從小，海豚兒就跟姨丈很親近，或許是人夾人緣吧，姨丈是極少數喜歡海豚兒比海豚兒家姐更多多多多的長輩，基本上，姨丈在海豚兒出生時，在醫院裡第一次接觸就喜歡上海豚兒。。。這實在是很少有的，因為大部分親戚打從心裡就喜歡上小時候天生美人胚子又伶牙俐齒的海豚兒家姐，像海豚兒這種扁鼻姑娘又吽吽竇竇模樣，的確很難得人垂青，哈哈!
跟姨丈關系有多密切？不計小時候會到他家玩耍、等他放工回家做飯給姨媽和海豚兒吃(!)、再等他陪海豚兒到公園或遊樂場玩、然後他跟姨媽去旅行會買海量玩具給海豚兒這些指定動作，另一較深印象就是海豚兒七歲那年和姨丈姨媽跟旅行團去星馬旅行。現在想起來也覺好笑，怎麼海豚兒父母會準許、姨丈姨媽又不怕煩、海豚兒又會無有識死跟他們去旅行，印象中自己沒有在旅途中哭鬧或想家，只記得我們本來三人同床，海豚兒睡旁邊，姨丈一個轉身海豚兒就碌咗落地，之後姨丈就把海豚兒搬到床的中間位置，然後嘛，輪到海豚兒一個轉身又一大巴掌打到姨丈臉上，哈哈哈！姨丈是家中萬千寵愛的獨生子，他說從小到大就只有海豚兒送過他這一耳光。XD
對姨丈印象最深莫過於海豚兒當年從羅省的uncle(父親的細老板) and auntie家搬出來獨立生活那次風波啦。事發若干年後，海豚兒才知道姨丈為了海豚兒跟海豚兒父親爭取到底好讓海豚兒不用再寄人籬下。姨丈說，看海豚兒寫給他交代自己將搬出去住的信，他忍不住哭了，而其實當時還未成年的海豚兒自問亦算生性，除了海豚兒家姐，從來沒有跟長輩說半句寄人籬下的不快，亦清楚記得給姨丈的信只簡單地交代「大個女啦，也是時候學習獨立生活，不用掛心。。。」等意思，就是不想人擔心亦不想有任何不恰當的說話傳到uncle and auntie那裡，想不到姨丈還是從字裡行間看出海豚兒生活上的不愉快。海豚兒想，這個外省郎要有多著緊一個沒血緣關係的姨甥女，才能這樣設身處地為對方著想，海豚兒實在是何其有幸，有這樣一位姨丈。
還有姨媽，她從來也是不多說話的人，說起話來也比較倔，而且有時行徑亦有點古怪，但海豚兒知道她也是從心底裡很愛鍚海豚兒姊妹倆的。有一趟，海豚兒要麻煩姨丈姨媽幫海豚兒在港申請一些很重要的文件，不知怎的姨媽把東西弄錯了，聽姨丈講返，她後來竟害怕得走到海豚兒母親的碑前哭訴，很擔心會因為她而影響到海豚兒的前途...等等。
有這樣的一對姨丈姨媽，海豚兒真的何等幸運！
當然老人家也有老人家的怪習和行徑，但我們都不是聖人，這些也不重要。海豚兒只希望他們身體安泰，繼續健康精靈古怪兼活潑！
字裏行間看得出姨丈姨媽對妳的愛很感動！
回覆刪除係呀，不過我小時候唔識珍惜，仲成日串串貢咁對姨丈，例如佢買架當年好興嘅BMX單車俾我，我夠膽死話都唔係佢俾錢嘅，提款機俾錢之嘛，諗起都覺得佢地堅鍚我，咁都忍我！
刪除原來我地又多一個共通點喇，我都係扁鼻之人😆人愈大愈知道家人對自己嘅愛錫真係唔係理所當然。姨丈姨媽一定曾經同你媽媽感情深厚！我做左姨媽都好緊張細妹個仔仔，我成日同老公講我當佢係我個仔架喇😊
回覆刪除原來大家都係扁鼻之人，哈哈，帶眼鏡就最煩！無錯，真係自己年紀越大至越懂appreciate鍚自己嘅人。妳好犀利呀，我因為想將篇blog習中寫姨丈姨媽，所以都無提到佢地同我媽嘅關系，真係呀，佢地好close,我由細到大都只會喺佢地口中聽到佢地讚我媽對佢地有幾好，從來唔會講我媽半句壞話。。。除咗太遷就我爸啦吓！XD
