2018年10月8日星期一

2018日本“游” Day 5 ~ 下一站。福岡

一早起來,為的是乘搭6:35 am由名古屋出發往博多的新幹線,再見啦名古屋~~~



一向唔臭米氣嘅海豚兒想試下日式飯團就買個黎試下,Mr. Dolphin亦唔好執輸買返個。原來飯團同大塊紫菜中間有塊膠片分隔著所以紫菜咬落去依然脆卜卜,仲有“chop”一聲添架,真係同車卡隔個位都聽到咁響,自此之後,我倆就叫飯團做“chop”一聲飯團啦!



食完早餐睇下風景,途經京都大阪*等地,再吹下水瞓下覺,不到四小時就來到博多啦!

*經過京都大阪之時又怎會想到颱風在一天後對這兩個城市造成的傷害呢,甚至乎連這段新幹線也停駛了,當下我倆還戇居居地說笑,如果海豚兒為食癮起,堅持要在京都下車快閃買個甜品又趕不及再上車,咁就要多等一天才能跟Mr. Dolphin在福岡會合啦!



來到博多站發現有間以吉蒂貓作招來的新幹線餐廳,海豚兒本著影咗當食咗的中旨影完相就閃人啦。




在博多站外圍影幾張相就先到酒店放低行李,因為當時還早未有得攞房。



之後就去博多站行一陣街,然後就去食午餐啦!



是日吃丼飯,海豚兒覺得海膽味道還可以但可惜感覺不夠“澎湃”,而Mr. Dolphin的魚生丼亦只是不過不失,所以這店對我倆來說亦沒有回頭的道理啦。



食完午餐再嘆杯超濃牛奶味雪糕,我倆就先回酒店取鎖卡入收拾一下。



之後就去下一站Canal City行街和試下出名的博多拉麵啦,至於味道嘛,海豚兒㨂了黑蒜湯底不錯吃,但幼麵始終不是我倆杯茶。







食完麵就繼續行下、行下,行出Canal City,行到去一條無咩好睇嘅商店街




再入去附近又係無咩啱睇嘅商場行下,順便抖下食下甜品,不過味道就一般啦。



再然後就坐車返回博多站,逛下Hankyu地庫超市買埋宵夜就返酒店休息lu。

16 則留言:

  1. 個商場真係嘛嘛,我哋都好快閃就行完。

    回覆刪除
    回覆
    1. Canal City嘅一時行出面一時行入面嘅設計本身已唔多好行,加上個商場本身唔夠“內涵”XD,真係唔多吸引,至於另一個Hakata Riverain Mall就更甚,我嗰日行博多站行得開心啲,但可惜我地無去outlets囉!

      刪除
  2. 係咪福岡無咩特別嘢睇﹖

    回覆刪除
    回覆
    1. 妳咁醒嘅,哈哈!

      福岡同東京大阪真係好唔同,但其實我都幾鍾意喺呢度悠悠閒四圍逛下hea下,感覺都幾舒服。

      刪除
  3. 我好鐘意食飯團, 日本/台灣嘅都好食, 即使係7仔/Family Mart 出品都唔差, 我覺得因為流量大, 所以D飯團唔會擺到謝哂
    香港7仔嘅, 就真係唔好試

    回覆刪除
    回覆
    1. 係呀係呀,我地啲飯團都係喺便利店買,價錢親民,但質素真係有驚喜,不過目測便利店內嘅關東煮,就唔多吸引,每次排隊俾錢見到嗰兜野,都諗啲食物咁浸成日,係咪會淋哂架。

      香港嘅7仔,依家我多數只會買水、果汁、雜誌,但80年代,就最鍾意買叮叮pizza(有拉絲架!)。

      刪除
  4. 6:35 am真係好早呀!但打風後變到好少車是嗎?
    日本的水果同甜品真係無得頂,萬分懷念!

    回覆刪除
    回覆
    1. 真係堅早呀,而且仲會因為班車咁早,喺名古屋少咗半日玩。其實唔關打風事,主要因為用JR Pass坐新幹線有啲班次唔坐得(嗰啲班次時間靚啲又密啲),但買JR Pass真係抵好多,所以就要就下啲時間黎坐。

      對對對,不過兩個人食力有限,如果唔係,我仲想試埋巨型桃同超巨型芒果添呀!

      刪除
  5. 肥人好想坐果部KITTY新幹線呀, 睇相見到成部車都好好好好好靚呀~

    提子一定好甜好好食呀....流口水ING~

    回覆刪除
    回覆
    1. 我手痕google下,發現hello kitty新幹線行到今年11月呀,不如plan下趕唔趕得切去轉日本完心願吖,“錯失太易”呀,唔好俾自己後悔嘛!

      晴王又確係好甜,而且仲要係越放多幾日至食就越甜,不過亦因為咁甜,食幾粒就好夠。

      刪除
    2. 我....十一月已經滿左啦...hahaa

      刪除
    3. 哎呀,原來如此。。。Hello Kitty喺日本果然多捧場客呀!

      刪除
  6. 福岡.... 可能除咗去嗰度巨蛋睇防彈,我都唔會有興趣去啊!

    回覆刪除
    回覆
    1. 坦白講,如果第一次去日本,我都唔會提議人去福岡,但如果只想hea遊日本又唔想重複去東京大阪又逼又貴,都可以一去嘅,而且福罔物價真係平啲。

      刪除
  7. chop一聲飯團香港7仔都已經係咁包裝了!

    回覆刪除
    回覆
    1. 竟然!唔知香港嘅有冇chop一聲效果呢。但老老實實,喺香港我又唔會有意慾想試,心裡頭硬係覺得喺香港食唔再一樣,亦好似無再嗰種風味。

      刪除