2017年3月21日星期二

超市做世界

上篇在“題外話”也提過嘛,海豚兒雙腳最近有些腫痛,應該是發炎了,雖然已經看了醫生兩次亦服過藥,但成個月都未好,行路就唯有就住就住啦。正因為這樣,海豚兒和Mr. Dolphin在剛過去的週末去超市買餸時,很多時也是靠Mr. Dolphin四圍騰去搜羅一週所需。

星期六去唐人超市入貨,超市內有許多許多人,行了一圈基本上也上齊貨,只差之前為免阻住員工在飲品雪櫃前執貨而未取的豆漿,為免兜翻轉頭要行多一大段路,於是海豚兒便按Mr. Dolphin指示,站在一旁好好看管食物籃等他回來咯!

這時侯有一位女士在海豚兒前後攝來攝去,正在研究一款鹵水墨魚片(!),情況就是逼上加逼啦。突然間又有另一個人在海豚兒後面快速經過,其間海豚兒感到背脊被輕碰了一下,心想海豚兒就只是站在熟食雪櫃旁,附近又沒有其他彎位或捷徑,怎麼這位帶cap帽的男士要趕住投胎般衝過海豚兒身邊。


等了又等,Mr. Dolphin好不容易等到員工執完貨,拿了豆漿再過來會合海豚兒,付錢後,我倆便把東西放到車尾箱。上車時,海豚兒下意式把一直打斜向背後"咩"的小手袋(就是之前在東京最後一天買的那個)從後面推向前方,摸上手時已感覺到小手袋單薄了,再看拉鍊是開的,慶幸電話仍在>>海豚兒不是沒有電話就不能活那種人,反正電話用了兩年多,到現在也只有天氣和whatsapp這兩個apps咁大把,怕的只是因此遺失了友人的聯絡和跟電話公司報失帶來的麻煩,於是再看一下小手袋就確定遺失了的是手袋裡的一個小袋>>袋中袋,非常有婆仔feel呀。XD

海豚兒第一個感覺是之前提到的那位女士和cap帽男士是同謀,原因嘛,“咁啱”他們差不多時間在海豚兒附近出現和碰撞過海豚兒,加上他們都不是亞洲人但又疑似是同種族,但Mr. Dolphin就是不相信,他認為不可能人家會不偷電話而偷一個化妝袋(汗!),於是他堅持是海豚兒大意把化妝袋從手袋裡跌了出來,更命令海豚兒在車上等他,好讓他再入超市地顫式搜索,可是他走遍超市兩回卻一無所獲。

老實講,除了Mr. Dolphin,又有誰會想到海豚兒的小手袋裡,沒有銀包、現金或鎖匙呢>>同老公出街,拖實d個老公咪得咯,洗鬼帶咁多野咩,嘻嘻!所以嘛,當疑似賊公賊婆做海豚兒世界時,見到個卡通公仔造型袋仔裝到脹卜卜咁以為執到寶,又點會估到自己所偷的只是一個化妝袋吖,而對海豚兒而言,除了可愛的卡通造型袋仔,袋裡頭有一塊在東京購買的小鏡子比較貴重外...貴重的並不是價值,而是買唔返,其他的就只有家裡多數有存貨的眼藥水、潤唇膏、樣版裝潤手霜、吸面油紙和兩塊膠布咁大把,難怪,之前在超市內準備行去付費時,疑似賊公又在海豚兒面前出現,繼續在人群中逼下逼下咁行,應該是他得逞後發現無肉食又再出動,只可惜當時海豚兒仍蒙在鼓裡,不曉得化妝袋已被偷了而已。^^”

平常海豚兒也不算太大意,不過這個小教訓正好提醒自己下個月底出門也要小心看管財物呢!:)

20 則留言:

  1. 算好彩啦,之後出門真係要小心呀

    回覆刪除
    回覆
    1. 係呀,經過呢次,近來幾日看管手袋嘅戒心都高咗。^^”

      刪除
  2. 回覆
    1. 多謝妳!我會努力d坐,等對腳休息多d!

      刪除
  3. 乜海豚先生咁衰唔信你架!如果知道係化妝袋緊係唔偷啦,不過多數以為係銀包啫。

    回覆刪除
    回覆
    1. 係啦~所以我當晚都有微言過佢。不過佢真係諗唔到人地當我嗰個係銀包咁天真囉!

      刪除
  4. 斜揹袋一定要放係身前,不過妳都算好彩,無唔見錢同證件

    回覆刪除
    回覆
    1. 其實我當時亦有因為知道手袋無銀包,所以戒心都低咗,亦無諗起人地唔知我個手袋會無銀包,所以照落手。^^”

      刪除
  5. 好彩冇偷到電話咋!小心小心

    回覆刪除
    回覆
    1. 無錯,唔見電話或者證件都幾頭痕,今次都算好彩啦!

      刪除
  6. 要快D 好番呀, 如果唔係下月出門又要就住就住, 見到甜品都行唔快去買呢~
    我都係咁架, 同老公出街, 拖住個老公就得啦, 使乜帶錢呀身份證呀等等呢...HAHAAA

    回覆刪除
    回覆
    1. 多謝妳呀!我都好想快啲好呢,近期因為腳痛,小行路/走動,月巴咗好多,唔快啲減下,到時除咗行唔郁亦無quota食甜品呢!

      係吖,咪就係咁囉,但我亦試過太大安旨意,企喺屋企門口但無屋企鎖匙,而當時係著住婚紗。XD

      刪除
  7. 不幸中的大幸!唔見電話/銀包真係會好麻煩。
    好好休息早日康復啦!

    回覆刪除
    回覆
    1. 仲有好彩我d證件係分開放,唔係放入化妝袋,尤其呢度嘅駕駛執照係有埋屋企地址,諗到都覺驚同煩。

      多謝妳呀,我都盡量行少啲,希望快啲好返啦!

      刪除
  8. Hope you feel better!

    I always misplace stuffs without anyone's "help."

    回覆刪除
    回覆
    1. Thanks so much!! :)

      咁樣唔見咗野都唔係壞事吖,至少有多個“原因”買過樣新野嘛,哈哈!

      刪除
  9. 睇完,我都覺得果兩個人係夾埋....
    一定係....
    我都試過去深圳比人開左背包,偷左化妝袋.....><"""

    回覆刪除
    回覆
    1. 一定係,除非唔係。XD

      咦,原來大家都咁“好彩”只係唔見咗化妝袋,真係算夠運啦!

      刪除
  10. 我估佢地偷包包唔偷手機係想直接要cash,好倡狂!佢地遲早上得山多終遇虎。

    回覆刪除
    回覆
    1. 我都覺得係,亦都好彩佢地真係無攞到部電話,唔係就煩啦!

      我最後悔係當時無入返超市同職員講叫佢地要小心嗰兩個疑似小偷拍擋。

      刪除