刪除係呀！好彩我冇近視，不過太陽眼鏡唔容易買！我又鍾意大鏡款，成日羨慕老公個鼻梁...唯有安慰自己扁鼻好似有福氣？😆最難忘有個學生講過我個鼻高啲可以選港姐🤔笑死🤣
刪除一定係佢地感情超好所以同你有特別情義。你似媽媽會唔會多啲啲呢？我細個都比較喜歡姨媽多過阿姨們，因為我媽咪排第二，佢仲有3個妹、2個細佬。一直覺得阿姨們係我媽咪幫手養大但冇感激之心，仲有啲白鴿眼，所以由心唔喜歡佢地，反而姨媽曾經同我媽輪流照顧婆婆，唉，講落去會好長篇，而且姨媽因爲意外過身了。總之，能夠長大了仲有錫你嘅姨丈姨媽在身邊，你好幸運呢😊
係呀，太陽眼鏡比一般眼鏡更難買，因為設計更貼面，我又係有同樣問題。我細到聽最多係「扁鼻姑娘奶奶相」，對我黎講就唔準囉！XD
刪除會呀，連我家姐都話有啲角度睇我好似我媽，妳都係?我明呀，妳會唔會替妳媽唔值? 我會架，好似我見我爸/姊對媽咁唔重視，我都唔好受，好替媽咪難過。好似爸喺媽過身幾個月就拍拖然後間中對住我抱怨媽累佢無咗個仔，我心諗，點解要怪我媽，男人九十歲都仲可以生，佢現任老婆為咗自己個女唔肯同佢生，又唔見佢怪現任，係要怪個糟糠之妻。至於家姐，只可以同自己洗腦，佢一早出國，同媽相處時光相對少咗，感情係會淡啲架啦。妳姨媽突然過身，妳媽同妳一定都好傷心啦，希望妳們都已走出陰霾吖！
我細個比較同媽咪似樣，有次見到媽咪兒時張相，好驚訝佢同我當年個樣超似樣！
刪除我有替媽咪唔值呀，仲好嬲佢地，甚至勸媽咪唔好同佢地聯絡，有次我地無意中喺whatsapp發現佢地背後講我媽咪是非，最無聊佢地連我妹妹喺個群組都唔知，就俾我地知道佢地醜陋嘅一面。有時我會替媽咪可惜，好似我同妹妹有份拆散佢同班姊妹咁，但真係做唔到由得佢地蝦我媽咪。
原來你都有難過之處，即使我爸爸媽媽都仲一齊，其實佢地感情淡如水，有時聽佢地同我講互相的不是，都令我好難過，所以我完全明白你心情。
WhatsApp嘅group chat有時真係害人不淺呀>_<！ 我支持妳地姊妹嘅做法，人多好多時就是非多，妳媽媽嘅妹妹們呢種食飽飯無野做，然後pick on個心地好嘅家姐黎針對嘅人，若果仲俾佢地聯絡，只會令妳媽媽更傷心難受。我明白親人帶黎嘅傷痛係唔會有防疫嘅一日，每一次受傷害都會難過都會痛，所以斬纜亦能理解。
刪除妳比我嘅處景更加難做呢，兩邊都對妳講對方不是，至少我同爸關系疏離，佢已不大會對住我數落葉(無病呻吟)，但妳作為家中長女，父母各自可能更想得到妳認同。
呢啲就係人夾人緣呀
回覆刪除緣份呢樣野, 真係好難解釋
對，人緣呢樣野真係解釋唔到！而且越來越感受到老人家/長輩喜歡或不喜歡一個人從來都好主觀，根本無得解。
刪除大人錫細路點會只有睇樣？ 你唔好成日以為自己唔靚無咁多人錫。 要自己成日同自己講。我最靚！ 我都係架，我會講： 我瘦左，我好靚！
回覆刪除哈，我真係由細聽到大親朋戚友每次講起我家姐細個有幾得意，佢地真係講到好肉緊架，不過對我都無乜壞影響，我亦唔會因為咁而覺得失寵或者傷心，因為我有媽同姨丈姨媽鍚嘛!
刪除妳好幸福，姨媽姨丈咁錫妳
回覆刪除係呀，佢地真係好好，我媽當年突然過身，佢地真係二話不說就接咗我去佢地屋企住，照顧哂我所有起居飲食直至我去美國讀書。
刪除姨丈好錫你呀!
回覆刪除肥人好明白你呀, 因為肥人小時侯都係黑蚊蚊又呆呆地, 個個都會錫晒我果個又白又靚既妹妹..哈哈~!
