2018年1月25日星期四

香港。神京阪 ~ Day 7 (上) 京都半天團

京都一日“游”的行程加照片真的太多啦,唯有一分為二,這篇先寫上半場的半日團之旅啦。



是日跳過酒店早餐乘坐在多倫多出發前預訂的子彈火車由新大阪站前往京都站。坐子彈火車只需15分鐘車程,真係“話咁快就到。”




到埗後先到旅行社集合地點報到,然後十足十個婆仔咁嘅海豚兒就喺個手袋到“抄”件焙茶蛋糕仔出黎當早餐食。XD



講返是日行程,海豚兒和Mr. Dolphin在多倫多已預訂了這天上午的半天團,行程包括:

1) 二条城 - 這是一個我倆一致裁定可一不需再的景點。這景點主要是參觀江戶時代德村家族故居及移交政權時期的歷史。冬天在這兒參觀其實真的苦了十根腳趾,因為在這兒參觀要把鞋脫掉穿上這裡提供的拖鞋,這地方全是木建,沒有暖氣設備,穿上拖鞋參觀完後海豚兒雙腳凍到麻痺,而Mr. Dolphin的拖鞋呎碼就太大,長期靠腳趾的大拇指撐住拖鞋前行,大拇指後期凍加攰到失去知覺。而且這兒一踏入室內是不能拍照,所以我倆亦只能在核心的外圍影了幾張相。除歷史外,有一件我倆覺得頗有趣的事情,就是屋內有許多不同的畫用作裝飾,包括數幅老虎的畫像,但原來那時候日本是沒有老虎,所以畫師畫出來的老虎都是憑空想象,老虎都是少了一份兇猛,動態也少了一點氣勢。更有趣的事,老虎旁邊會有豹相伴,原來當時的畫師誤會了豹是女性的老虎。^^"





參觀完二條城,旅遊車就載團友到第二個景點。

2) 金閣寺 - 這地方是海豚兒知道會來京都後最希望參觀的地方,原因很簡單,只因為從照片中覺得這座小小的建築物真的很美,而現場看到整個環景襯托下更覺美。







同場加映,門口攤檔有好好味的熱食草餅。這麼冷的天氣能吃下這個暖笠笠的草餅,倍覺滋味。接著就出發去是日最後景點。



3) 京都皇宮 - 如果有睇開海豚兒“游”記,或許你會發現Mr. Dolphin家庭旅行多數都唔少得參觀皇宮,今次亦不例外。小聲說:海豚兒只是陪太子讀書而已啊,何況這皇宮的參觀手法也有點怪嘛,只能從外面遠眺參觀,不能入室內啦。












參觀完最後景點,海豚兒上到旅遊車由於太累亦太凍,很快就昏睡過去。醒來時已差不多回到京都站,方發覺車上有一半報了一天遊的團友已下車繼續餘下行程,另外又多了一班另一個剛完成上午半日團的遊客上了這架旅遊車一同回京都站解散,哈哈,估唔到自己可以瞓得咁“淰”,團友們有上有落、有出有入都全不知情。XD

下一篇將會是這天餘下的行程。。。又或者形容為食程可能更貼切。:)

16 則留言:

  1. 嘩,D 相好靚啊...個湖好似一面鏡咁,好靚呀。
    海豚兒你用相機定手機影架?
    我依家好小用相機了,因為I PHONE影相都幾好,而且手機影好方便。^^""

    回覆刪除
    回覆
    1. 我係用一部舊手機(Note 4)加上毫無美感再配以零技術黎影架,證明環境真係好靚,係點影都咁靚。

      我都係,慣咗用手機,連袋相機出街都懶,不過Mr. Dolphin就始終都係鍾意用相機多啲。

      刪除
  2. 我認識金閣寺, 係因為睇一休 😁

    回覆刪除
    回覆
    1. 咦,我唔知喎,不過自從做咗I Q博士,我嗰陣好多時都係睇小雲,甚少睇一休。^^”

      刪除
  3. 雖然景色好靚,但我都係期待食程多D,haha

    回覆刪除
    回覆
    1. 食程真係好癲,我發現自己每次去日本都食得好癲。XD

      刪除
  4. 睇完你個行程,我覺得我個一天團好似好啲喎,只係我坐巴士來回時間長啲。不過你哋冬天去又真係幾攞命。

    回覆刪除
    回覆
    1. 妳嘅行程3個地方都係我想去架,不過因為我地唔想全日觀光,唯有揀半日團,咁自然就犧牲咗啲遠少少嘅景點,好在下午嘅自由時間都補償返上午嘅不足。

      刪除
  5. 我無去二条城,個老虎故仔好得意喎,多謝分享。

    回覆刪除
    回覆
    1. 如果妳係百份百觀光人,二条城都可以一去,但大前題一定要㨂除鞋都唔怕會凍親嘅日子,哈哈!

      多謝妳有興趣睇就真。:)

      刪除
  6. 回覆
    1. 呢個真係堅好味,尤其嗰刻凍冰冰,食舊熱暖嘅草餅真係特別覺得滋味。

      刪除
  7. Even though it gets really cold here, but I am not used to being outside for extended period in the cold. One year, we went back to HK when it was only 8C, I almost died.

    回覆刪除
    回覆
    1. 全中呀!雖然東岸嘅冬天凍過香港日本好多,但喺度生活唔會好似去旅行咁,成日喺室外走動,再加上我地一般習慣室內有暖氣,而喺香港,8℃仲係又濕又凍,真係凍到入骨,好難頂架。

      刪除
  8. 子彈火車係咪好貴呀?肥人去左兩次京都係坐JR...呆足兩個鐘先到果D...hahaaa
    金閣寺真係好靚架, 肥人都好喜歡呢~

    回覆刪除
    回覆
    1. 我地見15-20分鐘嘅車程,所以㨂咗平啲無劃位嘅子彈火車票,印象中大約每人每程千四¥,價錢都ok,尤其我地嗰朝一早要去到京都集合跟團出發。

      係呀,金閣寺真係咩角度影都咁靚。:)

      刪除