2018年1月12日星期五

香港。神京阪 ~ Day 3 可怕嘅的士司機叔叔

是日中午機由香港飛大阪,臨行前海豚兒和Mr. Dolphin先在Eaton對面的翠華嘆返個靚早餐。



等的士時可能冷親,海豚兒在車上忽然覺得沾寒沾凍都知瀨野,喺車上已穿上平常在加拿大0℃至-10℃才穿的較厚身羽絨,去到機場仲連頸巾都掛埋上頸,實行大包圍,但都仲見凍,就快快啪定打底藥,希望有好轉啦。

幾小時後,我倆就來到大阪機場。在票務站買(小飛俠咭)加換(網上預買的來回機場火車票)齊車票就搭火車去難波。






難波站南面出口距離我倆的酒店步程約12-14分鐘,但考慮到海豚兒近年不太能搬、推、拿重物,我倆早已決定打的去酒店。不幸地,我倆遇上一個兇惡嘅的士司機,當Mr. Dolphin還在車尾安頓行李之際,海豚兒一上車把預早準備好以日文字列出的酒店地址交給的士司機看,佢一睇完就係咁No Namba外加指手劃腳示意這兒是Namba的意思。其實當時海豚兒有點疑惑是這兒不容許在同區打的還是司機想拒載,因為我倆才第一次在日本坐的士而之前兩次遊日經驗也令我倆覺得日本人的客服做得非常好,沒想過會遇上這樣的惡司機。

或者你會問咁都仲唔落車,唔驚個司機車咗我倆去邊咩? 當下海豚兒想到Mr. Dolphin才辛苦地將行李安頓好,又一直被司機鬧,真的顧不了這麼多,情急之下忍不住説了“police”這個英文字。説到這裡,海豚兒想説在香港打的查實都有遇過一上車就媽媽聲嘅的士司機,但海豚兒都無諗過要講“車我去最近嘅差館”黎大啲司機,因為自覺夠瀨皮,司機都無乎啦,大不了咪兜路囉,不過今次語言上真係溝佢唔掂,才出此下策。之後司機就疑似打電話去call台問酒店地址(因為Mr. Dolphin見到佢抄低同我倆給他的地址是一樣的!),然後一邊用日文繼續鬧,一邊扔筆、扔紙,再一邊用手憤力敲打軚盤>>>司機大佬真係好鬼忙又好鬼唔專心揸車XD,如是者過了6-7分鐘連錶都無跳情況下就順利車我倆去到酒店啦。

在酒店check in後,我倆飛快走去大起水産排隊食迴轉壽司



但眼見條隊頗長當時又開始下毛毛雨,就改去另一家在附近價錢較高一點但我倆在新宿食得好滋味嘅壽司店啦。






醫肚後就隨處逛,跟往常一樣,Mr. Dolphin有時會把右手的手襪除低插在後褲袋方便他用右手拿相機影相或用電話看地圖找路。這晚他不見了右手手襪而咁啱曾經在街上很多人時感到pat pat被碰撞過,或許人家以為是銀包扒走了吧,還好,我倆從不把貴重物品放在後面的褲袋。

又,當海豚兒四圍影相之時。。。



又遇上以下呢位兄台爭著上鏡,好吧,就讓兄台在這兒粉墨登場一次咁多啦。;P



雖然這晚經歷有點“古怪”,不其然和東京有所比較,但也無損我倆渡假心態,只是提醒自己要提高警覺。在回酒店的路上,海豚兒更明知已感染了傷風還是要嘆多杯好味雪糕才返酒店休息,哈哈!

16 則留言:

  1. 好少日本人會咁無禮貌

    回覆刪除
    回覆
    1. 係,好少遇到日本人會兜口兜面咁無禮貌。XD

      刪除
  2. 咁啱, 我也住Namba. 我從未光顧大起水産, 好食嗎?

    回覆刪除
    回覆
    1. 係囉,又會咁啱,我估Namba嗰頭住食行嘅選擇都多,所以比較吸引。

      我嗰晚見條龍有啲長所以無幫襯到大起水產,但之後有日下午食過Namba City嗰間都ok,主要係價錢唔算貴,都抵食。

      刪除
  3. 居然被你遇到無禮日本司機,真係難得啊!我來回難波與酒店都好近又係搭的士,但好彩兩個司機都好好。

    回覆刪除
    回覆
    1. 曾經有朋友話我係惹“火”尤物,專惹呢啲咁嘅情況。^^”

      因為呢位司機大叔搞到我地回程打的都好有壓力,好在回程嗰位的士司機好友善咋。

      刪除
  4. 我慣左未上車前問一問司機去唔去目的地先上車。我有一次同你一樣的經驗。雖然我講贏左,但完全影響了我出遊的心情。

    回覆刪除
    回覆
    1. 喺歐洲我地都有呢個習慣,不過黎到日本又的確係掉以輕心咗,無諗過會遇到位咁火嘅大叔。妳講得啱,講贏咗又點,旅行期間影響咗心情都無意思。

      刪除
  5. 回覆
    1. 咪係,仲破壞咗日本人客戶服務喺我地心目中嘅美好形象。

      刪除
  6. 回覆
    1. 喺日本食壽司真吃百吃不厭,選擇又多又新鮮,同呢度真係無得比。

      刪除
  7. 陰公豬,之後有無好D?
    雖然作病,但見到Cremia真係忍唔到架

    回覆刪除
    回覆
    1. 之後都時好時壞,但最“奇妙”嘅地方係我返到黎多倫多-23℃又無事/惡化喎。^^”

      杯雪糕好重奶味,我勁like呀,Mr. Dolphin就只愛個超脆嘅cone。

      刪除
  8. 回覆
    1. 係咯,無諗過朝早等5分鐘車嘅時間竟然就凍出現。不過始終搭完長途機唔夠休息,身體又係差咗啲。

      刪除