19' 首爾 ~ Day 6 Alive Museum※模型玩具博物館※再拼地下街

早上出發去搭巴士時經過明洞聖堂，影番張到此一遊先!

一轉身見到對面有可樂餅賣，即刻向主子匯報。



主子和巨人立刻買來當早餐，新鮮炸起，當然好吃啦，而且仲好抵食添！



是日第一站是按朋友仔喜好再訪仁寺洞，為的是用遊客pass包的Alive Museum入場券。主子知道海豚兒對這些3D攝影場景興趣不大，就努力非常扮演不同角色逗海豚兒開心 <3 。當中朋友仔拍咗主子一段片，我們四都係睇一次，笑一次。



估唔到在Alive Museum內竟然有彩蛋。:)



去完景點一，朋友仔和巨人耳猶未盡再下一城去Running Man場館，海豚兒和主子就翻兜甜品店，為的是下圖右面用貌似蕃薯裝住的雪糕。和店員雞同鴨講一番，大意是這雪糕是季節限定，現在沒有，於是我倆就點了左面那款雪糕，“嘗試”問店員是甚麽口味，可惜繼續無法溝通，照買！



想不到竟然有驚喜，原來是花生味雪糕，更深得主子喜愛！



食完再四圍行，到午飯時間，主子就陪海豚兒再戰韓燒！這兒的韓牛同樣香口但就有筋，沒有馬場洞龍門家的牛牛那麽香軟兼無筋。

食飽飽有點渴，我倆飲了杯老虎堂黑糖珍珠奶茶，又確係幾好味喎！



再匯合剛吃完午飯的朋友仔和巨人，我們四就揾路搭巴士去下一個景點，途經這棟有趣商廈又影張相先。



可能附近太多高樓大廈，GPS訊息變弱，在十字路口兜了一圈都找不到指示，在海豚兒強烈要求下，我們四終於坐上的士去下一站，模型玩具博物館，另一個遊客pass包免費入場的場館。






海豚兒和朋友仔快快手手影幾張相就搵個靚位坐定定等。



離開場館後，我們四在街上隨意行，看見一間傢俬傢品店並附設咖啡店便貪得意入去一試。食物就普普通通啦，不過抖下差下電都好嘅，因為。。。

之後我們又再戰Goto Mall血拼啦，因為呢，朋友仔未去見識過嘛～～～



行完街街就返明洞求其食一餐晚飯。




最後再陪朋友仔嘆多次厚cream抹茶卷蛋就返酒店休息啦！



遊客pass用後感：遊客pass其實算方便(可以加錢當八達通洗用)和抵玩(包單程火車：仁川機場～首爾火車站，及n咁多個入場景點)，不過坦白講，對於海豚兒和Mr. Dolphin，這些都是不重要，反而我倆不太習慣於這「為去而去」的旅行模式^^” 。但既然朋友仔興致勃勃，我倆也奉陪就是了。