2017年6月1日星期四

英倫“游”。Day 5 ~ Borough Market打底早餐、O嘴三星午餐、快樂blog友晚餐聚

這天的第一站就是Borough Market,本來打算Day 1就來訪,可惜時間上趕不及。這天剛到達時,可能時間尚早,許多檔口也未準備好,某人就好擔擔擔心,生怕他心儀的攤檔是日休息。



至於海豚兒嘛就先嘆杯flat white,自隊一隻有少少沙但味道尚算鮮的海膽,再和Mr. Dolphin開心些牙了好吃的生蠔。



接著,Mr. Dolphin就完了他的心願,自隊了這個其實味道不太特別但卻能滿足他幾天下來沒有米飯到肚的欲望,所以嘛,就算明知不夠兩小時我倆便要去吃午飯,海豚兒也不敢阻止Mr. Dolphin清碟就是了,廢事為咗兜飯搞到婚變就唔扺啦。^^"



是日午餐選址Restaurant Gordon Ramsay。餐廳正午十二時開始營業,心急的我倆當然是訂了十二點開波,方便午餐後有多點時間四圍逛嘛。去到餐廳時。大概是11:40am,當時已有另一位食客在店外等候,大概到11:55am,門依舊是鎖上,那天的天氣其實頗冷,那位食客和我倆閒談間也覺得店子真的要等到十二時正才開門著實有點不可思議。



沒關系,餐廳開門後,我倆很快便選定了午餐,然後就像平常一樣找侍應替我倆合照,影餐牌,影食物照,包括餐前小吃凍豆湯及麵包,味道也很不錯,只是凍湯從來也不是海豚兒那杯茶便是了。





然後就輪到Mr. Dolphin的魚魚頭盤和海豚兒的生牛肉他他上枱。正當我倆慣常地“相機先吃”之際,其中一位之前沒有跟我們這枱有任何交流的侍應跟Mr. Dolphin説“如果不能把相機聲音(shutter noise)關閉,就請改用電話拍照。”我倆當然覺得這個要求無理,他說"we prefer....blah blah blah”下刪幾廿字已聽不入耳的費話。因為相機是屬於Mr. Dolphin管理部門,他生氣得把相機馬上收起來,海豚兒只會尊重,換轉是自己,一定會繼續影,懶理這位侍應高興與否,何況餐廳傳來的確認訂枱電郵及餐廳網頁也沒有提出這規條,海豚兒實在不曉得這是誰定的規矩。在這情況下,我倆當然無法好好享受這兩款頭盤,但平心言論,這兩個頭盤味道也是好吃的。



主菜就由店內的領班(Maitre d')奉上,海豚兒當然不忘道出我倆的不滿並影響了胃口。領班先生沒有説明該侍應的做法正確與否但就告訴我倆之後會帶我倆參觀廚房,這亦是食客在這餐廳用膳的優惠,到時就可以帶相機去拍照,而Mr. Dolphin則沒有回答。説回主菜,無論是海豚兒的魚魚或是Mr. Dolphin的羊羊也是十分之出色,真的很有水準。




來到這地埗,領班先生和另一位侍應先生簡直鈴鈴“茶茶”都出埋,駛盡渾身解數來逗我倆高興,當然海豚兒亦俾足面陪他們吹吹水,暗地裡和Mr. Dolphin説值得嗎?為了一個搞了一場爛攤子後,卻連正視我倆勇氣也沒有的侍應補這個可避免的鑊,真係無啦啦整撻瘌。@_@

然後就到甜品出場,兩款甜品無論是earl grey parfait定custard tart也非常好味,只是羅勒味雪糕海豚兒就未懂得欣賞。最後的美點“四”輝也很好吃,海豚兒尤其喜歡那濃濃的古古力脆片,好吃!





