2018年1月23日星期二

香港。神京阪 ~ Day 6 黑門市場、難波食買逛、蟹道樂

一覺醒來,先在酒店食少少早餐打底。



然後就出發去黑門市場啦。



去到先東張西望視察下環境,見到河豚、白子,膽小鬼嘅我倆唔敢試。@_@!




見到新鮮海膽,即買。新鮮開出黎嘅海膽就只有連殼嗰幾塊,非常鮮,係好味嘅,搭喺面嗰堆海膽係後期加工,喺另一個盒到攞出黎舖上去嘅,視角上會豐滿啲,但味道就無咁鮮美啦!



跟住就轉戰熟食,先試即買即煎和牛。可惜我倆都不太懂欣賞和牛獨有的香味,唯有由海豚兒努力清碟。




接著就燒下鰻魚、有殼帶子、皇帝蟹棒,頭兩款好好味,皇帝蟹棒嘅肉拆散哂後味道有啲似蟹柳^^"。可惜無影低店名,這間店的店主超友善,讚!




行行下見到有桃汁又買杯試,沒有想象中甜,但味道幾“真”。



再然後就試下兩年前想試又無買到嘅白色士多啤梨,都幾甜喎,一場來到,亦順便買包香印返酒店食,連皮都係甜,零苦澀味,而且唔好睇佢細細包,都好襟食下,我倆每人每晚食幾粒,都食咗幾晚至食得完。



食飽飽就去Namba City行街



行到攰就幫襯高島屋內嘅宇治園食杯好味道嘅焙茶雪糕順便坐下抖下,杯雪糕真心好味,所以之後都揾日專程去佢喺心齋橋嘅店買手信。



再行多陣,可能因為海豚兒病病地唔多行得又見攰,於是就去大起水產食個下午茶,而以價錢計,這兒又確係抵食嘅。邊食邊傾至發現原來距離我倆提早預訂的晚飯時間不足三小時,於是一食完就繼續去行街消耗下體力。



去咗上次喺新宿行得好高興嘅Labi,雖然呢間無乜野啱睇或買,但四圍行下都係開心嘅,同埋見到個兒童樂園好精美咁呀。



之後就行返去高島屋地庫買咗百力滋界嘅名牌百力滋Baton D'or做手信,味道比平時嘅百力滋確係足料同豐富啲,但可能因為我倆平常都唔係百力滋捧場客,所以又唔係話覺得太特別。另外又買咗兩款都好味嘅甜品留返宵夜食。




然後就行返去心齋橋去蟹道樂食晚餐。







老實說,我倆真心不欣賞這餐晚飯,主要是食物味道不似預期呢,跟我倆從前在北海道嚐過的蟹蟹差好遠呀。為了補償心靈上的創傷,我倆就在酒店附近再多買了些零食和之前買的宵夜伴著吃,雖然鹹食很一般,但甜點就全部都好好味。又,雖然海豚兒報稱這是宵夜,其實當時也不過是當地時間晚上七時咋。XDXDXD

18 則留言:

  1. 好似呢處和牛同蟹都滿足唔到你
    係咪和牛太油, 唔啱你?

    回覆刪除
    回覆
    1. 係啦,兩樣都麻麻地咁。

      和牛有陣“so”味,我地兩個都唔多like。^^”

      刪除
  2. 我都真心覺得蟹道樂普通,唔值個價錢,所以食河豚嗰餐開心好多。

    你哋個下午茶好豐富喎,我食咗之後會食唔落晚飯。

    回覆刪除
    回覆
    1. 我都記得妳講過蟹一般呀,可惜我地唔敢試河豚。^^”

      旅行期間,我真係搏哂命咁食架,好在蟹道樂嗰餐我地都只係叫咗一個套餐再散點小小其他食物,所以都唔算好飽。

      刪除
  3. 我上次食飽早餐先去行黑門,只係飲左杯豆漿咋。我在蟹道樂食午餐,覺得服務食物都好好喎,所以我成日介紹人去食。

    回覆刪除
    回覆
    1. 我見好多blog友去到黑門市場都食得好豐富架,但唔知點解我地又豐富唔黎,咁妳下次有機會再去就記得留肚啦。

      我就係唔明好多blog友去蟹道樂都讚好食,唔知係依家退步咗定我去嗰間(本店!)因為人多質素差啲呢。

      刪除
  4. 回覆
    1. 無錯,尤其去到日本玩,對於住喺北美嘅我簡直放監一樣呀。

      刪除
  5. 原來海豚兒唔喜歡和牛? 點解啊??

    回覆刪除
    回覆
    1. 今次喺黑門市場到食,我地兩個都麻麻地和牛嗰陣獨有嘅香味,好似有啲“so”味咁。

      刪除
  6. 妳地依日戰鬥力好強啊!
    蟹道樂依餐賣相真係唔多吸引,但焙茶雪糕就引C人~~~

    回覆刪除
    回覆
    1. 哈哈,呢日都未算,之後去京都嗰日仲誇張呀。XD

      係呀,我原本抱好大期望喺蟹道樂食蟹刺身架,但真係唔係嗰回事。我見CEO話香港宇治園雪糕冰感較重,但大阪嘅就真係好好味,連佢嘅手信都係勁好味。

      刪除
  7. 吃過日本香印真係好難返轉頭!

    回覆刪除
    回覆
    1. 真係未試過食提子可以甜成咁,不過食多幾粒都好快覺漏。

      刪除
  8. 可惜我倆都不太懂欣賞和牛獨有的香味,唯有由海豚兒努力清碟。 <--- haha. Mr. Dolphin is a picky eater. Let me guess, he would rather be hungry than getting something that he doesn't like.

    回覆刪除
    回覆
    1. 佢picky架,但都唔鍾意浪費,不過因為佢嘅quota實在太有限,所以唔健康/適合嘅食物就盡量少食。

      刪除
  9. 蟹道樂我都覺得麻麻地, 有得揀我都唔會再去呢~

    回覆刪除
    回覆
    1. 真係無諗過蟹道樂有咁多分店,總店仲要係成座樓都爆滿但味道竟然麻麻。

      刪除