2017年8月22日星期二

八月的三連休

在多倫多,八月第一個週末是長週末,襯著這個三連休假期,海豚兒和Mr. Dolphin就在星期六去了市中心食好西咯。

雖然是星期六又是長週末,Mr. Dolphin上午亦回公司做了四小時加班我倆才出發呢,加上這天在市中心乘街車時又遇上好些阻滯,去到這間名叫Miku的日式餐廳已經是下午兩點啦,一來到我倆已急不及待快快點餐,因為海豚兒真的很餓呀,甚至餓到忘了影低店子名字呢。^^”

是日午餐包括廚師時令精選和壽司拼盤,兩者也不錯吃,如果不是兩款主菜中的壽司也出現好幾個相同選擇,要重覆吃著同一款壽司,感覺會更好些。



至於甜品心太軟和綠茶紅豆opera也很不錯就是啦。



或許這星期也在加班中渡過的Mr. Dolphin真的太辛苦吧,吃完這餐,逛了一會,Mr. Dolphin好快又自隊了一隻熱狗(沒有拍照啦),再過一會,我倆竟然又去了吃拉麵。哈哈,今次仲要係一人一碗樂趣多添。:D



就這樣,我倆在五小時內完成了這天的午飯和晚飯咯。XD

來到星期天,又是我倆一年一度的打蠟日,這天Mr. Dolphin花了共四小時幫車車打蠟,而海豚兒也幫忙抹內籠、座椅、玻璃等,辛勞了三小時海豚兒也鳴金收兵。這天真的累爆,回家後四肢無力,連上網也懶得,全晚只是呆在沙化上看影碟,還好仍有星期一可以休息多日咋。:)

換著是從前,海豚兒一定不甘於這樣地渡過長週末。或許是年紀大了吧,人也好像沒有年輕那麼心野,要chur到盡去玩足三日。

24 則留言:

  1. 你地食得清淡,少食多餐,好健康啦。自己幫車打蠟,真係會攪到成身汗⋯⋯

    回覆刪除
    回覆
    1. 最近我地都努力減磅中,不過都係未有咩起色。我去幫手打蠟都有希望襯體力勞動可以勞動走啲脂肪架,不過佢地真係好頑強,瀨C唔走,嘻嘻!

      刪除
  2. 回覆
    1. 襯長週末都想有少少節目,無咁悶嘛,而且東岸嘅夏天,真係一轉眼就過。

      刪除
  3. 我依家放三日長週末,三日都留喺屋企,最多可能出去食一餐晚飯。

    回覆刪除
    回覆
    1. 自從有咗自己屋企,我至習慣留喺屋企多咗,不過就算放假,都會至少出去一陣吸下新鮮空氣。以前租地方住可能覺得無乜privacy啦,講句説話大聲啲都驚人聽到,所以就會鍾意出街多啲。

      刪除
  4. 三連假真係好,妳地用左一日集中食,一日集中做野,一日集中休息,更好!

    回覆刪除
    回覆
    1. 哈哈,妳真係幫我summarize得好好呀,將我呢個長週末好簡單咁講咗出黎,點解我諗唔到嘅呢! ^^"

      刪除
  5. 感覺上你地好食得!我地都試過咁樣短短幾個鐘食幾樣野,好開心!我估Mr. Dolphin係愛車之人?佢落手自己做功夫所以我咁諗,我老公會自己換油,仲好enjoy咁。

    回覆刪除
    回覆
    1. 我地懶囉,唔想喺街磨爛蓆等到肚餓再去食晚飯又唔想返到屋企附近食啲平時成日食嘅野,所以咪短時間內食哂兩餐就算囉!

      Mr. Dolphin都唔算係愛車之人,不過佢好珍惜佢擁有嘅野,又唔想啲野咁快壞,所以會好好保養架車。我覺得Brandon就真係愛車啦,唔嫌麻煩同污穢自己換油,勁呀!

      刪除
    2. Mr. Dolphin好似我老爺老公兩仔爺咁,佢地都對架車好認真咁保養,我有時有啲唔好意思要Brandon錫少左架車,因為一年先揸返架車一次,又要去玩,好彩佢似乎唔介意咋。

      刪除
    3. 你地個情況又無辦法啦,始終回流咗返香港,唔會返得黎太密,不過既然Brandon決定得返香港生活,佢都應該有呢個心理準備嘅,係可能偶爾會掛住下架車同home town嘅人和事啫,話哂嗰度係佢成長嘅地方。:)

      刪除
    4. 其實一年返一次已經好好架喇!佢啲外藉朋友有左家庭都好少返家鄉。佢冇我咁麻煩,最多間中想食美式早餐,所以同佢去灣仔食返:)

      刪除
    5. 都係嘅,始終有咗家庭之後,出門真係多咗好多野要考慮。希望你地都可以keep住返家鄉,繼續享受呢個best of both worlds,而私心地,我都好希望無論喺美國定香港,我地都終有見面嘅機會吖!;)

      刪除
  6. 回覆
    1. 我只係無耐性等4+3個鐘,又誤以為做下苦力當減肥下至幫手啫,哈哈!XD

      刪除
  7. 唉,我都唔得...
    如果有三日假,我都要一日休息,唔係真係唔掂....
    唉,我終於明白咩叫「青春,真可愛青春....」><"""""嗚...................

    回覆刪除
    回覆
    1. 我真心地已經覺得妳好勁,有時一拖二出街,喺屋企仲可以一湊三,又可以同佢地一齊整下小食,俾著我陪一個小朋友玩一日都已經要抖兩日呢。

      刪除
  8. 是人大了更懂得享受生活吧!

    回覆刪除
    回覆
    1. 都係,後生時成日都好趕又唔知為乜咁趕,依家開始懂得慢活嘅樂趣,但當然,體力上都唔容許我好似後生時咁嘅。^^”

      刪除
  9. 回覆
    1. 多謝你呢!

      每次去市中心都好想食啲平時食唔到嘅野,所以有時都會搏哂命咁食,嘻嘻!

      刪除
  10. My daughter and I are homebodies. My husband and son can't stand staying at home.

    回覆刪除
    回覆
    1. 正所謂異性相吸,相信妳和丈夫都係咁所以更夾,難得仔女都各似一個,出街定留喺屋企都有伴,更好!唔知之前有冇提過,Mr. Dolphin一家4口嘅生日月份、星座同生肖都係一個連住一個,咁啱現實中,佢地關系都係好close,而且思想、價值觀都好近似,我覺得好難得,而且對我呢個“嫁”入去嘅人黎講,要明白佢一家都易啲。

      刪除