來到參觀廚房這指定環節,領班先生一再提醒並邀請Mr. Dolphin可以帶相機到廚房拍照,而當然我家主子亦貫徹始終,離開這餐廳前絕不讓他的相機重見天日啦,哈哈!不得不提的是如果Mr. Dolphin早上不是已有米飯填飽肚,相信他以示不滿的方法絕不會這麼“溫柔”啦。



跳過這天下午隨處逛的小事,來到是日重點,就是“海豚兒和Samwei有個約會”啦!:)

感激blog友Samwei放工後趕來和我倆吃飯,安排了一頓很有特式的英式酒吧晚餐給我們試,笨笨的我倆又少去夜蒲不曉得要行去bar到落單,呆下呆下搞到Samwei要左騰右騰幫我們叫飲品、食物,失禮哂。^^”



很喜歡跟地道人搵食,因為這些地方都是遊客未必知定去的食店,就像這晚,酒吧夠特別又抵食,我們仨掛住講,未能把食物清碟,不過跟blog友見面,吃從來也不是重點啦。



第一次跟Samwei見面,感覺就是大家好啱嘴型,不愁沒有話題,而且正因為我們仨離港的時日也不淺,談起我們“熟悉”的香港就份外投契。不得不提Samwei給海豚兒的感覺就是分析力超強啦!很多説話也一語中的,好厲害呀,尤其對某人的形容就最貼切,哈哈哈!這晚聚了三個多鐘才道別,之後Samwei還要花個多小時車程才回到家,辛苦妳啦!多謝妳這晚抽時間和呢兩個茂李見面,還有妳的禮物,倫敦跟多倫多機程只7至8小時,相信我們將來還有機會再見的~~~ :)

28 則留言:

  1. Mr. Dolphin 好有性格
    難得可以見面, 係咪覺得時間過得太快, 唔夠喉呢

    回覆刪除
    回覆
    1. 哈哈,唔通佢係性格巨“猩”! XD

      全中呀,其實我覺得每次同blog友見面都係咁,真係傾到快活不知時日過架!

      刪除
  2. 我對於餐廳唔準影相, 或者要求影相唔出聲嘅睇法有啲唔同(即使網頁同其他餐廳資料無提過)。

    雖然依家係相機先食年代,但如果有侍應提出叫我收機,甚至收手機,我都會尊重,亦唔會覺得無理,我呢方便比較老派。雖然係打開門做生意,但個場係佢哋嘅,唔係俾錢佢賺就大哂。除非佢哋只要你們一檯收機而容許其他客人繼續就另一回事。

    回覆刪除
    回覆
    1. 我係嗰種好頑固咁覺得既然餐廳嘅confirmation email清楚講明衣著要求,no show fee等,咁傻瓜機唔可以有shutter noise都應該列明嘛,尤其呢間都算係出名亦有好多遊客專程黎打卡,相信我地唔會係唯一。加上我係堅有刨咗好多reviews同餐廳websites規定至決定訂位食飯嘅人,預先知道,至少我可以揀配合/唔去嘛,而唔係食飯時俾侍應教訓,而且當時大部分客人都用手機影相亦有食客大聲交談(非英語),侍應話我地嘅shutter noise嘈到其他食客的確係有d吹毛求疵。

      刪除
  3. 點解你地成日都知邊度有好野食ge? (我終於又有時間上blogs~哈哈~)

    回覆刪除
    回覆
    1. 我喺揾食方面的確係比我讀書、工作勤力好多嘅,哈哈哈!

      襯得閒上多啲blog同update多啲你嘅近況吖!:)

      刪除
  4. 這天你地真係食左好多野喎。 GR 的午餐好正,我成日以為只是擺出來好睇的,原來是出色有水準。好彩你地無去Jamie Oliver 的餐廳食咋,會令人好失望的呢。我唔好意思添,剛剛那星期忙,唔方便早走,有時我諗,如果你哋上兩星期來,我公司的電腦唔用得,那時放幾多假都得,我地就會傾得更加耐。哈哈!

