2016年11月22日星期二

海豚兒老點相公。東京 ~ Day 5

呢日好乖,海豚兒無一起身就搏命食,先去藥房幫海豚兒家姐買嘢>>>兩日以來,行咗八間藥房,終於喺第九間揾到佢要嘅東東,阿媽,我得咗啦~~~



之後就去Bic Camera隔下風筒價,後來發現都係Labi平d,就去咗Labi到買。



然後就返高島屋、Tokyu Hands買d嘢,再之後就去舊年想去但又無去到,喺高島屋樓上嘅餐廳食crepes啦!




見到個大廚先生成個法國人樣,海豚兒就滿心歡喜啦!原因嘛,其實好低B,只因為不懂法語的海豚兒一踏入餐廳就可以跟大廚先生講聲bonjour,哈哈!



海豚兒和Mr. Dolphin開心些牙了兩款一咸一甜嘅法式薄餅,再加兩杯cappuccino,全部都好好味呢!



吃飽飽後,海豚兒當然唔會放過用法文同大廚先生講聲多謝嘅機會啦,可憐白痴的海豚兒查實連再見嘅法文都未會講,哈哈!小聲説,其實每次海豚兒咁做時,都會令Mr. Dolphin超老尷架,佢平身就最怕俾人留意到,奈何佢老婆就成日都係咁癲下癲下!XD

之後就落番去返高島屋地庫行超市,買咗個綠茶布甸做宵夜之一,好好味呢!



再然後就去Newoman嘅Pierre Marcolini買兩小盒古古力返多倫多慢慢嘆。



寫到呢度,唐百虎怒點秋香之「海豚兒“老點”相公」又不定時上影啦!話説Mr. Dolphin好著緊每次俾錢都要盡量散走銀仔,慕求口袋裡連一個銀仔都無。所以喺揀選古古力時,海豚兒就好權威咁“溫馨提示”Mr. Dolphin幫忙㨂盒裝古古力配搭,例如要兩盒八片裝還是兩盒九片裝可以盡散d銀仔,於是Mr. Dolphin就提意海豚兒買兩盒九片裝古古力就最好啦!然後,海豚兒就跟order做事,同店員講要兩盒九片裝古古力,同埋要多一件馬卡龍吖,唔該~~~

當海豚兒準備同粒馬卡龍影相時,發現Mr. Dolphin站在後面搖頭苦笑,海豚兒仲不明所以咁問佢咩事。。。大佬,千算萬算都諗唔到個老婆咁陰濕,咁權威咁搞完一輪,會失驚無神買多件馬卡龍架,仲要係完全唔知有問題喎!更妙嘅係,海豚兒返到多倫多先知自己買錯古古力嘅款式、口味。^^”



笑完一輪,我倆就返酒店放低戰利品,然後出發往原宿啦。

其實本來無打算過去原宿架,但可能當時好想食牛又諗起blog友介紹過一間喺原宿專吃牛牛飯嘅餐廳好吸引,所以就去咗啦!



Blog友果然無介紹錯,呢間嘅牛丼真係超掂,價錢又唔貴,而且日本嘅米飯又確係特別好味,連平常咁唔嗅米氣嘅海豚兒都食咗大半碗。



食飽飽當然要四處逛啦,行到表參道,又梗係要去睇下玩具啦。



行到咁上下,發現有間牛奶雪糕店成個感覺都好似八月去SF時,海豚兒家姐帶我地去嗰間咁,當然要買番杯牛奶軟雪糕重溫那份滋味啦,呢杯雪糕同樣係超重奶味,好好食呀!



再行咗唔知幾耐後,我倆就返新宿酒店放低買俾小朋友嘅玩具,就再出發啦。

這晚行到有d攰但又唔係好餓,於是就決定去食魚生飯。



呢間魚生飯係跟據旅遊書介紹去嘅,味道都算新鮮,只是感覺有點兒孤寒,d餸都未能完全蓋過飯囉!



之後就繼續行街,又另外再買多件甜品返酒店食。呢件綠茶紅豆乜乜乜甜品真心難食呀,係呢個旅程中難吃之最呀,好在仲有朝早買落嘅好味綠茶布甸嚟溝下貨咋。;P



東京的第五天就這樣在吃吃笑笑的情況下渡過了。

16 則留言:

  1. 回覆
    1. 妳啱!我只不過訓練佢腦筋急轉彎之嘛!;P

      刪除
  2. Mr. Dolphin好著緊每次俾錢都要盡量散走銀仔 <--- When I was reading your last post I was wondering why you paid 1031 Yen for 476 Yen worth of sushi. That explains it!

    At least Mr. Dolphin was pretty understanding :)

    回覆刪除
    回覆
    1. 嘩!原來真係有人留意到架!

      我試過有次一個人喺SF機場等飛返TO,為咗唔好比佢笑我搞到成袋美金銀仔返加拿大,企喺food court拎住d銀仔續檔check價錢,睇下買d咩先可以散哂d銀仔,d人見我問完價又喺度數下d銀仔又唔係買,分分鐘以為我唔夠錢開餐。XD

      刪除
  3. 我見最後件綠茶乜乜咁靚,我又比較鍾意唔太甜嘅甜品,以為好食添....唉。

    Mr Dolphin應該by now知道任何有關計數銀碼嘅事都信你唔過就得架喇!

    回覆刪除
    回覆
    1. 同妳一樣,我都係俾件蛋糕嘅賣相誤導咗,件嘢係超甜。^^”

      哈哈,佢老早就知呢個係我嘅弱點,只係無諗過整乜我呢頭叫佢計完,嗰頭又order多樣嘢,仲要唔知有問題嘛!

      刪除
  4. 行咁多間藥房,真的要花時間,所以我去旅行,唔會應承幫人買野。

    回覆刪除
    回覆
    1. 其實喺加拿大住,我地一般都較少幫人買嘢帶入加國境,尤其貴重物品,因為入境時要declare,超額亦要打稅,不過,家姐買嘅唔係貴嘢之餘,我都無諗過咁難揾呢,好在最後都買到咋!

      刪除
  5. 我平時買嘢都好鍾意盡量散走銀仔

    回覆刪除
    回覆
    1. 我份人超心急所以甚少咁做架,成日好驚自己搞太耐阻住人。^^”

      刪除
  6. 笑死我,計好晒數之後買多件馬卡龍,買完之後係咪多咗好多散紙?! XD

    回覆刪除
    回覆
    1. 全中呀,套Mr. Dolphin嗰句“一袋係呀!”哈哈哈!

      而我...差d笑到喊呀!;P

      刪除
  7. 海豚兒同Mr. Dolphin 呢日行程好開心啊,「吃吃笑笑」就係旅行最希望得到啦 ^^

    回覆刪除
    回覆
    1. 我都覺得係呀,二人行共同製造嘅美好回憶絕對係priceless。我地平時無聊時都會講番n年前旅行嘅搞笑事又或者係回味下一d旅行時試過嘅好味食物,諗起都會好開心架!

      刪除
  8. 這便是率性的海豚兒可愛之處!

    回覆刪除
    回覆
    1. 多謝Maggie將我嘅缺點講到咁sweet呢!:) 但如果妳日日要對住我,可能就激到妳生蝦咁跳架啦!

      刪除