2019年1月21日星期一

2018聖誕 Day 6。和Mr. Dolphin爸爸慶生

不用上岸的日子,當然要瞓夠抖夠啦!這天起來梳洗過後已到午餐時間,海豚兒和Mr. Dolphin就直接去主餐廳跟Mr. Dolphin爸爸媽媽吃午飯咯!



這天午飯的食物不太合心,不過也不打緊,反正在郵輪絕不會餓死。;P



海豚兒和Mr. Dolphin午餐後在船上行下影下相,包括圖書館及入面的靚靚旋轉樓梯,遊戲室,及非常美麗的劇院,不竟早兩日也沒有機會四圍行下,當然要借機會參觀下,然後轉頭又去船上的酒吧再食過。








來到酒吧,Mr. Dolphin點了好啱佢口味嘅威靈頓酥皮大啡菇,而海豚兒的炸魚薯條就一般般啦!一場來到,不喝酒的我倆也點了兩杯付費飲品,一杯茶、一杯啡,哈哈,跟酒吧環境真的不太配,不過是但啦,反正我倆一向騎呢慣。^^"




到下午茶時段,我倆就去自助餐廳嘆返個下午茶啦,除了Day 5專登去Queen's Room坐定定優雅地嘆下午茶,餘下的日子海豚兒和Mr. Dolphin都選擇去自助餐廳食下午茶,一來吃得沒有那麼拘緊,二來可以只挑自己愛吃的食物來吃,海豚兒又可以當英式鬆餅係菠蘿油咁喪搽clotted cream來吃,又香又滑又好吃。



以為在四小時內吃三餐就止?哈哈,在兩小時後,我們四就去到船上的付費餐廳(每位@$39美元)跟Mr. Dolphin爸爸吃慶生飯咯,而其實這亦是海豚兒和Mr. Dolphin婚後第一次跟Mr. Dolphin爸爸在生日正日慶祝呢!沒辦法啦,Mr. Dolphin爸爸生日在聖誕節前數天,我倆很少提前這麼多放聖誕假嘛。^^"





這兒食物水準比主餐廳好更多,除了甜品較一般,從頭盤、主菜到配菜也很好吃,但服務就。。。可能我地唔好彩啦,剛遇上懶底侍應及超不負責任主管,但因為難得和Mr. Dolphin爸爸過生日,Mr. Dolphin和海豚兒也不想掃興沒有即場說些什麼,但就當然有在最後的客戶問卷調查中「努力」反影意見啦。:P




16 則留言:

  1. 係船除咗食,真係無咩好做,想唔肥屎都幾難,哈哈

    回覆刪除
    回覆
    1. 其實船上都有好多活動比船客參加(例如bingo,trivia,ball room dancing班,水彩畫班,游水,兵乓波, golf,gym,spa...),只係我地兩條大懶蟲唔願郁,所以一上船就真係預咗肥。

      刪除
  2. 一日食咁多餐, 有無之後順手係郵輪做下尖?

    回覆刪除
    回覆
    1. 哈!我地帶齊運動衫、泳衣上船... ...供奉架!真係講就天下無敵,做就有心無力囉!

      刪除
  3. 祝世伯生日快樂。 今年生日特別開心啦。居然咖啡和茶要收費?

    回覆刪除
    回覆
    1. 多謝Samwei!係呀,有家人陪又有靚和牛食,老爺生日嗰晚好開心呀!

      Regular coffee and tea喺main dining room同buffet restaurant就免費,speciality drinks例如我地叫嘅cappuccino同herbal tea就要額外附費。

      刪除
  4. 看來海豚生已經沒再受暈船浪影響了吧,有返胃口就好好多啦

    回覆刪除
    回覆
    1. 係呀,過咗大浪日,主子已經好返哂亦有努力陪我四圍走動下同食下,不過佢心底裡依舊提心吊膽好驚又遇上大浪呀。

      刪除
  5. 其實游輪同馬爾代夫 (包full broad) 好似呀,都係任食同飲野自己俾錢

    回覆刪除
    回覆
    1. 都似,都係all inclusive除咗飲品,我估坐船最唔同嘅係上網靠satellite,無free wifi,貴之餘接收力又亦唔夠強。

      刪除
  6. 當英式鬆餅係菠蘿油咁喪搽clotted cream <--好正呀, hahaha
    船上美食似乎都不錯喔~

    回覆刪除
    回覆
    1. 小聲說,我每次食下午茶都係咁做,有時我見到奶奶坐我對面睇到又唔好意思話我食得唔健康,唯有望過第二邊,當睇唔到就算,哈哈!

      我覺得呢隻船嘅食物算係幾好,有機會我都唔介意再坐,但我估主子會好介意。

      刪除
  7. 客戶問卷調查中「努力」反影意見太神的做法haha~

    回覆刪除
    回覆
    1. 我真係好努力架,喺問卷底部額外提供意見欄嗰四行線,密密麻麻咁寫咗五行字出黎。:D

      刪除
  8. 坐郵輪真係一日十餐都有可能,哈哈哈。

    回覆刪除
    回覆
    1. Welcome Mommy Dearest!!

      係呀係呀,所以喺船上只有飽同未餓嘅感覺,唔會見肚餓,而且食物menu一般無價錢,食得好鬼爽。

      刪除