這個月忙收拾行李、維修、清潔和執拾新居、添傢俬、用具加準備及迎接貴賓到訪，忙到呢。。。還有，看著一幕幕香港新聞片段，那種心痛悲憤和難過，也讓海豚兒提不起勁更新網誌呀。
這篇不如先和大家分享下海豚家搬家的二、三事吧！
先談執屋，幸運地，海豚兒一向篤信家徒四壁定律，家中沒有太多雜物，執屋也不算太困難，不過在舊居生活了十一年，大型傢俬和物件始終少不了，大概花了十天工餘時間加週末來收拾。
然後就來到新居維修及裝修。最令海豚兒滿意，莫過於以下的無中生有啦！
由無至有。。。門1
另一個由無至有。。。門2
多謝Mr. Dolphin開綠燈，更要多謝十級好人的裝修師傅能夠令海豚家有兩個能關上門的衣櫥。
維修及裝修共花了三天半，然後就是海豚兒和Mr. Dolphin阿信上身的日子，一整個週末沒完沒了的在新居做清潔工。
離開舊居前，還做了一次大掃除，光復一片不見天日十一年之久的位置，鏟走保留了十一年，屬於國家級棉胎厚度的塵埃。
搬家後，我倆大概花了兩天把所有物件執拾好，至於新置傢俬裝嵌，就全靠海豚家團隊包括隊長Mr. Dolphin和唯一隊員Mr. Dolphin來完成啦！XD 簡單來說，我倆只為新居換了一張書枱和一座電視櫃是需要自行安裝，總重量是三百磅！今次真係辛苦哂主子啦！更過份的是，海豚兒在Mr. Dolphin獨力裝嵌途中，瞓了三小時晏覺呀，哈哈！
就這樣，我倆就從舊居搬到新居。感謝舊居令我倆有瓦遮頭，更感恩我倆能有一起入住、一起遷走的福份。:)
我以為你地去左旅行添 ^^
回覆刪除你地交番間屋時, 要唔要俾人上來睇清楚至准走?
我都想呢，不過潛水只係為咗完成呢個年度大project咋，好在都搞掂哂。
刪除交收文件上有要求我地離開時層樓要係broom-clean condition,咁我地做完簡單清潔(honor system)就交keys去律師到，唔洗等人黎睇。:)
真係好感恩，竟然可以機緣巧合，入住妳地五星級的家！
回覆刪除加拿大住宿真係令人好心動呀.... 不過無論係走係留，都希望香港情況有好轉，好人一生平安，惡人得到報應！
形容得好好，真係“機緣巧合”呀，喺我地決定搬家初期，一直以為會係妳地黎玩完至成事，都無諗過竟然頭尾唔洗兩個月就搬咗。不過呢，絕不敢當係五星級嘅家，你地唔嫌我地係不善生產嘅無飯夫婦就好啦！
刪除對對對，移居到外地要考慮的真的太多，但我深信你們會能為家人選擇上最合適的生活。:)
你好幸福。我最怕裝修。最怕搬屋。我依家仲等緊勇氣裝修浴室和整廚房。
回覆刪除多謝Samwei! 剛完成呢個年度大project,我明妳講嘅“勇氣”呀，而我地終於的起心肝搬都係因為已到"the last straw"。點都好，希望妳早日能開始呢個年度大項目。:)
刪除要收拾係辛苦的，辛苦之後就係安安樂樂
回覆刪除我都好似妳咁諗，所以搬完後就摩打手盡快執拾，希望快啲有得抖下，依家都大致搞掂。:)
刪除恭喜新屋入伙！
回覆刪除我都有啲想搬屋，依家都差不多住咗一年半，只係懶得去搵。
多謝Ceci! 係喎，原來都已經回流一年半啦，只要唔怕煩，再搬都係好嘅，豈碼妳會更清楚自己適合住邊區，不過，我估最緊要係有足夠空間俾妳安置BTS寶貝同衣物呢！:)
刪除搬屋真係好煩, 肥人真係好明白!
回覆刪除就算而家自己屋, 我都唔會擺太多野, 隨時可以走佬..HAHAA
係呀，搬屋執野真係好煩好多野搞，自己屋企又自然會多幾件傢俬，搬嘅話仲多野煩，慶幸大家都搬定咗，有個安樂窩！:)
刪除人地老公獨力裝嵌途中，人地老婆瞓了三小時晏覺，太攪笑的小偷懶haha~
回覆刪除哈哈，我仲係積犯添呀，n年前我家姐幫我裝嵌書枱，我又係突然間好眼瞓走咗去瞓，最離奇係佢地都同樣用鎚仔揼到bang bang聲，我都唔知。
刪除恭喜新屋入伙！
回覆刪除維修及裝修只花了三天半，太叻啦。。。I also have disappeared (somewhat) for awhile because of Babe Dearest's wedding and so many overseas guests arrived and finally returned home <3 .
Thank you MD!! 全靠裝修師傅好人專業同埋佢嘅摩打手咋！
刪除過程中一定好攰好攰但又十分開心可以同咁多海外親友聚在一起！妳好勤力就真，仲有時間update ，等我地都可以透過blog知道妳近況！:)
我忘記了，你地住condo的嗎? 你地滿意新居嗎? 妳用無中生有形容加新門，我笑左了! 上年我地都喺美國個家加左門，嗰間房嘅門框太闊要加雙門，比我想像中大工程。因為我貪靚，揀左個有款，老公話要襯返就換唒全屋門! 咁你話邊個貪靚啲???
回覆刪除係呀，我地住condo因為懶、懶、同懶呀，哈哈！唔洗剪草鏟雪同睦鄰，年中做少好多。XD 新居比之前大啲，住得舒服咗。:)
刪除因為睇屋時已覺得好怪，點解walk in closest會無門。噢，妳嘅情況我通常會投降唔整就算，因為一聽到話要整哂全屋就暈，不過我明妳意思，主子都係咁，一係唔整，一係就要整哂，唔容許有眼怨情況！