2018年1月5日星期五

香港。神京阪 ~ Day 1 ※不一樣的晚飯約會※

婆仔格的海豚兒一早去到多倫多機場無樹幹當然借機會去享用下lounge優惠啦,又原來這個專供飛國際航班旅客用的lounge,海豚兒也是第一次到訪,當然要影下相留念啦。





連航班延誤,在機上打滾了十六個多小時終於到達香港啦,年紀大嘛,要坐咁多個鐘頭機真係好攞命。^^”



飛的到酒店check in,沖個靚涼再換過件衫就打的去溫哥華靚女好友的家探望出爐三個月的龍鳳胎咯。

又傾又講,另外兩位好友也到齊,和孖b影張大合照就出發吃晚飯去。本來我們還相約了另外兩位也是從北美回來渡假的朋友見面,可惜其中一位的兒子病了,當媽的朋友唯有留在家中照顧孩子,而另一位朋友,數數手指大家也有n年沒見面啦,難得的<<70後之夜>>。

多得靚女好友的面子,在又一城的餐廳差不多全院滿座情況下仍能成功在Greyhound訂枱之餘仲有甜品送添,嘻嘻!




和好朋友見面真係特別輕鬆,大家沒有談人生哲理,沒有提及投資得/失利,工作順利與否,亦沒有細說甚麽秘密,只單純講下當晚嘅食物好唔好食、辣唔辣、邊個叫邊碟食物等無聊話題、那些年發生過的事情,已足夠我們笑不停。。。朋友的事不好說太多,不如和大家分享一件海豚兒瘀事啦。"朋友A"提到海豚兒飲醉酒仲嘔埋,“朋友B"好奇“朋友A"怎會記得這些無聊事,“朋友A”説“你有幾何見到有人飲醉酒、嘔完、仲識去洗番張嘔污joe咗嘅地毯吖 XDXDXD” 講到呢度,海豚兒都記得呀,當時我地幾個朋友從溫哥華自駕遊,去到羅省住喺海豚兒家姐屋企,海豚兒嘔污joe咗家姐張廁所地毯勁驚俾家姐鬧,酒醉都要靠剩餘一丁點意志力洗番乾淨張地毯至好C去瞓。

呢晚真係諗番起好多封麈記憶,最開心係大家都覺得這晚聚會就和當年一樣,沒有包袱,想講乜都得,唔洗修飾,乜都笑餐飽,過得超開心,就像讀書時一樣,思想、生活也同樣簡單而又易滿足。

最最最難得是,海豚兒的三位靚女好友除了是人妻外亦是人母,三位母親合共有五名小孩,年齡由3個月(x2)、1歲多(x2)、4歲多(x1)不等,這晚傾到成十一點才散場,好友們回到家還有許多照顧孩子工作要做,還有她們的丈夫、孩子的外婆甚至褓母也特意OT照顧孩子來配合,另外,亦難得飯局中的唯一男生也不怕悶,陪我們一直吹水到最後,這真是很不一樣的一場晚飯呀!正所謂。。。朋友,我當你一世朋友。。。

18 則留言:

  1. 好難得相聚仲有咁多話題 😀
    俾我番到香港, 一定唔要食西野 😣

    回覆刪除
    回覆
    1. 其實我覺難得架,始終香港同歐美生活模式大不同,仲可以有共同話題,當然都要多謝Facebook同WhatsApp嘅偉大發明將我地連系住啦!

      睇下食乜啦,茶餐就百吃不厭,中式野我反而無特別喜好。

      刪除
  2. girl talks 永遠有傾不完的話題,傾幾個鐘真係濕濕碎啦,哈哈。

    回覆刪除
    回覆
    1. 我地4個女仔吱吱喳喳就預咗,難為唯一嘅男性友人,聽我地吹水之餘有時仲變埋我地嘅話題呀,陰公!

      刪除
  3. 見番啲舊朋友,當然開心,大把嘢傾

    回覆刪除
    回覆
    1. 同佢地可以咁多年都保持聯絡真係難得,始終我地做同學嘅日子只有一個學期,一同喺溫哥華生活亦不過係兩年到咋。

      刪除
  4. 真正朋友真係一見就不停有野講, 咩都可以傾一輪呢~

    回覆刪除
    回覆
    1. 亦係我嘅幸運有呢班朋友當我係知己好友,想當年,佢地真係照顧我好多架!

      刪除
  5. 妳真係好搞笑又可愛呀!
    為了依班老友,又為了我地一班blog友,記得多D返來啦~

    回覆刪除
    回覆
    1. 哈哈,貓咗呢啲日子真係一去不復返,不過諗番又確係搞笑。XD

      一定啦,我有時都諗會唔會有機會一齊去個小旅行,有嘅話就一定係美食之旅啦!

      刪除
  6. 十六個鐘的機程太奪命了,多謝妳回來相聚!

    回覆刪除
    回覆
    1. 16個鐘真係幾辛苦,所以我現正幫主子進行洗腦教育,希望下次長途機可以坐好少少嘅位,哈哈,成功嘅話,好快又會再聚啦!

      刪除
  7. 人夾人緣,我始終覺得你係點嘅人,就會有點嘅朋友(親戚除外無得揀),鍾意互相比較多事非嘅人自會聚埋一齊,跟年紀或者幾耐無見無乜大關係。

    回覆刪除
    回覆
    1. 人夾人緣係真嘅,不過友情能維繫點都要經過一啲考驗嘅,何況我同朋友婚後嘅家庭模式、生活節奏都好唔同,難得嗰晚有種重拾當年嘅情懷氣氛,所以真係好難忘!

      刪除
  8. 就像讀書時一樣,思想、生活也同樣簡單而又易滿足。 <--- lots of drama at work lately, and really appreciate the authenticity in old friends.

    回覆刪除
    回覆
    1. 如果比著我仲係學生時,我唔會明呢種感受仲可能會覺得啲哥哥姐姐會咁講只因佢地唔好彩識唔到交心嘅朋友:P,到依家就明白做工好多時身不由己,而且就算自己肯真心對人,亦唔代表對方唔當自己係茂利。希望妳放工後可以真正放低唔諗公司嘅煩惱事啦。:)

      刪除
  9. 好好啊,可以暢所欲言既朋友係特別珍貴的 ^^
    我相信你D 朋友都好珍惜呢份情誼呢:)

    嘩,原來你朋友都係龍鳳胎,真巧 ^0^

    回覆刪除
    回覆
    1. 自問我地認識時我無姿色、無財氣、亦唔係名列前茅XD,對我黎講好難得有呢班唔嫌棄我嘅朋友,仲對我照顧有加。

      係呀,當我知道朋友有咗仲要係龍鳳胎,我都第一時間諗起妳呀!

      刪除