已經一年多沒有在外吃早餐,星期六特意早起,去海豚兒喜歡的餐廳~ Cafe Landwer,嘆返個好好吃早餐。
早上九時許,海豚兒和Mr. Dolphin 入坐時,室外用餐區已有七、八成滿,還好室內只有三枱客人,空間感十足。
先來兩杯熱飲,主子點了豆奶cappuccino,海豚兒就要了杯無咖啡因skinny latte。對主子來說,無咖啡因咖啡真把鬼,但對海豚兒來說,有陣味聞下,已經很不錯,何況,自去年封城以來,這是海豚兒第一次再嚐咖啡,感覺已經很美妙啊!
食物方面,海豚兒指定動作,揀了煙三文魚egg benedict配薯仔、主子就晨早流流隊碟燒雞胸意粉分享,兩者味道都非常好,除了薯仔有點失色。
最後,當然不少得海豚兒朝思暮想的酥脆蘋果批啦,更飽都好,海豚兒也會把他幹掉,哈哈!好在海豚兒都醒目,只吃了丁點意粉和分了一件egg benedict給主子,而薯仔就更加是為主子而叫。
食完早餐,我倆就去韓超入貨,順便再去日式茶飲店,買兩件甜品,然後就回家休息。
黑芝麻慕思蛋糕和抹茶流心蛋糕也都好吃,不過,大意的海豚兒竟然把抹茶甜品,留在星期日晚飯後吃。結果嘛,當晚眼光光到三點還未睡著,寫到這裡,相信大家也明白,為何海豚兒只挑無咖啡因咖啡來喝。
其實海豚兒飲港式奶茶也有近似毛病,所以飲的時候,特別喜歡配菠蘿油來吃,如下圖,就是某日的蛇王早餐,食飽啲,手震情況會輕微些,嘻嘻!
同場加影:在中超買了兩包月巴仔零食,我倆覺得左邊的比較惹味好吃,不過真的很邪惡,短期內也不敢回購啦!
又出去食,一定好興奮
回覆刪除係呀,呢間嘅早餐亦係我期待以久,因為外賣餐牌上,無我心思思想食嘅野呀!
刪除我依家的生活都跟以前差不多,除了無去 shopping,周圍去外,活動範圍都很有限。零食戒左 50 %.
回覆刪除我最近週末有去商場行下當散步同八下,嘩,妳好勁呀!疫情後我食多咗好多零食,尤其呢半年,雙下巴就黎變三下巴啦🙈
刪除無咖啡因咖啡把👻, 我絕對同意
回覆刪除晨早流流竟然有意粉食?
無計啦,我唔多飲得咖啡嘛,叫杯無咖啡因嘅作下狀,都好過無啦!
刪除全日供應嘅餐牌上係有意粉嘅,但估計真係太早,我地都等咗成粒鐘至有野食,哈哈!
早晨呀, 海豚兒 💙💚💛💜❤️
回覆刪除菠蘿油 .. 港人的最愛 ❓ ❗️ 菠蘿油 .. 口水都流 ..😋
東張西望-菠蘿油成爲香港人至愛係有原因 https://youtu.be/9vcYsFKTmec
早晨呀!除咗菠蘿油,我仲好鍾意鮮油多添呀,不過呢樣反而少啲機會食到!
刪除😎等我參觀一吓喇 👍
回覆刪除Toronto Vlog: Cafe landwer https://youtu.be/XoQDxnKcZ_c
呢間餐廳真係幾好食,而且分店亦越開越多😋
刪除同意無咖啡因把鬼
回覆刪除抹茶甜品都咁勁,我宜家買蛋糕都會買幾件share 來食,食少少,最後2包零食我仲未試
無計啦,唔想手震同心跳,就只好飲無咖啡因咖啡咯!
刪除抹茶咖啡因含量真係唔可以睇少😅,通常甜品我都係自私食,因為另一半無配額呢,嗰兩包零食都幾惹味,但太邪惡啦,之前見減價都唔敢再買。
室內竟然冇人座!
回覆刪除係呀,呢度嘅人就算平常都好like坐室外,疫情下室外用餐區更加比室內難訂位好多。
刪除咖啡及甜品,睇到係唔錯喎!😋
回覆刪除對對對,兩樣都好正,尤其係餐廳新鮮焗起嘅蘋果批,更加係好食到不得了!
刪除早餐和甜品都好正呀,我有個朋友和你一樣咖啡,奶茶唔掂得,她不但會手震還會心跳加速,所以出街只飲檸水。
回覆刪除真係兩樣都好好味呀!唉,其實我咪同妳朋友一樣啦,手震同心跳都會出現,喺香港飲奶茶再濃啲,心跳情況更嚴重,不過難得返到去,就點都照飲,呢邊過咗中午,我都只會飲檸水咋。
刪除需要無咖啡因既用意, 肥人明白~
回覆刪除有幾年我心跳得好唔尋常, 但做左檢查都話無事...
醫生就覺得有機會係咖啡因影響到..建議我唔好再飲咖啡因既野, 改飲無咖啡因!
我果時係台灣訂左幾盒無咖啡因既奶茶返黎飲呢~
無咖啡因之友握握手~~~
刪除我都試過有一排心跳成日突然加速,嗰陣仲係廿幾歲算後生啲,醫生亦都係揾唔到原因,不了了之,嘻嘻!至於奶茶,印象中我十幾歲就開始係咁,唔多飲得,但又間中都想飲下。
抹茶流心蛋糕比較吸引!
回覆刪除海豚先生個"早餐"好唔得咁喎,點解早餐食意粉?而且碟嘢綠色(pesto sauce i guess)我唔得.....
抹茶流心蛋糕應該啱妳,唔太甜嘅!
刪除主子想要蛋白質,見到呢個意粉有雞胸肉就懶理係咩醬,照食。妳估啱呀!係pesto sauce ,我唔討厭食pesto sauce,但亦從來唔會主動叫!