2015年3月25日星期三

木屋村的童年時光

海豚兒想説的並不是自己的童年,總覺得在石C森林中長大的自己,沒有什麼特别的經歷。不過海豚兒家姐的童年就多姿多采得多啦,所以這篇卜文其實是想細説從旁聽得知家姐一點點的童年事!
從前在舊卜文也提過嘛,海豚兒的爸爸和媽媽在非洲生活了好幾年,那時候,年紀尚小的海豚兒家姐是跟着外婆生活。外婆居住在木屋村,相信亦因為這個原因,家姐從小就很。大。膽。!
海豚兒家姐甚麼蛇蟲鼠蟻也不害怕,在家中每逢有曱甴、四腳蛇出現,家姐永遠好似有金執咁去追住這些另類朋友玩,而這時候,海豚兒大多是瘋狂喪叫然後以9秒9速逃。海豚兒最記得是家姐教曉海豚兒玩一個很變態的遊戲,就是和一班年紀相約的小孩在山邊一起捉蝸牛,然後就是賽蝸牛,看看誰家的蝸牛最快爬到去終點。還好長大後的海豚兒家姐不嗜賭馬、賽狗等玩意。;P
外婆在生時經常説起從前在木屋養的貓貓。貓的天性就是愛獵捕,從前海豚兒養的貓貓也愛捉麻雀,每次要幫貓貓收拾殘局時也嚇到海豚兒腳軟,而當然貓除了喜歡獵雀也會捉米妮姥姥,然而,外婆家的貓貓的飛弗卻是捉蛇。據説,這隻貓貓從來不會把蛇咬死----->是一隻不愛殺生的貓貓嗎? XD 這隻貓貓最喜歡把獵物帶回家玩,玩完拍拍屁股就走咗去,其中有一次,外婆看見坐在學行車的家姐手執一條蛇仔興奮狂"fing",嚇得外婆馬上找鄰居來幫拖,自此之後,外婆就把這隻會捉蛇的貓貓贈與鄰居,而鄰居則如獲至寶,不知多高興!相隔許多年後,這位舊鄰居還在稱讚當年的貓貓呢!真是甲之熊掌,乙之砒霜呢!
其實海豚兒也滿懷念這些舊人舊事, 海豚兒家姐和海豚兒跟外婆這些舊鄰居的子女仍有聯絡,當中包括之前提過在三藩市居住的阿姨即外婆的契女,而家姐跟這些舊鄰居的相處日子比較久,感情更深,除了facebook連系,他們也會書信聯絡。。。老實説,科技的發達把網絡另一方的妳/你和我的距離拉近了,然而海豚兒在現居住了好幾年,却連隔離的鄰居貴姓都未知,慚愧呢!^^"

14 則留言:

  1. 我剛搬來這區時,不用一星期已經認識了半條街的鄰居。 其實是他們熱情,又對我這個香港人好奇。

    回覆刪除
    回覆
    1. 唔駛問佢哋一定係比Samwei厨房嘅香氣吸引咗過嚟啦!:)

      我仲以為英國人對人會比較冷淡,唔會太熱情添,原來都唔係吖!

      刪除
  2. 我呢啲喺走廊玩大嘅細路都唔怕蛇蟲鼠蟻,或者鬼,所以可以獨居多年。

    我哋呢邊出入見到鄰居,都會揮揮手(喺車入面),或者講句hello。我老公會傾多啲,我就少啲。

    回覆刪除
    回覆
    1. 哈哈!我記得Ceci"膽生毛"嘛,對我嚟講喺北美洲生活已經好好多,豈碼無飛曱甴!XD

      平日搭lift我都會同鄰居打招呼但就好少會傾計,我覺得只要自己肯主重講聲hello,通常鄰居都會應,不過就唔會詳談。

      刪除
  3. That's a big responsbility that your grandma took on!

    Your sister must have been very close to your grandma then.

    回覆刪除
    回覆
    1. 都係架!不過好似妳咁講,外婆同家姐感情好好,我記得我細個時,佢哋兩個成日會夜晚嗰陣傾密計!

      刪除
  4. 妳當時係邊呀?未出世?

    回覆刪除
    回覆
    1. 嘻嘻!我又真係唔知自己喺邊喎,因為真係未出世呀!XD

      刪除
  5. 海豚兒:
    ~你會懷緬過去嘅人, 小時候嘅事, 都記得好清楚.
    ~大膽先好, 做咩事都唔怕向前衝, 你家姐事業發展都應該幾好!!

    回覆刪除
    回覆
    1. 其實我好想將未曾忘記嘅往事慢慢寫低因為我發現有時家人同我講返我細個D嘢,我好多都無印象。^^"

      家姐做女時打工都好拼搏架,不過生完兩個之後,佢6299想佢花多D時間陪仔女,所以佢最多只係做兼職,專職係管接管送小朋友返/放學,同埋去課外活動, 老實講,由朝到晚車出車入都好忙架。:)

      刪除
  6. 嘩, 會捉蛇的貓貓, 我聽到都好驚呀!!!!

    不過細個同鄰居真係玩得close d, 我都記得個時好鍾意同鄰居玩大富翁, 同會錄卡式帶 (暴露年齡啦!!!), 依家真係唔同哂啦

    回覆刪除
    回覆
    1. 細個聽呢件事淨係覺得家姐好攪笑,都係大個咗至識驚!^^"

      係吖!細個同鄰居嘅小朋友玩嘅日子真係好開心,不過嗰時父母同鄰居都親近D,同依家真係唔同啊!

      唔駛擔心暴露年齡,因為妳依然非常年青啦!仲有,MC 兩個都生得咁高,到佢哋十來歲,D人都會以為妳係佢哋大家姐o乍!

      刪除
  7. 你家姐好大膽子~~ 俾著我見到蛇蟲鼠蟻一定速逃~~
    有時回憶起童年往事都很令人回味, 一家人講起更有共鳴~~

    回覆刪除
    回覆
    1. 佢真係好大膽架,除咗唔驚昆蟲外,小學年代就已經半夜睇明珠台D鬼片,我又係嚇到廳都唔敢出架。

      我都覺吖! 我發現仲細嘅時候就好怕屋企人提起細個D低能嘢,因為唔"型"吖嘛,依家講返就覺得好攪笑。

      刪除