽唔明佢講乜,唯有搵Mr. Dolphin幫我用廣東話翻譯佢嘅廣東話。:D

      刪除
  2. 回覆
    1. 係呀,因為我覺得訂溫泉酒店同平時訂歐美模式嘅酒店好唔同,我一開始時都有d無從入手嘅感覺,全靠不停睇reviews同睇溫泉酒店網頁介紹先知咩適合自己,所以想同大家開心些牙下。

      刪除
  3. 俾我揀我會揀有露天風呂,室內太焗會頭暈!而且我係露體狂,同人share都無問題。

    其實你兩個晚餐加早餐都要5萬Yen啦,唔係最貴住宿,係免費住宿就真。

    回覆刪除
    回覆
    1. 我地好驚旅行中途病咗嘅話會好無癮呀,所以焗焗地反而仲安心。^^”

      我鍾意妳呢個講法,將駛錢變得合理化,第時我想敗家,都要揾妳幫忙勸敗至得。

      刪除
  4. 回覆
    1. 真係好正嘅一個旅行體驗,可惜地堿距離太遠,否則我都想去多幾次呀!

      刪除
  5. 好正的酒店同房間,好幸福的溫泉之旅!
    好在都叫全身浸左一次,否則就太傷心啦!

    回覆刪除
    回覆
    1. 雖然呢間唔係一間5星級大酒店,但呢個溫泉旅程絕對係東京行嘅精華所在。

      係呀,真係好好彩可以全身浸到呢,如果唔係,可能又要辛苦Mr. Dolphin第時陪我再嚟多次啦!

      刪除
  6. 温泉旅館我都超級喜歡!享受沖涼,花一兩小時浸完再擦身體,原來比起趕什麼景點更幸福。
    以前我父母覚得幾萬円一晚好貴。後來佢地住過一次之後就知物有所值❤️

    回覆刪除
    回覆
    1. 呢次體驗真係好值得呀,可以慢慢浸,慢慢梳洗,而且有自己嘅風呂唔駛擔心會阻住其他人之餘又可以同伴侶一齊浸,感覺好自在。

      妳父母都欣賞就更好,證明佢地都肯接受新事物,咁同佢地去旅行又可以多一個共同喜好,真好!

      刪除
  7. 好正呀..肥人會揀私人露天黎浸~
    如果要去公共池肥人就唔敢啦...唔想比人睇更加唔想睇人..哈哈!!!!
    食物都好好好好好正呀...最緊要滿意呀!
    週年快樂~

    回覆刪除
    回覆
    1. 多謝妳啊!

      對呀!妳真係講中哂呀,我都唔好意思睇到人地,我覺得太多顧慮嘅話,我就唔會可以好relax咁享受浸溫泉啦,而且我嘅情況,都唔方便去大浴場呢!^^”

      d食物真係好正,絕對係喺北美食唔到嘅鮮美,最爽係有獨立房間用餐,相機先食都唔會惹人注目。

      刪除
  8. 好好醜醜浸咗次啦!好過我難得過澳門想去泳池游吓水都中正啦!

    回覆刪除
    回覆
    1. 唉呀,中正真係有d掃興,唔知妳會唔會呢,嗰個時候我通常會開胃d,所以我會將一切化為食量,搏命食。而向好方面諗,咁先有再去澳門嘅衝重嘛!:)

      刪除
  9. 嘩,好正呀,我都係喜歡套房內的私人溫泉,方便d,嘻嘻.....
    係呢,海豚兒其實有冇穿上比堅尼,在私人溫泉影靚相啊?
    我前幾年去冇咁做啊,,現在回想起來覺得好浪費美好時光....依家要減下肥先有勇氣咁做...嘻嘻....
    不過我見d 明星成日咁影,好靚呢 ^^

    回覆刪除
    回覆
    1. 係呀,情況同喺屋企一樣,都係有套房方便d嘅。

      我又無帶泳衣喎,一來無明確咁好身材,二來我可能三歲過後都未再著過比堅尼啦,嘻嘻!

      其實我覺得妳已經好fit,就算帶著3K出街,人地都估唔到妳係佢地媽媽呀!

      刪除