    回覆刪除
    回覆
    1. 平心而論,午餐的確幾好味,但某人同我都未必會再幫襯呢個品牌嘅餐廳lu,嘻嘻,妳懂的!好有趣妳提起Jamie Oliver,因為我地去完呢個trip返黎第二日就咁啱幫襯咗,哈哈。

      唔緊要吖,我覺得我地一定有機會再見,今次就當俾機會某人warm up下先啦,唔知妳有冇留意到,返到香港佢係未同我去見過blog友添架,所以今次好叻叻架啦。;P

      刪除
  5. 回覆
    1. 無錯,大家生處唔同地方,唔係寫blog,真係唔會有機會認識架!

      刪除
  6. 雖然遇著個唔通氣侍應,但食到一餐美味午餐,又見到blog友,真係好開心呢~~~

    回覆刪除
    回覆
    1. 最可惜係我當時無辦法享受頭盤,白白浪費咗啲美食,老實講,以食物計,絕對係值得一去嘅,但地點就有啲吊腳。

      說得對,全日嘅highlight絕對係同blog友見面。:)

      刪除
  7. 好開心啊,可以見到Blog 友仔^^
    對呀,見Blog 友仔都係至在傾計見面多d 呢 ^0^

    生蠔好正啊,我都好鐘意食,嘻嘻

    回覆刪除
    回覆
    1. 係呀,每次見blog友都會傾到雞啄唔斷,我有時懷疑鍾意寫blog嘅同時都係鍾意傾計嘅人,哈哈!

      生蠔真係幾正,好夠新鮮!

      刪除
  8. 回覆
    1. 對,飲凍湯感覺有啲怪,我本來用麵包黎“送”,但越食越覺怪,結果都係分開黎食。^^"

      刪除
  9. 有機會入廚房真係好正呀!可惜之前有啲不愉快事件...唔多唔少都影响了心情。

    回覆刪除
    回覆
    1. 其實我當時諗,如果係愛煮食嘅食客入到去廚房,一定俾我地更享受,對我地黎講,反而有少少驚自己阻“定”,嘻嘻!

      刪除
  10. 回覆
    1. 靠你啦劉總~~~話時話,你嘅英倫行幾時成行呀?快啲plan下啦!

      刪除
  11. I probably would have complained to the assigned waiter staffs.

    回覆刪除
    回覆
    1. 食緊飯時又唔想再度影響情緒,但反而返黎後有諗過從其他途徑反影。當時嘅感覺係我地係被嗰位侍應pick on,而嗰位侍應係呢件事後係全程逃避我地嘅眼光,如果佢咁理直氣壯,又何必要扮睇我地唔到呢!

      刪除
  12. 以我嘅脾氣,應該會走左人了,待應唔懂情趣提議幫你地拍合照留念仲打擾人地嘅happy moment,而個領班又咁熱心降溫更加顯得佢地理虧啦。
    見你提到返去香港冇見過blog友,希望有天你會賞臉見下我地啦,哈哈:)

    回覆刪除
    回覆
    1. 其實呢我個心態都好衰,當時係好想繼續影,睇下個侍應係咪真係會趕我地走,不過既然相機唔係我嘅部門而當事人決定收機,我就無謂咁多聲氣,嘻嘻!

      我返香港會見blog友架,只係某人唔會去咋。下次返黎我都好想可以見妳架!:)

      刪除
    2. 我都會想咁架,哈哈,不過我可能似Mr. Dolphin多啲俾人話過會覺得難堪冇哂癮,甚至想哩埋。可能我老公就會繼續據理力爭,我要shu返佢轉頭 :p

      原來我誤會左,咁你得閒諗定食咩野喇,哈哈哈 :)

      刪除
    3. 一定啦,到時要見埋妳囡囡添呢!:)

      刪除
    4. 好呀,如果到時佢仲癡我或未交男朋友仔的話 ... (傻媽ing^^)

      刪除
    5. 女兒通常最貼心,將來帶埋男友仔陪妳行街睇戲食飯呢!

      刪除