真係好鍚好鍚，佢幾廿年黎床頭櫃都放咗幾張我嘅童年照，其中一張因為無相底哂唔返，張相又癡實個相架塊玻璃而scan唔到，我想打劫佢，佢都唔肯。XD
刪除係呀係呀，但我估妳同我都一樣，唔會因為身邊啲人鍚哂自己個姊/妹而唔鍚自己個家姐/細妹。。。老實講，我最多只會因為家姐有時對我太衰而唔開心，但一定唔會妒忌佢多人鍚咁無聊囉，哈哈！
你姨媽姨丈自己有無小朋友？人夾人緣，慶幸你細個時都有人錫，我就無咁好彩喇，不過我嗰個年代，無乜人錫都好正常。
回覆刪除對，佢地無小朋友，所以更加更加著緊我地兩姊妹。其實我好樂觀(定阿Q?)，細個時我覺得雖然眾多親友都係鍚我家姐多啲，但最親密嘅係家人，咁我見到媽、姨丈姨媽一定多過見其他人架，有乜所謂，不過好多野最緊要自己睇得開，雖然我家姐近乎萬千寵愛，佢反而成日投訴媽同姨丈偏心我。^^”
刪除我覺得童年真係好影響一個人嘅成長，都慶幸我有個快樂童年。我有位年紀大啲嘅好朋友性格同妳完全不似但家庭背景有啲似(2姊、佢、1弟1妹)亦係屋村長大，父母約十多年前雙繼離開，父母各自走前，佢有盡力照顧好佢地，但其實佢都難受架，因為地理環境上只有佢可以時常探父母，但父母心裡最掛念又唔係佢。雖然父母都走咗咁耐，早排同佢見面傾開，佢都仲有點點遺憾，好在佢同siblings好close亦係較少數家庭無喺父母離開後因為錢而有爭拗，都算難得。且遠啦，寫一大堆都唔知自己講乜，哈哈！總知有冇人鍚都好，我地做女人一定要鍚自己！
我就覺得自己睇唔睇得開最重要，我阿媽到依家都仲係偏心架，不過我哋咁多個仔女，佢錫嘅佢唔錫嘅，都唔會理佢呢啲嘢，佢有佢偏，我哋有我哋唔理，姐弟妹之間無問題。
刪除我亦唔覺我童年唔開心，可能細個時經濟環境差，真係錫極都有個譜，可以投訴啲乜吖，我阿媽係會打細路但唔係虐待我，我一直都有瓦遮頭有飯食。就算將來我父母走咗，我都唔會有遺憾或者乜嘢特別感覺。人與人之間嘅緣份係無得強求嘅，我自己覺得我阿媽可能唔係太稱職嘅媽媽，係可以好抽離地睇，影響唔到我情緒。
對，自己睇唔開最終都係辛苦自己，不過難得係你地姐弟妹之間亦無因為媽媽偏心而影響感情。:)
刪除人與人之間嘅緣份係無得強求>>>説的太對，就算親人亦唔一定有義務或老馮要對自己好。。。理性上明白但感性上有時都難免會難過，雖然我同妳相反，我係極情緒化嘅人，好在嘅係我唔駛成日對住會令我情緒差嘅人過日子。
海豚兒你就好啦，姨媽姨丈咁鍚你，仲同你去旅行，真係好好啊...
回覆刪除我印象中，我姨丈成日整古我 - -
例如，我細個時，佢成日貼D 紙喺我背脊，等我行出街比人眼望望，之後佢就笑我...
我同我媽投訴，我媽就話姨丈同我玩之麻...... - -""
一諗起姨丈，只覺得link up with 被整古的童年，嗚嗚嗚.......><""
妳講嘅，我同姨丈都有類似情況，不過係我姨丈有一個被整古嘅中年囉！XD
刪除比著我都會同媽投訴但做阿媽嘅又真係無咩做到，又無奶油夾埋個女報仇嘛，哈哈！唔知妳細個有冇對住姨丈玩“我去買魚腸見到姨丈...”呢，我細個唔知咩係魚腸但就成日對住姨丈大大聲咁叫“追住姨丈攞魚腸！”
扁鼻舉手區！
回覆刪除對上一幅太陽眼鏡已經10年前買，今次去歐洲非常努力搵努力試，終於搵到一幅還算戴到、但都少少貼面的眼鏡... ^_^"
第一次接觸就會喜歡上，絕對係一種奇妙緣分～
咁樣寫出來記錄一下，其實都係對自己好好的提醒，真係要好好珍惜依D生命中的天使
我都祝福海豚兒的姨丈姨媽繼續健康開心！
哈哈，我地原來都喺扁鼻區之友～～
刪除買到太陽眼鏡就好啦，等睇妳開箱文！咁啱我上星期都係揾緊眼鏡，不停試帶，又除又帶得多仲搞到右邊耳仔有啲痛。
係呀，我覺得某程度上姨丈因為本身無小朋友，所以就將佢對小孩嘅愛投射咗喺我身上，亦因為一出世就成日見，感情亦特別深厚。
多謝妳嘅祝福！我真係想喺記憶減退前寫出黎，因為我發現近年某啲童年點滴已經有點模糊啦。^^”